വിക്ടോറിയ: ആവർത്തിച്ച് സ്വത്ത് സംബന്ധമായ കുറ്റകൃത്യങ്ങളിലും പൊതുജനശല്യത്തിലും ഏർപ്പെടുന്നവരെ നിരീക്ഷിക്കുന്നതിനുള്ള പദ്ധതി ബി.സി. (ബ്രിട്ടീഷ് കൊളംബിയ) സർക്കാർ വിപുലീകരിച്ചു. ലോവർ മെയ്ൻലാൻഡ് മേഖലയിൽ ഏഴ് പുതിയ ഇന്റർവെൻഷൻ ആൻഡ് മോണിറ്ററിംഗ് ഹബ്ബുകൾ സ്ഥാപിച്ചുകൊണ്ട് 365 അക്രമികളെ നിരീക്ഷിക്കാനാണ് പദ്ധതി ലക്ഷ്യമിടുന്നത്. കഴിഞ്ഞ മാസം വാൻകൂവർ ഐലൻഡിൽ ആരംഭിച്ച 16 മില്യൺ ഡോളറിന്റെ ‘ക്രോണിക് പ്രോപ്പർട്ടി ഒഫെൻഡിംഗ് ഇന്റർവെൻഷൻ’ പദ്ധതിയാണ് ഇപ്പോൾ ലോവർ മെയ്ൻലാൻഡിലേക്ക് വ്യാപിപ്പിച്ചിരിക്കുന്നത്.
ചെറിയൊരു ശതമാനം കുറ്റവാളികളാണ് ഭൂരിഭാഗം കുറ്റകൃത്യങ്ങളും ചെയ്യുന്നതെന്നും ഇത്തരക്കാരെ തടയാൻ പ്രോസിക്യൂട്ടർമാർ, എൻഫോഴ്സ്മെന്റ് ഉദ്യോഗസ്ഥർ, സോഷ്യൽ സർവീസ് ജീവനക്കാർ എന്നിവരടങ്ങിയ സംഘം പ്രവർത്തിക്കുമെന്നും കമ്മ്യൂണിറ്റി സേഫ്റ്റി സഹമന്ത്രി ടെറി യംഗ് അറിയിച്ചു. ലോവർ മെയ്ൻലാൻഡിലുടനീളമുള്ള 11 ഹബ്ബുകളിലൂടെ ക്രിമിനൽ പശ്ചാത്തലവും വീണ്ടും കുറ്റകൃത്യങ്ങൾ ചെയ്യാനുള്ള സാധ്യതയും വിലയിരുത്തിയാണ് ആളുകളെ തിരഞ്ഞെടുക്കുന്നത്. നിലവിൽ വാൻകൂവറിൽ നാലും സറെയിൽ രണ്ടും ഉൾപ്പെടെ പ്രവിശ്യയിലുടനീളം ആകെ 865 കുറ്റവാളികളെ സർക്കാർ നിരീക്ഷിച്ചു വരുന്നുണ്ട്.
സ്റ്റാറ്റിസ്റ്റിക്സ് കാനഡയുടെ കണക്കനുസരിച്ച് കഴിഞ്ഞ വർഷം ബി.സി.യിൽ 42,000 കടകളിൽ മോഷണ സംഭവങ്ങൾ റിപ്പോർട്ട് ചെയ്തിട്ടുണ്ട്. വ്യാപാരികൾ ഈ നടപടിയെ സ്വാഗതം ചെയ്തപ്പോൾ, പദ്ധതിക്കെതിരെ ബി.സി. സിവിൽ ലിബർട്ടീസ് അസോസിയേഷൻ പോളിസി ഡയറക്ടർ മേഘൻ മക്ഡെർമോട്ട് രംഗത്തെത്തി.
ദാരിദ്ര്യവും ഭവനരഹിതാവസ്ഥയുമാണ് ഇത്തരം കുറ്റകൃത്യങ്ങളുടെ പ്രധാന കാരണമെന്നും ഇത് പരിഹരിക്കാതെ നിരീക്ഷണം ശക്തമാക്കുന്നത് ആളുകളെ കുറ്റകൃത്യങ്ങളിൽ തന്നെ നിലനിർത്താൻ മാത്രമേ സഹായിക്കൂ എന്നും അവർ വിലയിരുത്തി.
എന്നാൽ കുറ്റകൃത്യങ്ങൾ തടയുന്നതിനൊപ്പം ഭവനം, സാമ്പത്തിക സഹായം, മാനസികാരോഗ്യം, ലഹരിവിമുക്തി എന്നിവയ്ക്കുള്ള പിന്തുണ നൽകി കുറ്റകൃത്യങ്ങൾക്ക് കാരണമാകുന്ന അടിസ്ഥാന പ്രശ്നങ്ങൾ പരിഹരിക്കാനും പദ്ധതിയിലൂടെ ശ്രമിക്കുമെന്ന് സർക്കാർ വ്യക്തമാക്കുന്നു.
New move to prevent crime: B.C. government announces new monitoring hubs
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
