മിനസോട്ടയിൽ ഖനന നിരോധനം പിൻവലിക്കുന്നു; കാനഡയിലെ ജലസ്രോതസ്സുകൾ മലിനീകരണ ഭീഷണിയിൽ

മിനസോട്ട: മിനസോട്ടയിലെ ബൗണ്ടറി വാട്ടേഴ്സ് മേഖലയിൽ നിലവിലുണ്ടായിരുന്ന ഖനന നിരോധനം നീക്കാനുള്ള നീക്കം കാനഡയിലെയും അമേരിക്കയിലെയും പരിസ്ഥിതി പ്രവർത്തകർക്കിടയിൽ വലിയ ആശങ്കയുണ്ടാക്കുന്നു. ബൈഡൻ ഭരണകൂടം ഏർപ്പെടുത്തിയിരുന്ന നിരോധനം നീക്കുന്നതിനുള്ള പ്രമേയം കഴിഞ്ഞ ആഴ്ച യുഎസ് സെനറ്റ് പാസാക്കി. പ്രസിഡന്റ് ഡൊണാൾഡ് ട്രംപ് പ്രമേയത്തിൽ ഒപ്പുവെക്കുന്നതോടെ ചിലി ആസ്ഥാനമായുള്ള അന്റോഫാഗസ്റ്റ മിനറൽസിന്റെ അനുബന്ധ കമ്പനിക്ക് ഈ മേഖലയിൽ ചെമ്പ്, നിക്കൽ തുടങ്ങിയ ലോഹങ്ങൾ ഖനനം ചെയ്യാൻ അനുമതി ലഭിക്കും. ഇത് വടക്കുപടിഞ്ഞാറൻ ഒന്റാറിയോയിലെ റെയ്‌നി ലേക്ക്, ക്വെറ്റിക്കോ പ്രൊവിൻഷ്യൽ പാർക്ക്, ലേക്ക് സുപ്പീരിയർ നീർത്തടം എന്നിവയെ ബാധിക്കുമെന്നാണ് ‘ഫ്രണ്ട്സ് ഓഫ് ദി ബൗണ്ടറി വാട്ടേഴ്സ് വൈൽഡർനസ്’ എന്ന സംഘടനയുടെ വിലയിരുത്തൽ.

നിർദ്ദിഷ്ട ചെമ്പ്-സൾഫൈഡ് ഖനനം വലിയ അളവിൽ സൾഫ്യൂറിക് ആസിഡ് ഉൽപ്പാദിപ്പിക്കുമെന്നും ഇത് നിയന്ത്രിക്കുക പ്രായോഗികമായി അസാധ്യമാണെന്നും പരിസ്ഥിതി പ്രവർത്തകൻ പീറ്റ് മാർഷൽ വ്യക്തമാക്കി. ബാറ്ററികളിൽ ഉപയോഗിക്കുന്ന ആസിഡിന് സമാനമായ രാസഗുണമുള്ള ഈ ആസിഡ് അതിർത്തി കടന്ന് കാനഡയിലെ ജലസ്രോതസ്സുകളിലേക്ക് ഒഴുകിയെത്താൻ സാധ്യതയുണ്ടെന്ന് അദ്ദേഹം അറിയിച്ചു. 4,450 ചതുരശ്ര കിലോമീറ്റർ വിസ്തൃതിയുള്ള ഈ ഇക്കോസിസ്റ്റം 240 കിലോമീറ്ററോളം കനേഡിയൻ അതിർത്തിയുമായി ചേർന്ന് കിടക്കുന്ന ഒന്നാണ്. മലിനീകരണം പ്രാദേശിക സമ്പദ്‌വ്യവസ്ഥയെയും പരിസ്ഥിതിയെയും ദീർഘകാലാടിസ്ഥാനത്തിൽ ദോഷകരമായി ബാധിക്കുമെന്നും അദ്ദേഹം ചൂണ്ടിക്കാട്ടി.

ഖനനത്തിലൂടെയുണ്ടാകുന്ന മലിനീകരണം കാനഡയിലെ വടക്കുപടിഞ്ഞാറൻ ഒന്റാറിയോയിലെ ജനങ്ങളുടെ ആരോഗ്യത്തിന് വലിയ ഭീഷണിയാണെന്ന് തണ്ടർ ബേ-റെയ്‌നി റിവർ എംപി മാർക്കസ് പൗലോവ്സ്കി പറഞ്ഞു. പ്രധാനമായും മത്സ്യബന്ധനത്തെ ഉപജീവനത്തിനായി ആശ്രയിക്കുന്ന തദ്ദേശീയ സമൂഹങ്ങളെ ഇത് സാമ്പത്തികമായും ബാധിക്കും. ഇരുരാജ്യങ്ങളും തമ്മിലുള്ള ‘ബൗണ്ടറി വാട്ടേഴ്സ് കരാറിന്’ വിരുദ്ധമാണ് ഈ നീക്കമെന്ന് അദ്ദേഹം അഭിപ്രായപ്പെട്ടു. എന്നാൽ പുതിയ അമേരിക്കൻ ഭരണകൂടം ഈ കരാറുകൾ എത്രത്തോളം പാലിക്കുമെന്ന കാര്യത്തിൽ വ്യക്തതയില്ലെന്നും അദ്ദേഹം കൂട്ടിച്ചേർത്തു.

ഖനന നീക്കം തദ്ദേശീയ ജനതയുടെ ജീവിതത്തിനും ജലവിഭവങ്ങൾക്കും പൈതൃക ഭൂമിക്കും ഭീഷണിയാണെന്ന് ഗകിജിവാണോങ് അനിഷിനാബെ നേഷൻ ചീഫ് കാരി അറ്ററ്റൈസ്-നോർവീജിയൻ അറിയിച്ചു. ഈ സാഹചര്യത്തിൽ തങ്ങളുടെ അവകാശങ്ങളും പരമാധികാരവും സംരക്ഷിക്കുന്നതിനായി ശക്തമായ നിലപാടുകൾ സ്വീകരിക്കുമെന്ന് അവർ വ്യക്തമാക്കി. ഖനനം തടയുന്നതിനായി മിനസോട്ടയിലെ സംസ്ഥാന ഭരണാധികാരികൾ ഇടപെടണമെന്നും രാഷ്ട്രീയമായ സമ്മർദ്ദം ചെലുത്തണമെന്നുമാണ് പരിസ്ഥിതി സംഘടനകളുടെ ആവശ്യം.

Minnesota lifts mining ban; Canada’s water resources at risk of contamination

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt