മാനിറ്റോബ: മാനിറ്റോബയിൽ സർക്കാർ ഉടൻ തുറക്കാനിരിക്കുന്ന സുരക്ഷിത ലഹരി ഉപയോഗ കേന്ദ്രത്തെ (Supervised Drug Consumption Site) ചൊല്ലി ഭരണ-പ്രതിപക്ഷ തർക്കം രൂക്ഷമാകുന്നു. വിന്നിപെഗിൽ ആരംഭിക്കുന്ന ഈ കേന്ദ്രത്തിൽ പ്രായപൂർത്തിയാകാത്ത കുട്ടികൾക്കും പ്രവേശനം ലഭിച്ചേക്കാമെന്ന ആരോപണവുമായി പ്രതിപക്ഷമായ പ്രോഗ്രസീവ് കൺസർവേറ്റീവ്സ് രംഗത്തെത്തിയതാണ് പുതിയ വിവാദങ്ങൾക്ക് വഴിതെളിച്ചത്. തിരിച്ചറിയൽ രേഖകൾ ഇല്ലാത്തവർക്കും ലഹരിക്ക് അടിപ്പെട്ടതിന്റെ ലക്ഷണങ്ങൾ കാണിക്കുന്നവർക്കും കേന്ദ്രത്തിൽ പ്രവേശനം നൽകിയേക്കാമെന്ന മുൻപത്തെ ചില നിർദ്ദേശങ്ങളാണ് ഇപ്പോൾ ചർച്ചയാകുന്നത്.
എന്നാൽ ഈ ആരോപണങ്ങളെ ശക്തമായി നിഷേധിച്ചുകൊണ്ട് അഡിക്ഷൻ മിനിസ്റ്റർ ബെർണാഡെറ്റ് സ്മിത്ത് രംഗത്തെത്തി. പ്രായപൂർത്തിയാകാത്ത കുട്ടികളെ ഒരു കാരണവശാലും ഈ കേന്ദ്രത്തിൽ ലഹരി ഉപയോഗിക്കാൻ അനുവദിക്കില്ലെന്നും അത്തരം സാഹചര്യങ്ങളിൽ കൃത്യമായ പരിശോധനകൾ നടത്താൻ ജീവനക്കാർക്ക് പരിശീലനം നൽകിയിട്ടുണ്ടെന്നും അവർ വ്യക്തമാക്കി. മുപ്പത് വർഷത്തിലേറെയായി ഈ മേഖലയിൽ പ്രവർത്തിക്കുന്ന പരിചയസമ്പന്നരായ ഉദ്യോഗസ്ഥരാണ് കേന്ദ്രത്തിന്റെ ചുമതല വഹിക്കുന്നത്. പ്രായത്തിന്റെ കാര്യത്തിൽ സംശയം തോന്നുന്നവരെ ലഹരി ഉപയോഗിക്കാൻ അനുവദിക്കുന്നതിന് പകരം അവർക്ക് ആവശ്യമായ മറ്റ് പുനരധിവാസ സേവനങ്ങളിലേക്ക് തിരിച്ചുവിടുകയാണ് ചെയ്യുകയെന്നും മന്ത്രി അറിയിച്ചു.
നഗരമധ്യത്തിൽ ജനവാസമേഖലയോട് ചേർന്ന് ഇത്തരമൊരു കേന്ദ്രം വരുന്നത് വലിയ സുരക്ഷാ ഭീഷണിയുണ്ടാക്കുമെന്നാണ് പ്രതിപക്ഷത്തിന്റെ വാദം. ലഹരി വിമുക്തമാക്കാനുള്ള ചികിത്സാ കേന്ദ്രങ്ങൾ തുടങ്ങുന്നതിന് പകരം ലഹരി ഉപയോഗിക്കാൻ സ്ഥലം സൗകര്യപ്പെടുത്തി നൽകുന്നത് തെറ്റായ സന്ദേശമാണ് നൽകുന്നതെന്ന് പ്രതിപക്ഷ നേതാവ് ഓബി ഖാൻ കുറ്റപ്പെടുത്തി. എന്നാൽ നഗരത്തിൽ വർദ്ധിച്ചുവരുന്ന ലഹരി മരണങ്ങൾ കുറയ്ക്കാനും പൊതുസ്ഥലങ്ങളിലെ ലഹരി ഉപയോഗം നിയന്ത്രിക്കാനുമാണ് ഇത്തരമൊരു കേന്ദ്രം തുറക്കുന്നതെന്നാണ് സർക്കാർ നിലപാട്. ഈ വിഷയത്തിൽ രാഷ്ട്രീയ പോര് മുറുകുന്നതിനിടെ വരും ആഴ്ചകളിൽ തന്നെ കേന്ദ്രം പ്രവർത്തനമാരംഭിക്കുമെന്നാണ് കരുതുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Manitoba Tories say minors may have access to planned drug consumption site
