മോൺട്രിയൽ: മോൺട്രിയലിൽ മുനിസിപ്പൽ നികുതികൾ 2026-ൽ 3.8 ശതമാനം വർധിപ്പിക്കാൻ നഗരസഭ തീരുമാനിച്ചു. ഇതനുസരിച്ച് ശരാശരി ഒരു വീടിന് ഏകദേശം 188 ഡോളറിൻ്റെ വർധനവുണ്ടാകും. പുതിയ മേയർ സോറായ മാർട്ടിനെസ് ഫെറാഡ തിങ്കളാഴ്ച അവതരിപ്പിച്ച 7.67 ബില്യൺ ഡോളറിൻ്റെ സന്തുലിത ബജറ്റിലാണ് നികുതി വർധന പ്രഖ്യാപിച്ചത്. മുൻവർഷത്തെ അപേക്ഷിച്ച് ബജറ്റ് വിഹിതത്തിൽ 389 മില്യൺ ഡോളറിൻ്റെ വർധനവുണ്ട്. കൂടാതെ 25.9 ബില്യൺ ഡോളറിൻ്റെ പത്തു വർഷത്തെ മൂലധന ചെലവ് പദ്ധതിയും നഗരസഭ അവതരിപ്പിച്ചു.
പൗരന്മാർക്ക് നൽകുന്ന സേവനങ്ങളിൽ ശ്രദ്ധ കേന്ദ്രീകരിക്കുന്നതിനായി ചെലവുകളുടെ മുൻഗണനാക്രമത്തിൽ വലിയ മാറ്റം വരുത്തിയതായി മേയർ മാർട്ടിനെസ് ഫെറാഡ അറിയിച്ചു. പണപ്പെരുപ്പ നിരക്കിന് അനുസൃതമായാണ് നികുതി വർധന പരിമിതപ്പെടുത്തിയതെന്നും നഗരസഭയുടെ പ്രവർത്തനക്ഷമത വർധിപ്പിക്കുന്നതിനുള്ള ആദ്യ ഘട്ടമാണിതെന്നും ഭരണകൂടം വ്യക്തമാക്കി. പാർപ്പിട കെട്ടിടങ്ങൾക്ക് ശരാശരി 3.8 ശതമാനവും വാണിജ്യ ആവശ്യങ്ങൾക്കുള്ള കെട്ടിടങ്ങൾക്ക് 3.4 ശതമാനവുമാണ് നികുതി വർധന.
ഭവനരഹിതരുടെ ക്ഷേമത്തിനായി ബജറ്റിൽ വൻതുക വകയിരുത്തിയിട്ടുണ്ട്. ഈ മേഖലയിലെ സേവനങ്ങൾക്കായി 29.9 മില്യൺ ഡോളറാണ് നീക്കിവെച്ചത്. അടിയന്തര അഭയകേന്ദ്രങ്ങൾ ഒരുക്കുന്നതിനായി കെട്ടിടങ്ങൾ ഏറ്റെടുക്കുന്നതിനും നവീകരിക്കുന്നതിനുമായി 2035 വരെ 100 മില്യൺ ഡോളറും സാമൂഹിക പാർപ്പിട പദ്ധതികൾക്കായി അടുത്ത 10 വർഷത്തേക്ക് 578.7 മില്യൺ ഡോളറും ബജറ്റിൽ വിഭാവനം ചെയ്യുന്നു. കൂടാതെ ദാരിദ്ര്യ നിർമ്മാർജ്ജനത്തിനായി 11 മില്യൺ ഡോളറും വകയിരുത്തിയിട്ടുണ്ട്.
സ്കൂൾ പരിസരങ്ങളിലെ സുരക്ഷ വർധിപ്പിക്കുന്നതിനായി 17.4 മില്യൺ ഡോളറും അക്രമങ്ങൾ തടയുന്നതിനായി 15.8 മില്യൺ ഡോളറും ചെലവഴിക്കും. റോഡ് പശ്ചാത്തല സൗകര്യങ്ങൾക്കായി 6.7 ബില്യൺ ഡോളറും ജലവിതരണ തന്ത്രങ്ങൾക്കായി 38 മില്യൺ ഡോളറും ബജറ്റ് നീക്കിവെക്കുന്നു. തിരഞ്ഞെടുപ്പ് വാഗ്ദാനമനുസരിച്ച് 1,000 തസ്തികകൾ വെട്ടിക്കുറയ്ക്കുമെന്നും ഇതിലൂടെ 78.6 മില്യൺ ഡോളർ ലാഭിക്കാനാകുമെന്നും മേയർ വ്യക്തമാക്കി.
അതേസമയം, നികുതി വർധനവിനെതിരെ കനേഡിയൻ ടാക്സ് പയേഴ്സ് ഫെഡറേഷൻ രംഗത്തെത്തി. അവശ്യസാധനങ്ങളുടെ വിലവർധനവിൽ ബുദ്ധിമുട്ടുന്ന ജനങ്ങൾക്ക് പുതിയ നികുതിഭാരം താങ്ങാനാവില്ലെന്നും ഭരണകൂടം ജനങ്ങളെ വഞ്ചിച്ചതായും ഫെഡറേഷൻ പ്രതിനിധി നിക്കോളാസ് ഗഗ്നൺ ആരോപിച്ചു. തസ്തികകൾ വെട്ടിക്കുറയ്ക്കുമെന്ന വാഗ്ദാനം പാലിക്കുന്നതിൽ നഗരസഭ പരാജയപ്പെട്ടതായി രാഷ്ട്രീയ നിരീക്ഷക ജസ്റ്റിൻ മക്കിൻ്റയറും വിലയിരുത്തി.
കാനഡയിലെ ഏറ്റവും പുതിയ വാർത്തകൾക്കായി:
https://chat.whatsapp.com/Ghtm5bIjsVN8SItyDlaj3Q?mode=wwt
Montreal Mayor Soria Martinez Ferrada’s first budget: 3.8 percent increase in municipal taxes
