ഹാമിൽട്ടൺ: അറ്റ്ലാന്റിക് സമുദ്രത്തിൽ കാണാതായ മെഡിക്കൽ ട്രാൻസ്പോർട്ട് വിമാനത്തിൽ ഉണ്ടായിരുന്ന നാല് കനേഡിയൻ പൗരന്മാരുടെ വിവരങ്ങൾ യുഎസ് കോസ്റ്റ് ഗാർഡ് പുറത്തുവിട്ടു. ഒന്റാറിയോയിൽ നിന്നുള്ള ലാറ്റിറ്റ്യൂഡ് എയർ ആംബുലൻസ് പ്രവർത്തിപ്പിച്ചിരുന്ന ഗൾഫ്സ്ട്രീം G100 വിമാനമാണ് അപകടത്തിൽപ്പെട്ടത്. ഫിലിപ്പ് ഗ്രിഗറി ചൈൽഡർഹോസ്, തോമസ് ഹെൻറി ഫാർക്വാർ, സാറാ ജെയ്ൻ പാറ്റൺ, ജോലീൻ ബെത്ത് വെയർ എന്നിവരാണ് വിമാനത്തിലുണ്ടായിരുന്ന കനേഡിയൻ സംഘാംഗങ്ങൾ.
ശനിയാഴ്ച പുലർച്ചെ ബെർമുഡയിൽ നിന്ന് യുഎസിലെ ബോസ്റ്റണിലേക്ക് പുറപ്പെട്ട വിമാനമാണ് അറ്റ്ലാന്റിക് സമുദ്രത്തിന് മുകളിൽ വെച്ച് കാണാതായത്. നാല് കനേഡിയൻ ക്രൂ അംഗങ്ങൾക്ക് പുറമെ മെർലിൻ ലാവോൺ ബീൻ (66), മകൻ സെർജിയോ വെയ്ൻ ലോട്ടിമോർ (41) എന്നീ രണ്ട് ബെർമുഡ സ്വദേശികളും യാത്രക്കാരായി വിമാനത്തിലുണ്ടായിരുന്നു. വിമാനവുമായുള്ള റഡാർ ബന്ധം പെട്ടെന്ന് വിച്ഛേദിക്കപ്പെടുകയായിരുന്നുവെന്ന് അധികൃതർ വ്യക്തമാക്കി.
നാന്റക്കെറ്റ് തീരത്ത് ഏകദേശം 11,500 ചതുരശ്ര കിലോമീറ്റർ വിസ്തൃതിയിൽ യുഎസ് കോസ്റ്റ് ഗാർഡും നാഷണൽ ഗാർഡും സംയുക്തമായി വൻ തിരച്ചിൽ നടത്തി. ഹെലികോപ്റ്ററുകളും കപ്പലുകളും ഉപയോഗിച്ച് നടത്തിയ പരിശോധനയിൽ വിമാനത്തിന്റെ അവശിഷ്ടങ്ങൾ കടലിൽ നിന്ന് കണ്ടെത്തി. തുടർന്ന് രക്ഷാപ്രവർത്തന ഘട്ടം അവസാനിപ്പിച്ചതായും വിമാനത്തിലുണ്ടായിരുന്ന ആറുപേരും മരണപ്പെട്ടിരിക്കാനാണ് സാധ്യതയെന്നും ലാറ്റിറ്റ്യൂഡ് കമ്പനി അറിയിച്ചു.
അപകടത്തിൽ മരിച്ചവരുടെ കുടുംബാംഗങ്ങളെയും സുഹൃത്തുക്കളെയും അനുശോചനം അറിയിക്കുന്നതായി കോസ്റ്റ് ഗാർഡ് നോർത്ത് ഈസ്റ്റ് ഡിസ്ട്രിക്റ്റ് കമാൻഡർ അറിയിച്ചു. കനേഡിയൻ സംഘം നൽകിയ സേവനങ്ങളെ ബെർമുഡ പ്രീമിയറും ആരോഗ്യ മന്ത്രിയും സ്മരിച്ചു. ദുരന്തത്തിൽ കടുത്ത ദുഃഖം രേഖപ്പെടുത്തുന്നതായി ഹാമിൽട്ടൺ മേയർ ആൻഡ്രിയ ഹോർവാത്തും പ്രസ്താവനയിൽ വ്യക്തമാക്കി.
വിമാനം കാനഡയിൽ രജിസ്റ്റർ ചെയ്ത ഒന്നായതിനാൽ കാനഡ ട്രാൻസ്പോർട്ടേഷൻ സേഫ്റ്റി ബോർഡാണ് (TSBC) അന്വേഷണത്തിന് നേതൃത്വം നൽകുന്നത്. വിമാനത്തിന്റെ ഇലക്ട്രിക്കൽ സിസ്റ്റത്തിലുണ്ടായ സാങ്കേതിക തകരാറാകാം അപകടത്തിന് കാരണമെന്നാണ് പ്രാഥമിക നിഗമനം. യുഎസ് നാഷണൽ ട്രാൻസ്പോർട്ടേഷൻ സേഫ്റ്റി ബോർഡുമായി സഹകരിച്ചാണ് കനേഡിയൻ സംഘം അന്വേഷണം മുന്നോട്ട് കൊണ്ടുപോകുന്നത്.
Also Read: പ്രോട്ടീൻ പൗഡർ വില കുതിച്ചുയരുന്നു; ജിം പ്രേമികൾക്ക് തിരിച്ചടിയായി യു.എസ്-കാനഡ വ്യാപാര തർക്കം
സംഭവം നടന്ന കടൽ പ്രദേശത്ത് ഏകദേശം 80 മുതൽ 90 അടി വരെ ആഴമുണ്ട്. വിമാനത്തിന്റെ നിർണായക വിവരങ്ങൾ അടങ്ങിയ ബ്ലാക്ക് ബോക്സ് ഇതുവരെ കണ്ടെത്താൻ സാധിച്ചിട്ടില്ല. കടലിന്റെ അടിത്തട്ടിൽ പരിശോധന നടത്താൻ ശേഷിയുള്ള സോണാർ ഉപകരണങ്ങൾ ഘടിപ്പിച്ച പ്രത്യേക കപ്പലുകൾ ഉപയോഗിച്ച് തെരച്ചിൽ തുടരുകയാണെന്ന് അധികൃതർ അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
