ഓട്ടവ: രാജ്യത്തെ പെൻഷൻ ഗുണഭോക്താക്കൾക്ക് ആശ്വാസമായി ഈ മാസത്തെ കാനഡ പെൻഷൻ പ്ലാൻ (CPP), ഓൾഡ് ഏജ് സെക്യൂരിറ്റി (OAS) ആനുകൂല്യങ്ങൾ 2026 ഓഗസ്റ്റ് 27 വ്യാഴാഴ്ച വിതരണം ചെയ്യും. ജൂലൈയിൽ നിലവിൽ വന്ന 1.2 ശതമാനം വർദ്ധനവോടെയുള്ള രണ്ടാമത്തെ ഗഡുവാണ് ഈ മാസം ബാങ്ക് അക്കൗണ്ടുകളിൽ നേരിട്ടെത്തുന്നത്.
പുതിയ നിരക്ക് പ്രകാരം 2025-ൽ $152,062-ൽ താഴെ വാർഷിക വരുമാനമുള്ള 65 മുതൽ 74 വയസ്സ് വരെയുള്ളവർക്ക് പ്രതിമാസം പരമാവധി $751.97 വരെ OAS ആനുകൂല്യം ലഭിക്കും. 75 വയസ്സും അതിനുമുകളിലുള്ളവർക്കുമുള്ള തുക പ്രതിമാസം $827.17 ആയി ഉയർന്നിട്ടുണ്ട്. സി.പി.പി പെൻഷൻ നിരക്കുകളിൽ മാറ്റമില്ലാതെ ജനുവരിയിൽ പ്രഖ്യാപിച്ച 2% വാർഷിക വർദ്ധനവ് തന്നെ തുടരും. ഇതനുസരിച്ച് 65-ാം വയസ്സിൽ പൂർണ്ണ പെൻഷന് അർഹരായവർക്ക് പരമാവധി $1,507.65 വരെ ലഭിക്കും. കൂടാതെ, കുറഞ്ഞ വരുമാനക്കാരായ വ്യക്തികൾക്ക് ലഭിക്കുന്ന ഗാരന്റീഡ് ഇൻകം സപ്ലിമെന്റ് (GIS) പ്രതിമാസം പരമാവധി $1,123.17 ആയി പുതുക്കിയിട്ടുണ്ട്.
ALSO READ: യു.എസ് താരിഫ് ഭീഷണി: കാനഡയിൽ 87,000 തൊഴിലവസരങ്ങൾ കുറഞ്ഞേക്കും; ഈ പ്രവിശ്യകൾക്ക് തിരിച്ചടി
വരുന്ന ഒക്ടോബർ മാസത്തിൽ ഒ.എ.എസ് ആനുകൂല്യങ്ങളിൽ വീണ്ടും 1.4 ശതമാനത്തിന്റെ വർദ്ധനവ് വരുമെന്ന് സർക്കാർ സ്ഥിരീകരിച്ചിട്ടുണ്ട്. ഇതോടെ ഒക്ടോബർ 28-ലെ വിതരണത്തിൽ 65-74 പ്രായക്കാരുടെ ഒ.എ.എസ് തുക $762.50 ആയും 75 വയസ്സിന് മുകളിലുള്ളവരുടേത് $838.75 ആയും ഉയരും. പെൻഷൻ തുക സംബന്ധിച്ച വിവരങ്ങൾ പരിശോധിക്കാനും ബാങ്ക് ഡെപ്പോസിറ്റ് സ്റ്റാറ്റസ് അറിയാനും ഉപഭോക്താക്കൾക്ക് ‘My Service Canada’ പോർട്ടൽ ഉപയോഗിക്കാവുന്നതാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
