കാനഡയിൽ മൊബൈൽ-ഇന്റർനെറ്റ് ഉപഭോക്താക്കൾക്ക് ആശ്വാസം; പ്ലാൻ മാറ്റാനും കമ്പനി മാറാനുമുള്ള ‘ഹിഡൻ ഫീസുകൾ’ ഇനിയില്ല

കാനഡയിലെ ലക്ഷക്കണക്കിന് മൊബൈൽ, ഇന്റർനെറ്റ് ഉപഭോക്താക്കൾക്ക് വലിയ ആശ്വാസമേകുന്ന പുതിയ ഉപഭോക്തൃ സംരക്ഷണ നിയമം ഈ ആഴ്ച മുതൽ പ്രാബല്യത്തിൽ വരികയാണ്. 2026 ജൂൺ 12 വെള്ളിയാഴ്ച മുതൽ, ടെലികോം കമ്പനികൾ ഉപഭോക്താക്കളിൽ നിന്ന് ഈടാക്കുന്ന ആക്ടിവേഷൻ ഫീസ്, പ്ലാൻ മാറ്റാനുള്ള ഫീസ്, കണക്ഷൻ റദ്ദാക്കൽ ഫീസ് എന്നിവ കാനഡ സർക്കാർ പൂർണ്ണമായും നിരോധിച്ചു. നിലവിൽ 30 ഡോളർ മുതൽ 80 ഡോളർ വരെയാണ് വിവിധ കമ്പനികൾ ഇത്തരം കാര്യങ്ങൾക്കായി ഉപഭോക്താക്കളിൽ നിന്ന് ഈടാക്കിയിരുന്നത്. മികച്ച ഓഫറുകളുള്ള മറ്റ് കമ്പനികളിലേക്ക് മാറുന്നതിൽ നിന്ന് സാധാരണക്കാരെ തടഞ്ഞിരുന്ന പ്രധാന ഘടകമായിരുന്നു ഈ ഭീമമായ തുക. കനേഡിയൻ റേഡിയോ-ടെലിവിഷൻ ആൻഡ് ടെലികോം കമ്മീഷൻ (CRTC) പുറപ്പെടുവിച്ച ‘ടെലികോം റെഗുലേറ്ററി പോളിസി 2026-43’ പ്രകാരമാണ് ഈ ചരിത്രപരമായ മാറ്റം നടപ്പിലാക്കുന്നത്.

പുതിയ നിയമപ്രകാരം പുതിയ കണക്ഷൻ എടുക്കുമ്പോൾ ഈടാക്കുന്ന ആക്ടിവേഷൻ ഫീസ് ഇനി മുതൽ കമ്പനികൾക്ക് വാങ്ങാൻ അനുവാദമില്ല. കൂടാതെ നിലവിലുള്ള പ്ലാൻ മാറ്റുന്നതിനോ അപ്‌ഗ്രേഡ് അല്ലെങ്കിൽ ഡൗൺഗ്രേഡ് ചെയ്യുന്നതിനോ ഉള്ള പ്ലാൻ ചേഞ്ച് ഫീസും പൂർണ്ണമായി ഒഴിവാക്കി. ഫോണുകൾക്ക് സബ്‌സിഡി ഇല്ലാത്ത കരാറുകൾ കാലാവധിക്ക് മുൻപ് റദ്ദാക്കുമ്പോൾ ഈടാക്കാറുള്ള കൺസിലേഷൻ പെനാൽറ്റിയും ഇനി മുതൽ ഉണ്ടാകില്ല. കമ്പനികൾ ഈ ഫീസുകളെ ഏത് പേരിട്ട് വിളിച്ചാലും, ഉപഭോക്താവ് കമ്പനി മാറുന്നത് തടയുക എന്ന ലക്ഷ്യത്തോടെയുള്ള എല്ലാത്തരം ചാർജുകളും പുതിയ നിയമപ്രകാരം നിരോധിക്കപ്പെട്ടിരിക്കുന്നു.

ഈ നിയമം എല്ലാ ഫീസുകളും ഒഴിവാക്കുന്നില്ല എന്ന കാര്യം ഉപഭോക്താക്കൾ ശ്രദ്ധിക്കേണ്ടതുണ്ട്. നിങ്ങൾ ഫോൺ ഫിനാൻസ് ചെയ്യുകയോ സബ്‌സിഡി നിരക്കിൽ വാങ്ങുകയോ ചെയ്തിട്ടുണ്ടെങ്കിൽ, അതിന്റെ ബാക്കി തുക കമ്പനി മാറുമ്പോഴും അടച്ചുതീർക്കേണ്ടി വരും. ഹോം ഇന്റർനെറ്റിന്റെ ഫിസിക്കൽ ഇൻസ്റ്റാളേഷന് ഈടാക്കുന്ന ന്യായമായ ചാർജുകൾ കമ്പനികൾക്ക് തുടർന്നും വാങ്ങാം. അതുപോലെ നിങ്ങളുടെ റെഗുലർ മന്ത്‌ലി പ്ലാൻ ചാർജ്, റോമിംഗ് ചാർജ്, അധിക ഡാറ്റാ ഉപയോഗത്തിനുള്ള തുക എന്നിവയ്ക്ക് മാറ്റമുണ്ടാകില്ല.

ആർക്കൊക്കെയാണ് ഈ നിയമം ബാധകം?

കാനഡയിലെ എല്ലാ വ്യക്തിഗത മൊബൈൽ ഉപഭോക്താക്കൾക്കും ചെറുകിട ബിസിനസ്സ് അക്കൗണ്ടുകൾക്കും ഈ നിയമത്തിന്റെ സംരക്ഷണം ലഭിക്കും. പുതുതായി കാനഡയിലേക്ക് എത്തിയവർക്കും ഈ ആനുകൂല്യം ഒരുപോലെ ബാധകമാണ്. റോജേഴ്സ്, ബെൽ, ടെലസ് എന്നീ വൻകിട കമ്പനികൾക്കും അവരുടെ കീഴിലുള്ള ഫൈഡോ, വിർജിൻ പ്ലസ്, കൂടോ തുടങ്ങിയ ഫ്ലാങ്കർ ബ്രാൻഡുകൾക്കും പുതിയ നിയമം ബാധകമാണ്. എന്നാൽ വലിയ കോർപ്പറേറ്റ് കമ്പനികളുടെ അക്കൗണ്ടുകളെ ഇതിൽ നിന്ന് ഒഴിവാക്കിയിട്ടുണ്ട്.

കമ്പനി മാറുന്നതിന് മുൻപ് ശ്രദ്ധിക്കേണ്ട കാര്യങ്ങൾ

കമ്പനി മാറുന്നതിന് മുൻപായി നിങ്ങളുടെ ഫോണിന്റെ ഫിനാൻസിങ് കാലാവധി കഴിഞ്ഞിട്ടില്ലെങ്കിൽ ബാക്കി എത്ര തുക അടയ്ക്കാനുണ്ടെന്ന് നിലവിലെ പ്രൊവൈഡറോട് ചോദിച്ച് മനസ്സിലാക്കണം. നിങ്ങളുടെ നിലവിലെ ഫോൺ നമ്പർ നിലനിർത്തണമെങ്കിൽ പഴയ കണക്ഷൻ സ്വയം റദ്ദാക്കരുത്. പുതിയ കമ്പനിയെ സമീപിച്ച് നമ്പർ പോർട്ട് ചെയ്യാൻ ആവശ്യപ്പെട്ടാൽ അവർ തന്നെ പഴയ കണക്ഷൻ മാറ്റിക്കോളും. പുതിയ കണക്ഷൻ എടുക്കുമ്പോൾ ആക്ടിവേഷൻ ഫീസ് ഈടാക്കിയിട്ടില്ലെന്ന് ഉറപ്പുവരുത്തുന്ന ലിഖിത രേഖകൾ വാങ്ങി സൂക്ഷിക്കുന്നതും നന്നായിരിക്കും. കമ്പനി മാറിയതിന് ശേഷം വരുന്ന ആദ്യ ബില്ലിൽ നിയമവിരുദ്ധമായി ഫീസുകൾ ഒന്നും ചേർത്തിട്ടില്ലെന്ന് ഉറപ്പുവരുത്തുകയും വേണം.

നിയമവിരുദ്ധമായി ഫീസ് ഈടാക്കിയാൽ എന്തുചെയ്യണം?

ജൂൺ 12-ന് ശേഷം ഏതെങ്കിലും ടെലികോം കമ്പനി നിങ്ങളിൽ നിന്ന് ആക്ടിവേഷൻ അല്ലെങ്കിൽ പ്ലാൻ മാറ്റുന്നതിനുള്ള ഫീസ് ഈടാക്കിയാൽ ആദ്യം നിങ്ങളുടെ ടെലികോം കമ്പനിയുടെ കസ്റ്റമർ കെയറുമായി ബന്ധപ്പെട്ട് CRTC ടെലികോം റെഗുലേറ്ററി പോളിസി ചൂണ്ടിക്കാണിച്ച് തുക തിരികെ ആവശ്യപ്പെടാം. കമ്പനി തുക റീഫണ്ട് ചെയ്യാൻ തയ്യാറായില്ലെങ്കിൽ, സ്വതന്ത്ര അന്വേഷണ സംഘടനയായ CCTS (Commission for Complaints for Telecom-television Services) വഴി ഔദ്യോഗികമായി പരാതി നൽകാം. സിസിടിഎസ് വെബ്‌സൈറ്റ് വഴി വളരെ എളുപ്പത്തിൽ ഉപഭോക്താക്കൾക്ക് പരാതി സമർപ്പിക്കാവുന്നതാണ്.

New Canada Cellphone Plan Rule Effective June 12

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla