ടൊറന്റോ: രാജ്യത്ത് പുകയില ഉപയോഗം കുറയ്ക്കുന്നതിന്റെ ഭാഗമായി ഓഗസ്റ്റ് 1 മുതൽ സിഗരറ്റ് പാക്കറ്റുകളിൽ കൂടുതൽ ഭയപ്പെടുത്തുന്ന 13 ഗ്രാഫിക് ചിത്രങ്ങൾ നിർബന്ധമാക്കാൻ ഹെൽത്ത് കാനഡ. പുകവലി കാരണം കുഞ്ഞുങ്ങൾക്കും ശരീരത്തിലെ അവയവങ്ങൾക്കും ഉണ്ടാകുന്ന ഗുരുതരമായ ആരോഗ്യപ്രശ്നങ്ങളുടെ ചിത്രങ്ങൾ സിഗരറ്റ് പാക്കറ്റുകളിൽ അച്ചടിക്കാൻ കാനഡ സർക്കാർ തീരുമാനിച്ചിട്ടുണ്ട്. ആളുകളിൽ ഭയം ഉണ്ടാക്കി പുകവലി ശീലം നിർത്തിക്കാനാണ് ഇത്തരം ഭയപ്പെടുത്തുന്ന ചിത്രങ്ങൾ കൊടുക്കുന്നത്. നിലവിൽ കാനഡയിൽ പുകവലിക്കുന്നവരുടെ എണ്ണം കൂടുതലാണ്. ഇതുപോലുള്ള കർശനമായ നടപടികളിലൂടെ 2035 ആകുമ്പോഴേക്കും രാജ്യത്തെ പുകവലക്കാരുടെ എണ്ണം മൊത്തം ജനസംഖ്യയുടെ 5 ശതമാനത്തിൽ താഴെയായി കുറയ്ക്കുക എന്നതാണ് സർക്കാർ ഇതിലൂടെ ലക്ഷ്യമിടുന്നത്.
2000 മുതൽ പുകയില ഉപയോഗം കുറയ്ക്കാൻ കാനഡ നടപ്പാക്കുന്ന മുന്നറിയിപ്പ് സംവിധാനത്തിലെ നാലാമത്തെ വലിയ മാറ്റമാണിത്. തുടർച്ചയായ ബോധവൽക്കരണവും കർശന നിയമങ്ങളും കാരണം 2001-ൽ 29 ശതമാനമായിരുന്ന പുകവലി നിരക്ക് 2024-ൽ 13 ശതമാനമായി കുറഞ്ഞിട്ടുണ്ട്. എങ്കിലും, രാജ്യത്ത് പ്രതിവർഷം 48,000 ആളുകൾ പുകയില ഉപയോഗം മൂലമുള്ള രോഗങ്ങളാൽ മരണപ്പെടുന്നുണ്ടെന്നാണ് ഔദ്യോഗിക കണക്കുകൾ സൂചിപ്പിക്കുന്നത്. സിഗരറ്റ് പാക്കറ്റുകളിൽ രണ്ടു വർഷത്തേക്കും മറ്റ് പുകയില ഉൽപ്പന്നങ്ങളിൽ മൂന്ന് വർഷത്തേക്കും ഈ പുതിയ ചിത്രങ്ങൾ പ്രാബല്യത്തിലുണ്ടാകും.
മുന്നറിയിപ്പ് ചിത്രങ്ങൾക്ക് പുറമെ കൂടുതൽ കടുത്ത പൊതുനയങ്ങൾ കൂടി കാനഡ നടപ്പാക്കണമെന്ന് ആരോഗ്യ വിദഗ്ധർ ആവശ്യപ്പെടുന്നുണ്ട്. സിഗരറ്റ് വാങ്ങാനുള്ള കുറഞ്ഞ പ്രായം 21 ആക്കി ഉയർത്തുക, ഉൽപ്പന്നങ്ങളുടെ ലഭ്യത കുറയ്ക്കുക, ബ്രിട്ടനിലെ പോലെ നിർദ്ദിഷ്ട വർഷത്തിനു ശേഷം ജനിച്ചവർക്ക് പുകയില നിരോധിക്കുക തുടങ്ങിയ ശക്തമായ നടപടികൾ കാനഡയും പരിഗണിക്കണമെന്നാണ് വാട്ടർലൂ സർവകലാശാലയിലെ വിദഗ്ധർ ചൂണ്ടിക്കാണിക്കുന്നത്. നികുതി വർധനവും ബോധവൽക്കരണവും ചിത്രങ്ങളും ഒരുമിച്ച് കൊണ്ടുപോകുന്നത് വഴി മാത്രമേ 2035-ലെ ലക്ഷ്യം പൂർണ്ണമായി കൈവരിക്കാൻ കഴിയൂ എന്ന് കാൻസർ സൊസൈറ്റിയും വ്യക്തമാക്കുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canada takes tough measures against smoking; new graphic images to appear on cigarette packs; directive effective August 1.
