ടൊറന്റോ: കാനഡയിലേക്ക് കുടിയേറാൻ ആഗ്രഹിക്കുന്നവർക്കും നിലവിൽ അവിടെ താൽക്കാലിക വിസയിൽ കഴിയുന്നവർക്കും നിർണ്ണായകമായ പുതിയ പ്രോസസിംഗ് വിവരങ്ങൾ ഐആർസിസി (IRCC) പുറത്തുവിട്ടു. 2026 മെയ് മാസത്തിലെ കണക്കുകൾ പ്രകാരം വർക്ക് പെർമിറ്റ്, സൂപ്പർ വിസ, പിആർ കാർഡ് എന്നീ വിഭാഗങ്ങളിൽ നടപടികൾ മുൻപത്തേക്കാൾ വേഗത്തിലായിട്ടുണ്ട്. എന്നാൽ വിസിറ്റർ വിസ നീട്ടാൻ അപേക്ഷിക്കുന്നവർക്ക് തിരിച്ചടിയായി കാത്തിരിപ്പ് കാലാവധി പത്ത് മാസം പിന്നിട്ടു എന്നതാണ് പുതിയ റിപ്പോർട്ട്.
കാനഡയ്ക്കകത്തു നിന്നുള്ള വർക്ക് പെർമിറ്റ് അപേക്ഷകളിൽ വൻ കുതിച്ചുചാട്ടമാണ് ഇത്തവണ ഉണ്ടായിരിക്കുന്നത്. കഴിഞ്ഞ മാർച്ചുമായി താരതമ്യം ചെയ്യുമ്പോൾ നടപടിക്രമങ്ങളിൽ 41 ദിവസത്തെ കുറവുണ്ടായി. നിലവിൽ 212 ദിവസമാണ് ഇതിനായി എടുക്കുന്ന ശരാശരി സമയം. അതുപോലെ പിആർ കാർഡുകൾക്കായുള്ള നടപടികളും വേഗത്തിലായിട്ടുണ്ട്. പുതിയ പിആർ കാർഡുകൾ 42 ദിവസത്തിനുള്ളിലും പുതുക്കാനുള്ളവ വെറും 28 ദിവസത്തിനുള്ളിലും അപേക്ഷകർക്ക് ലഭിക്കും. ഇന്ത്യയിൽ നിന്നുള്ള വിസിറ്റർ വിസ അപേക്ഷകളിൽ ഇപ്പോൾ 27 ദിവസത്തിനുള്ളിൽ തീരുമാനമുണ്ടാകുന്നുണ്ട്.
സൂപ്പർ വിസ വിഭാഗത്തിലും വലിയ പുരോഗതി ദൃശ്യമാണ്. ഇന്ത്യയിൽ നിന്നുള്ള രക്ഷിതാക്കൾക്കായി സമർപ്പിക്കുന്ന സൂപ്പർ വിസകൾക്ക് ഇപ്പോൾ 160 ദിവസമാണ് എടുക്കുന്നത്. എന്നാൽ ഇതിനെല്ലാം വിപരീതമായി വിസിറ്റർ റെക്കോർഡ് എക്സ്റ്റൻഷൻ അപേക്ഷകൾ 308 ദിവസമായി ഉയർന്നു എന്നത് അപേക്ഷകരെ ആശങ്കയിലാക്കുന്നുണ്ട്. പൗരത്വ സർട്ടിഫിക്കറ്റിനായുള്ള കാത്തിരിപ്പ് 12 മാസമായും പൗരത്വ ഗ്രാൻഡ് 13 മാസമായും വർദ്ധിച്ചിട്ടുണ്ട്. എക്സ്പ്രസ് എൻട്രി വിഭാഗത്തിൽ അപേക്ഷകരുടെ എണ്ണം വൻതോതിൽ കൂടുന്നതും വരും മാസങ്ങളിൽ നടപടികൾ വൈകാൻ കാരണമായേക്കാം. നിലവിലുള്ള സാഹചര്യത്തിൽ അപേക്ഷകൾ കൃത്യമായ രേഖകൾ സഹിതം മുൻകൂട്ടി സമർപ്പിക്കണമെന്ന് അധികൃതർ നിർദ്ദേശിക്കുന്നു.
New IRCC Processing Times As Of May 2026
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
