ബ്രിട്ടീഷ് കൊളംബിയ: ബ്രിട്ടീഷ് കൊളംബിയ പ്രവിശ്യയിലേക്ക് കുടിയേറാൻ ആഗ്രഹിക്കുന്നവർക്കായി പുതിയ ‘ഇൻ-ഡിമാൻഡ്’ തൊഴിൽ പട്ടിക പുറത്തിറക്കി. 2026 ഏപ്രിൽ മാസത്തെ പുതിയ അപ്ഡേറ്റ് പ്രകാരം, പ്രവിശ്യയുടെ വികസനത്തിന് അത്യാവശ്യമായ മൂന്ന് പ്രധാന മേഖലകളെ കേന്ദ്രീകരിച്ചായിരിക്കും ഇനി കുടിയേറ്റം. ‘Care, Build, and Innovate’ (പരിരക്ഷ, നിർമ്മാണം, നവീകരണം) എന്നീ വിഭാഗങ്ങളിലായാണ് പുതിയ മുൻഗണനാ പട്ടിക തയ്യാറാക്കിയിരിക്കുന്നത്.
ബ്രിട്ടീഷ് കൊളംബിയ പ്രവിശ്യയുടെ തൊഴിൽക്ഷാമം പരിഹരിക്കാൻ ലക്ഷ്യമിട്ടുള്ള ഈ മാറ്റങ്ങൾ ഉദ്യോഗാർത്ഥികൾക്കും വലിയ അവസരമാണ് നൽകുന്നത്. ആരോഗ്യമേഖല, വിദ്യാഭ്യാസം, ചൈൽഡ് കെയർ, വെറ്ററിനറി സേവനങ്ങൾ എന്നിവയുമായി ബന്ധപ്പെട്ട 36 തൊഴിലുകളെ ഇതിൽ ഉൾപ്പെടുത്തിയിട്ടുണ്ട്. ഡോക്ടർമാർ, നഴ്സുമാർ എന്നിവർക്ക് പുറമെ ലാബ് അസിസ്റ്റന്റുമാർക്കും സോഷ്യൽ വർക്കർമാർക്കും ഇതിൽ വലിയ അവസരമുണ്ട്. അതുപോലെ കൺസ്ട്രക്ഷൻ രംഗത്തെ വിദഗ്ധ തൊഴിലാളികൾക്കായി വെൽഡർമാർ, ഇലക്ട്രീഷ്യൻമാർ, പ്ലംബർമാർ, കാർപെന്റർമാർ എന്നിവർക്ക് സർട്ടിഫിക്കറ്റ് ഉണ്ടെങ്കിൽ വേഗത്തിൽ നോമിനേഷൻ ലഭിക്കും.
മെട്രോ വാൻകൂവറിന് പുറത്തുള്ള പ്രാദേശിക കമ്മ്യൂണിറ്റികളിൽ ജോലി ചെയ്യുന്നവർക്കായി 35 ശതമാനം നോമിനേഷനുകൾ മാറ്റിവെച്ചിരിക്കുന്നത് നഗരത്തിന് പുറത്ത് താമസം ആഗ്രഹിക്കുന്നവർക്ക് ഗുണകരമാകും. അതേസമയം എൻട്രി ലെവൽ, സെമി-സ്കിൽഡ് (ELSS) വിഭാഗം ഇപ്പോൾ ഔദ്യോഗികമായി അവസാനിപ്പിച്ചിട്ടുണ്ട്. കൺസ്ട്രക്ഷൻ ജോലികൾക്ക് അപേക്ഷിക്കുന്നവർക്ക് ‘SkilledTradesBC’ നൽകുന്ന സർട്ടിഫിക്കറ്റ് നിർബന്ധമാണ്. കൂടുതൽ വിവരങ്ങൾക്കും രജിസ്ട്രേഷനും WelcomeBC വെബ്സൈറ്റ് സന്ദർശിക്കാവുന്നതാണ്. കാനഡയിലെ കുറഞ്ഞുവരുന്ന ഫെഡറൽ അലോക്കേഷൻ കണക്കിലെടുത്ത്, മുൻഗണനാ പട്ടികയിലുള്ളവർ എത്രയും വേഗം അപേക്ഷിക്കുന്നത് ഗുണകരമാകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
New British Columbia In-Demand Jobs List For Immigration
