മോൺട്രിയൽ: ക്യുബെക്ക് സിറ്റിയിൽ സ്ഥിതി ചെയ്യുന്ന ചരിത്രപ്രസിദ്ധമായ ‘എഗ്ലീസ് സെന്റ്-ജീൻ-ബാപ്റ്റിസ്റ്റ്’ പള്ളിയെ കൾച്ചറൽ, കമ്മ്യൂണിറ്റി, ടൂറിസം കേന്ദ്രമാക്കി മാറ്റാൻ കനേഡിയൻ സർക്കാർ തീരുമാനിച്ചു. ഇതിനായി ക്വാർട്ടർ മില്യൺ ഡോളറിന്റെ സാമ്പത്തിക സഹായമാണ് ഫെഡറൽ സർക്കാർ പ്രഖ്യാപിച്ചിരിക്കുന്നത്. ഉപേക്ഷിക്കപ്പെട്ട നിലയിലുള്ള ഈ പുരാതന കെട്ടിടത്തിന് പുതുജീവൻ നൽകാനാണ് പുതിയ പദ്ധതിയിലൂടെ ലക്ഷ്യമിടുന്നത്.
1880-കളിൽ നിർമ്മിച്ച ഈ പള്ളി ഇടവകക്കാരുടെ എണ്ണത്തിൽ ഉണ്ടായ വലിയ കുറവ് മൂലമാണ് പ്രതിസന്ധിയിലായത്. പരിപാലനച്ചെലവുകൾ താങ്ങാൻ കഴിയാതെ വന്നതോടെ 2015-ൽ ആരാധന പൂർണ്ണമായി അവസാനിപ്പിച്ചു. പിന്നീട് ഒരു ദശാബ്ദത്തോളം ഉപേക്ഷിക്കപ്പെട്ട നിലയിൽ കിടന്ന കെട്ടിടം 2024-ലാണ് ക്യുബെക്ക് നഗരസഭ 1,75,000 ഡോളറിന് വിലയ്ക്കു വാങ്ങിയത്.
‘ഗ്രീൻ ആൻഡ് ഇൻക്ലൂസീവ് കമ്മ്യൂണിറ്റി ബിൽഡിംഗ്സ്’ പ്രോഗ്രാമിന്റെ ഭാഗമായാണ് പുതിയ ധനസഹായം അനുവദിച്ചിരിക്കുന്നത്. കെട്ടിടത്തിന്റെ അടിത്തറ, വാതിലുകൾ, ജനലുകൾ, ബേസ്മെന്റ് എന്നിവയുടെ അറ്റകുറ്റപ്പണികൾ ഈ പദ്ധതിയിൽ ഉൾപ്പെടുന്നു. കൂടാതെ പള്ളിയിലെ പഴക്കമുള്ള ഇലക്ട്രോ മെക്കാനിക്കൽ സംവിധാനങ്ങൾ പൂർണ്ണമായും പുതിയ സാങ്കേതികവിദ്യയിലേക്ക് മാറ്റുകയും ചെയ്യും.
നവീകരണം പൂർത്തിയാകുന്നതോടെ കെട്ടിടം കല, പൈതൃകം, ടൂറിസം, ജനകീയ പരിപാടികൾ എന്നിവയുടെ കേന്ദ്രമായി മാറും. എന്നാൽ ഇവിടെ വീണ്ടും ആരാധന നടത്താൻ ഉദ്ദേശിക്കുന്നില്ലെന്ന് അധികൃതർ വ്യക്തമാക്കി. പ്രദേശവാസികളുടെയും സാംസ്കാരിക കൂട്ടായ്മകളുടെയും ആവശ്യങ്ങൾ നിറവേറ്റുന്ന ഒരു പ്രധാന ഇടമായി ഈ ചരിത്ര സ്മാരകം ഇനി പ്രവർത്തിക്കും.
Also Read: ബിസിനസ് ഇനി കൂടുതൽ എളുപ്പം; ഡിജിറ്റൽ വ്യാപാര കരാറിന് കൈകോർത്ത് കാനഡയും യൂറോപ്യൻ യൂണിയനും
സഭാംഗങ്ങളുടെ കുറവും ഉയർന്ന പരിപാലനച്ചെലവും കാരണം ചരിത്രപരമായ പള്ളികൾ അടച്ചുപൂട്ടേണ്ടി വരുന്ന സാഹചര്യം കാനഡയിൽ മാത്രമല്ല ഉള്ളത്. ബ്രിട്ടനിലും സമാനമായ പ്രതിസന്ധി രൂക്ഷമാണ്. ഉദാഹരണത്തിന് 800 വർഷം പഴക്കമുള്ള ബ്രെച്ചിൻ കത്തീഡ്രലിന്റെ നിയന്ത്രണം ഒരു പ്രാദേശിക കമ്മ്യൂണിറ്റി ഗ്രൂപ്പിന് കൈമാറാൻ ഓഗസ്റ്റിൽ ചർച്ച് ഓഫ് സ്കോട്ട്ലൻഡ് തീരുമാനിച്ചിരുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
