കാൽഗറി: ആൽബർട്ടയിൽ ഹെപ്പറ്റൈറ്റിസ് രോഗ നിർണയത്തിലും ചികിത്സയിലും വരുത്തിയ പുതിയ മാറ്റങ്ങൾ മൂലം രോഗികളെ കണ്ടെത്താനും കരൾ വിദഗ്ധരെ കാണാനുള്ള കാത്തിരിപ്പ് സമയം കുറയ്ക്കാനും സാധിച്ചതായി ആരോഗ്യ വിദഗ്ധർ. പ്രവിശ്യയിലെ പുതിയ ചികിത്സാ മാർഗനിർദേശങ്ങൾ (ക്ലിനിക്കൽ പാത്ത്വേ) നിലവിൽ വന്നതോടെ, നേരത്തെ വിദഗ്ധ ഡോക്ടർമാരെ കാണാൻ വേണ്ടിയിരുന്ന ഒന്നര വർഷത്തെ കാത്തിരിപ്പ് സമയം വെറും ആറ് ആഴ്ചയായി കുറഞ്ഞു. പുതിയ കുടിയേറ്റക്കാർ കൂടുതലുള്ള പ്രദേശങ്ങളിൽ രോഗബാധ ഉയർന്ന തോതിൽ കണ്ടെത്തിയതിനെ തുടർന്നാണ് പ്രാദേശിക ക്ലിനിക്കുകളും ഗവേഷകരും ചേർന്ന് പരിശോധനാ സംവിധാനങ്ങൾ ഏകോപിപ്പിച്ചത്.
രോഗവ്യാപനവും പരിശോധനയിലെ മുന്നേറ്റവും
ഹെപ്പറ്റൈറ്റിസ് ബി, ഗുരുതരമായ ഹെപ്പറ്റൈറ്റിസ് ഡി എന്നിവ നേരത്തെ കണ്ടെത്തുന്നതിനായി രോഗബാധ കൂടുതലുള്ള മേഖലകൾ കേന്ദ്രീകരിച്ച് കാൽഗറി സർവകലാശാലയിലെ ഗവേഷകർ പ്രത്യേക മാപ് തയ്യാറാക്കിയിരുന്നു. ഹെപ്പറ്റൈറ്റിസ് ബി സ്ഥിരീകരിക്കുന്ന രോഗികൾക്ക് കൂടുതൽ അപകടകാരിയായ ഹെപ്പറ്റൈറ്റിസ് ഡി പരിശോധന കൂടി ലഭ്യമാക്കുന്ന രീതി പാത്ത്വേയിൽ ഉൾപ്പെടുത്തിയതോടെ പരിശോധനാ നിരക്കിൽ നാലിരട്ടി വർധനവുണ്ടായി. അടിയന്തരമായി വിദഗ്ധ ചികിത്സ ലഭ്യമാക്കുന്നതിലൂടെ രോഗികളിൽ കരൾ രോഗങ്ങൾ (സിറോസിസ്), കരൾ കാൻസർ എന്നിവ ഉണ്ടാകാനുള്ള സാധ്യത കുറയ്ക്കാൻ സാധിക്കുമെന്ന് വിദഗ്ധർ വ്യക്തമാക്കി.
Also Read: ആൽബർട്ടയിൽ കാര്യങ്ങൾ ഇനി പഴയപടിയല്ല! ഈ 10 പുതിയ നിയമങ്ങൾ അറിയാതെ പോകരുത്
വിദഗ്ധരുടെ വിലയിരുത്തലും വെല്ലുവിളികളും
ലക്ഷണങ്ങൾ പുറത്തുവരാൻ വൈകുന്നതിനാൽ ‘Silent disease’ എന്നറിയപ്പെടുന്ന ഹെപ്പറ്റൈറ്റിസിനെക്കുറിച്ച് പൊതുജനങ്ങൾക്കിടയിലുള്ള അറിവില്ലായ്മ പ്രധാന വെല്ലുവിളിയായി തുടരുന്നതായി കാൽഗറി റഫ്യൂജി ഹെൽത്ത് ക്ലിനിക്കിലെ ഡോ. റേച്ചൽ തലാവ്ലിക്കറും ഡോ. അബ്ദുൽ-അസീസ് ഷഹീനും ചൂണ്ടിക്കാട്ടി. രോഗബാധയുമായി ബന്ധപ്പെട്ട ഭയം മൂലവും മരുന്നുകളുടെ ഉയർന്ന ചെലവ് കാരണവും പലരും പരിശോധനയ്ക്ക് മുന്നോട്ട് വരുന്നില്ല. അതേസമയം, ആവശ്യക്കാർക്ക് സർക്കാർ പിന്തുണയുള്ള പദ്ധതികൾ വഴി മരുന്ന് സഹായം ലഭ്യമാക്കുന്നുണ്ടെന്നും കൂടുതൽ രോഗികളെ കണ്ടെത്താനുള്ള നിരീക്ഷണം തുടർന്നു വരികയാണെന്നും ആൽബർട്ട പ്രാഥമികാരോഗ്യ മന്ത്രാലയം അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
After a year-and-a-half wait, the duration is now down to six weeks; a new treatment method in Alberta marks a major breakthrough in hepatitis care.
