കാൽഗറി: അടുത്ത വർഷം നഗരത്തിൽ പ്രോപ്പർട്ടി ടാക്സ് 20.2 ശതമാനം വരെ കൂടിയേക്കാമെന്ന സൂചനയുള്ള രഹസ്യ ബജറ്റ് രേഖകൾ പുറത്തുവിട്ട് കാൽഗറി കൗൺസിലർ ലാൻഡൺ ജോൺസ്റ്റൺ. ജൂലൈ 28-ന് നടന്ന രഹസ്യ യോഗത്തിലാണ് ഈ വിവരങ്ങൾ കൗൺസിൽ ചർച്ച ചെയ്തത്. സംഭവം വലിയ വിവാദമായതോടെയാണ്, സോഷ്യൽ മീഡിയ പ്ലാറ്റ്‌ഫോമായ എക്‌സിലൂടെ (X) താനാണ് ഇത് പുറത്തുവിട്ടതെന്ന് അദ്ദേഹം വ്യക്തമാക്കിയത്.
ജനങ്ങൾക്ക് കാര്യങ്ങൾ അറിയാൻ വേണ്ടിയെന്ന് വിശദീകരണം
നഗരത്തിലെ അനാവശ്യ ചെലവുകൾ ഒഴിവാക്കാനും നികുതി വർധനയെക്കുറിച്ച് ജനങ്ങൾക്ക് വ്യക്തമായ ധാരണ ഉണ്ടാക്കാനുമാണ് വിവരങ്ങൾ പുറത്തുവിട്ടതെന്ന് ലാൻഡൺ ജോൺസ്റ്റൺ പറഞ്ഞു. ജനങ്ങളിൽ നിന്ന് വിവരങ്ങൾ മറച്ചുവെക്കാൻ താല്പര്യമില്ലെന്നും, വീണ്ടും അവസരം കിട്ടിയാലും ഇതേ കാര്യമേ ചെയ്യൂ എന്നും അദ്ദേഹം കൂട്ടിചേർത്തു. പൊതുജന നന്മയ്ക്കാണ് ഇത് ചെയ്തതെന്നും, ഇതിന്റെ പേരിൽ തനിക്കെതിരെ നടപടിയെടുക്കാൻ മേയർ ശ്രമിക്കുന്നുണ്ടെന്നും അദ്ദേഹം ആരോപിച്ചു.
എന്നാൽ പുറത്തുവന്ന കണക്കുകൾ അന്തിമ തീരുമാനമല്ലെന്നും, ഔദ്യോഗിക ബജറ്റ് നിർദേശമല്ലെന്നും മേയർ ജെറോമി ഫാർക്കാസും നഗരസഭയും വ്യക്തമാക്കി. വിവിധ വകുപ്പുകൾ ആവശ്യപ്പെട്ട തുകയുടെ ഒരു ഏകദേശ കണക്ക് മാത്രമാണിതെന്നും, യഥാർത്ഥ ബജറ്റ് നിർദേശം നവംബറിലാണ് പുറത്തുവിടുകയെന്നും അധികൃതർ അറിയിച്ചു. നിയമപ്രകാരം രഹസ്യമായി സൂക്ഷിക്കേണ്ട കാര്യങ്ങൾ പുറത്തുവിട്ടത് നഗരത്തിന് സാമ്പത്തിക നഷ്ടമുണ്ടാക്കുമെന്നും മേയർ പറഞ്ഞു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
