എഡ്മന്റൺ: ആൽബർട്ട പ്രവിശ്യയിൽ സെപ്റ്റംബർ മാസം മുതൽ വ്യാപകമായ പുതിയ നിയമങ്ങളും നയമാറ്റങ്ങളും നിലവിൽ വരുന്നു. 2026-27 വർഷത്തിന്റെ തുടക്കത്തിൽ ഭരണരംഗത്തും വിദ്യാഭ്യാസത്തിലും ആരോഗ്യമേഖലയിലും വലിയ മാറ്റങ്ങൾ ലക്ഷ്യമിട്ടാണ് ഭരണകൂടത്തിന്റെ ഈ നടപടി.
സെപ്റ്റംബർ 1 മുതൽ ഭൂരിഭാഗം മാറ്റങ്ങളും പ്രാബല്യത്തിൽ വന്നപ്പോൾ, സെപ്റ്റംബർ 15, 22, 30 തീയതികളിലായി കൂടുതൽ നിയമങ്ങൾ നടപ്പിലാകും. പൊതുജനങ്ങളെയും വിദ്യാർത്ഥികളെയും അധ്യാപകരെയും പ്രൊഫഷണലുകളെയും ഒരുപോലെ ബാധിക്കുന്ന പ്രധാനപ്പെട്ട 10 മാറ്റങ്ങൾ താഴെ പറയുന്നവയാണ്.
ഹെൽത്ത് കെയർ ഇൻഷുറൻസ് കവറേജിൽ മാറ്റം
ആൽബർട്ട ഹെൽത്ത് കെയർ ഇൻഷുറൻസ് പ്ലാനിൽ (AHCIP) മാറ്റങ്ങൾ വരുത്തി. തൊഴിലുടമകൾ വഴിയോ സ്വകാര്യ ഇൻഷുറൻസ് വഴിയോ നിലവിൽ ലഭ്യമാകുന്ന ആരോഗ്യ സേവനങ്ങൾ ഇനി പ്രൊവിൻഷ്യൽ പ്ലാനിൽ നിന്ന് ലഭിക്കില്ല. സ്വകാര്യ കവറേജ് ഉള്ളവർ അത് ആദ്യം ഉപയോഗപ്പെടുത്തണമെന്ന് സാരം. എന്നാൽ സ്വകാര്യ ഇൻഷുറൻസ് ഇല്ലാത്ത പൗരന്മാർക്ക് നിലവിലുള്ള സൗജന്യ പൊതുജനാരോഗ്യ സേവനങ്ങൾ മുൻപത്തെപ്പോലെ തന്നെ തുടർന്നും ലഭിക്കും.
സ്കൂളുകളിൽ രാഷ്ട്രീയ-ഐഡിയോളജിക്കൽ നിഷ്പക്ഷത
ക്ലാസ് മുറികളിൽ നിന്ന് രാഷ്ട്രീയവും ചില പ്രത്യേക പ്രത്യയശാസ്ത്ര നിലപാടുകളും ഒഴിവാക്കുന്നതിനുള്ള പുതിയ വിദ്യാഭ്യാസ നിയമം നിലവിൽ വന്നു. നിഷ്പക്ഷവും വൈവിധ്യമാർന്നതുമായ ചിന്താഗതികളെ പ്രോത്സാഹിപ്പിക്കുന്നതാവണം പ്രബോധനങ്ങൾ. സ്കൂൾ അധികൃതർ രാഷ്ട്രീയമോ സാമൂഹികമോ ആയ വിഷയങ്ങളിൽ പരസ്യ നിലപാടുകൾ എടുക്കാൻ പാടില്ല. അധ്യാപകരെ അവരുടെ വ്യക്തിപരമായ വിശ്വാസങ്ങൾക്ക് എതിരായ പ്രവർത്തനങ്ങളിൽ പങ്കെടുക്കാൻ നിർബന്ധിക്കരുത്. കൂടാതെ, സ്കൂൾ പരിസരങ്ങളിൽ അക്രമം നിരോധിച്ചുകൊണ്ടുള്ള പെരുമാറ്റച്ചട്ടങ്ങൾ ഡിസംബർ 1-നകം നടപ്പിലാക്കണം.
മാത്തമാറ്റിക്സ്, റീഡിംഗ് സ്ക്രീനിംഗ് നിർബന്ധമാക്കി
കിന്റർഗാർട്ടൻ മുതൽ ഗ്രേഡ് 3 വരെയുള്ള കുട്ടികൾക്ക് സാക്ഷരതയും സംഖ്യാശാസ്ത്ര പരിജ്ഞാനവും പരിശോധിക്കുന്നതിനുള്ള സ്ക്രീനിംഗ് നിർബന്ധമാക്കി. പഠനത്തിൽ പിന്നാക്കം നിൽക്കുന്ന കുട്ടികൾക്ക് പ്രത്യേക പിന്തുണ നൽകും. പരീക്ഷാ ഫലങ്ങൾ മാതാപിതാക്കളെ അറിയിക്കുകയും വിദ്യാഭ്യാസ മന്ത്രാലയത്തിന് കൈമാറുകയും വേണം.
- പ്രൊഫഷണലുകളുടെ വ്യക്തി സ്വാതന്ത്ര്യത്തിന് സംരക്ഷണം
വക്കീലന്മാർ, റിയൽ എസ്റ്റേറ്റ് ജീവനക്കാർ ഉൾപ്പെടെയുള്ള വിവിധ മേഖലകളിലെ ലൈസൻസ്ഡ് പ്രൊഫഷണലുകൾക്ക് ജോലി സമയത്തിന് ശേഷമുള്ള (Off-duty) വ്യക്തിപരമായ അഭിപ്രായപ്രകടനങ്ങളുടെ പേരിൽ നടപടി എടുക്കുന്നത് വിലക്കിക്കൊണ്ട് ‘റെഗുലേറ്റഡ് പ്രൊഫഷൻസ് ന്യൂട്രാലിറ്റി ആക്ട്’ നിലവിൽ വന്നു. എന്നാൽ ഗുരുതരമായ കുറ്റകൃത്യങ്ങൾ, ലൈംഗിക അതിക്രമങ്ങൾ, ഔദ്യോഗിക പദവി ദുരുപയോഗം ചെയ്യൽ എന്നിവയ്ക്ക് ഇളവുണ്ടാകില്ല. കൂടാതെ, പ്രൊഫഷണൽ ബോഡികൾ നിർബന്ധിത ഡൈവേഴ്സിറ്റി (DEI) ട്രെയിനിംഗുകൾ നൽകുന്നതിനും വിലക്കേർപ്പെടുത്തി.
അഭിഭാഷകർക്കെതിരെയുള്ള പരാതികളിൽ പുതിയ നിബന്ധന
അഭിഭാഷകർക്കെതിരെ നൽകുന്ന വ്യാജവും അനാവശ്യവുമായ പരാതികൾ പ്രാഥമിക ഘട്ടത്തിൽ തന്നെ തള്ളിക്കളയാൻ ലോ സൊസൈറ്റി ഓഫ് ആൽബർട്ടയ്ക്ക് അധികാരം നൽകുന്ന നിയമഭേദഗതി പ്രാബല്യത്തിൽ വന്നു. പരാതി തള്ളിയാൽ അപ്പീൽ നൽകുന്നത് ഇനി സ്വാഭാവിക അവകാശമായിരിക്കില്ല, അതിനായി പ്രത്യേക നടപടിക്രമങ്ങൾ പാലിക്കേണ്ടി വരും.
ലാൻഡ് ടൈറ്റിൽസ് ഓഫീസിൽ പുതിയ ഫീസ്
അഭിഭാഷകർ സമർപ്പിക്കുന്ന ലാൻഡ് രജിസ്ട്രേഷൻ രേഖകളിൽ തെറ്റുകളോ അപൂർണ്ണതയോ മൂലം തിരുത്തലിനായി തിരികെ അയക്കേണ്ടി വന്നാൽ (Notice of Deficiency), ഓരോ പുനഃപരിശോധനയ്ക്കും 25 ഡോളർ ഫീസ് ഈടാക്കും. ഡിജിറ്റൽ അപേക്ഷകളിലെ തെറ്റുകൾ കുറയ്ക്കാനും ബാക്ക്ലോഗ് ഒഴിവാക്കാനുമാണ് ഈ നടപടി.
പരിസ്ഥിതി പുനരുദ്ധാരണ അപേക്ഷകൾ പൂർണ്ണമായും ഡിജിറ്റൽ
മലിനീകരണ ലഘൂകരണവും ഭൂമി പുനരുദ്ധാരണവുമായി ബന്ധപ്പെട്ട ലിമിറ്റഡ്/സൈറ്റ് ബേസ്ഡ് റെമഡിയേഷൻ സർട്ടിഫിക്കറ്റ് അപേക്ഷകൾ ഇനി മുതൽ ‘DRAS’ (Digital Regulatory Assurance System) പോർട്ടൽ വഴി മാത്രമേ സ്വീകരിക്കൂ. ഇമെയിൽ, പേപ്പർ അപേക്ഷകൾ പൂർണ്ണമായും നിർത്തലാക്കി.
ഹൈക്കോടതികളിൽ ഡിജിറ്റൽ കോർട്ട് ഓർഡറുകൾ
കോർട്ട് ഓഫ് കിംഗ്സ് ബെഞ്ചിൽ സിവിൽ കേസുകളിലും ചേംബർ ഹിയറിംഗുകളിലും ഉത്തരവുകൾ സമർപ്പിക്കാൻ ഡിജിറ്റൽ രീതി നിർബന്ധമാക്കുന്നു. ഇതിനായി പി.ഡി.എഫ് (PDF) ഫയലുകൾ അപ്ലോഡ് ചെയ്യുന്ന രീതി സെപ്റ്റംബർ 15 മുതൽ സ്വീകരിക്കില്ല.
ഓഹരി വിപണിയിൽ ഇലക്ട്രോണിക് റിപ്പോർട്ടിംഗ്
സെക്യൂരിറ്റീസ് നിയമങ്ങളിലെ പുതിയ ഭേദഗതി അനുസരിച്ച് കമ്പനികൾക്ക് തങ്ങളുടെ വാർഷിക സാമ്പത്തിക റിപ്പോർട്ടുകളും മറ്റ് സുപ്രധാന വിവരങ്ങളും നിക്ഷേപകർക്ക് തപാൽ വഴി അയക്കുന്നതിന് പകരം വെബ്സൈറ്റിലൂടെയും ‘SEDAR+’ പോർട്ടലിലൂടെയും ലഭ്യമാക്കാം. എന്നാൽ ആവശ്യമുള്ള നിക്ഷേപകർക്ക് പേപ്പർ കോപ്പികൾ ആവശ്യപ്പെടാനുള്ള അവകാശമുണ്ടായിരിക്കും.
ഫിസിയോതെറാപ്പിസ്റ്റ് പ്രൊവിഷണൽ രജിസ്റ്റർ നിർത്തലാക്കുന്നു
കോളേജ് ഓഫ് ഫിസിയോതെറാപ്പിസ്റ്റ്സ് ഓഫ് ആൽബർട്ടയുടെ പ്രൊവിഷണൽ രജിസ്റ്റർ സെപ്റ്റംബർ 30 അർദ്ധരാത്രിയോടെ പൂർണ്ണമായി അവസാനിപ്പിക്കും. പ്രാക്ടിക്കൽ പരീക്ഷ പാസ്സാകാത്തവർക്ക് താൽക്കാലിക പ്രാക്ടീസ് അനുമതി നൽകിയിരുന്ന രീതിയാണിത്. ഇനി മുതൽ ആൽബർട്ടയിൽ പ്രാക്ടീസ് ചെയ്യാൻ കാനഡിയൻ ഫിസിയോതെറാപ്പി എക്സാമിനേഷൻ (CPE) പൂർണ്ണമായി പാസ്സായി ജനറൽ രജിസ്റ്ററിൽ അംഗമാകേണ്ടതുണ്ട്.
സെപ്റ്റംബർ മാസത്തിൽ പ്രഖ്യാപിച്ച ഈ മാറ്റങ്ങളിൽ പലതിന്റെയും പൂർണ്ണമായ നിർവ്വഹണം വരും മാസങ്ങളിലേക്ക് നീളുമെന്നതിനാൽ, ബന്ധപ്പെട്ട മേഖലകളിലുള്ളവർ ഔദ്യോഗിക നിർദ്ദേശങ്ങൾ കർശനമായി പാലിക്കണമെന്ന് അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
