ന്യൂഡൽഹി: മഹാ കുംഭമേളയിലൂടെ ശ്രദ്ധേയയായ മോണാലിസയെ കാണാനില്ലെന്ന് അറിയിച്ച് ഭർത്താവ് ഫർമാൻ വീഡിയോ പുറത്തുവിട്ടു. യുവതി ഒളിച്ചോടിയതാണെന്ന ഫർമാന്റെ വാദങ്ങൾ തള്ളിയ കുടുംബം, ഇതിന് പിന്നിൽ ആസൂത്രിതമായ ഗൂഢാലോചനയുണ്ടെന്ന് ആരോപിച്ചു.
അജ്മീറിലും പുഷ്കറിലുമാണ് താനെന്നും മോണാലിസയെ കണ്ടെത്താൻ ജോധ്പൂരിലേക്ക് പോകുകയാണെന്നും വ്യക്തമാക്കുന്ന വീഡിയോയാണ് ഫർമാൻ സോഷ്യൽ മീഡിയയിൽ പങ്കുവെച്ചത്. എന്നാൽ ഈ വീഡിയോയുടെ ആധികാരികത ഔദ്യോഗികമായി സ്ഥിരീകരിച്ചിട്ടില്ല.
മോണാലിസയുടെ തിരോധാനത്തിന് ഉത്തരവാദി ഫർമാനാണെന്ന് പെൺകുട്ടിയുടെ അമ്മ ലതാഭായ് ആരോപിച്ചു. രണ്ടാഴ്ച മുമ്പ് നടന്ന സംഭാഷണത്തിന് ശേഷം മകളുമായി സംസാരിക്കാൻ ഫർമാൻ അനുവദിച്ചിട്ടില്ലെന്നും, ഫോൺ ബലമായി തട്ടിപ്പറിച്ചതായും കുടുംബം വെളിപ്പെടുത്തി. സംഭവത്തിന് പിന്നാലെ മഹേശ്വർ നഗരത്തിൽ വലിയ പ്രതിഷേധവും ആശങ്കയും നിലനിൽക്കുകയാണ്.
ദേശീയ മനുഷ്യാവകാശ കമ്മീഷന്റെയും പട്ടികവർഗ കമ്മീഷന്റെയും ഇടപെടലിനെത്തുടർന്ന് മോണാലിസയുടെ യഥാർത്ഥ പ്രായം നേരത്തെ പുറത്തുവന്നിരുന്നു. ഇതിന്റെ അടിസ്ഥാനത്തിൽ ഫർമാനെതിരെ നിലവിൽ പോക്സോ നിയമപ്രകാരം കേസെടുത്തിട്ടുണ്ട്. കേസിൽ വ്യാജ സർട്ടിഫിക്കറ്റ് നൽകിയ മെഡിക്കൽ ഓഫീസറെ കഴിഞ്ഞ ദിവസം സ്ഥലം മാറ്റിയിരുന്നു.
അതേസമയം, ഫർമാനെതിരെയുള്ള പുതിയ പരാതികളിൽ പ്രതികരിക്കാൻ മഹേശ്വർ പോലീസ് തയ്യാറായിട്ടില്ല. ഉത്തർപ്രദേശ്, മധ്യപ്രദേശ്, കേരളം എന്നീ സംസ്ഥാനങ്ങളിൽ വലിയ ചർച്ചയായ കേസിൽ അന്വേഷണം പുരോഗമിക്കുകയാണ്. അപ്രതീക്ഷിതമായ ഈ തിരോധാനത്തിൽ ദുരൂഹതയുണ്ടെന്ന ആരോപണത്തിൽ ഉറച്ചുനിൽക്കുകയാണ് മോണാലിസയുടെ പിതാവ് ജയ്സിംഗ് ഭോസാലെയും കുടുംബവും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Monalisa absconded: Husband comes forward with video, family alleges conspiracy behind it
