വിന്നിപെഗ്: മാനിറ്റോബയിൽ ജനജീവിതം സ്തംഭിപ്പിച്ച് വീണ്ടും അതിശക്തമായ പ്രളയം. തിങ്കളാഴ്ച വൈകുന്നേരത്തോടെ ആരംഭിച്ച കനത്ത ജനപ്രാവാഹത്തിന് സമാനമായ മഴയെത്തുടർന്ന് മേഖലയിൽ വൻ നാശനഷ്ടമാണ് റിപ്പോർട്ട് ചെയ്തിരിക്കുന്നത്. തുടർച്ചയായുണ്ടാകുന്ന പ്രകൃതിക്ഷോഭത്തിൽ കടുത്ത പ്രതിസന്ധിയിലായ ബോയ്സ്വെയ്ൻ-മോർട്ടൺ (Boissevain-Morton) നഗരസഭയിൽ പ്രാദേശിക ഭരണകൂടം അടിയന്തരാവസ്ഥ പ്രഖ്യാപിച്ചു. ഒട്ടുമിക്ക പ്രദേശങ്ങളും പൂർണ്ണമായും വെള്ളത്തിനടിയിലായതോടെ കനത്ത ജാഗ്രതാ നിർദേശമാണ് അധികൃതർ പുറപ്പെടുവിച്ചിട്ടുള്ളത്.
ചൊവ്വാഴ്ച പുലർച്ചെ അഞ്ചുമണിയോടെ ബോയ്സ്വെയ്ൻ മേഖലയിൽ മാത്രം 152 മില്ലിമീറ്റർ മഴയാണ് രേഖപ്പെടുത്തിയത്. ഡെലോറൈൻ (130 മി.മീ), മിന്റോ (113 മി.മീ), ഷിലോ (100 മി.മീ) തുടങ്ങിയ സമീപ പ്രദേശങ്ങളിലും സമാനമായ രീതിയിൽ കനത്ത മഴ പെയ്തു. അപ്രതീക്ഷിതമായി എത്തിയ മലവെള്ളപ്പാച്ചിലിൽ നഗരത്തിലെ ഡ്രെയിനേജ് സംവിധാനങ്ങൾ പൂർണ്ണമായും തകരുകയും ജനവാസമേഖലകളിലെ വീടുകളുടെ ബേസ്മെന്റുകളിലേക്ക് ഉൾപ്പെടെ മലിനജലം ഇരച്ചുകയറുകയും ചെയ്തു. നിലവിൽ ഒട്ടേറെ കുടുംബങ്ങളെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചിട്ടുണ്ട്. നീപ്പാവയിലെ ഒരു ക്യാമ്പ് ഗ്രൗണ്ടിൽ നിന്ന് തിങ്കളാഴ്ച രാത്രിയോടെ ആളുകളെ പൂർണ്ണമായി ഒഴിപ്പിച്ചു.
“എല്ലാ വശങ്ങളിൽ നിന്നും ഒരേസമയം വെള്ളം ഇരച്ചുകയറുകയായിരുന്നു. ഞങ്ങൾക്ക് അത് തടയാൻ ഒട്ടും സാധിച്ചില്ല. വീടിന്റെ ബേസ്മെന്റിലേക്ക് വെള്ളം കയറിയപ്പോൾ വിഖ്യാത ചിത്രം ‘ടൈറ്റാനിക്’ സിനിമയിലെ രംഗങ്ങൾ പോലെയാണ് തോന്നിയത്. ഫർണിച്ചറുകളും മറ്റ് സാധനങ്ങളും വെള്ളത്തിൽ ഒഴുകിനടക്കുകയാണ്.” കൗൺസിലർ ഡേവിഡ് സ്റ്റെഡ്, ബോയ്സ്വെയ്ൻ-മോർട്ടൺ
കനത്ത പ്രളയത്തെത്തുടർന്ന് മാനിറ്റോബയിലെ ഗതാഗത-വാർത്താവിനിമയ സംവിധാനങ്ങൾ പൂർണ്ണമായും തകരാറിലായി. റോഡുകൾ പലതും ഒലിച്ചുപോയ നിലയിലാണ്. ഗ്രാമീണ മേഖലയിലെ എഴുപത് ശതമാനത്തോളം റോഡുകൾ വെള്ളത്തിനടിയിലാവുകയോ തകരുകയോ ചെയ്തിട്ടുണ്ടെന്ന് കൗൺസിൽ മേധാവി ജൂഡി സ്വാൻസൺ വ്യക്തമാക്കി. വെള്ളത്തിനടിയിലായ റോഡുകളിലൂടെയുള്ള യാത്ര പൂർണ്ണമായും നിരോധിച്ചിട്ടുണ്ട്. പൈപ്പ് ലൈനുകൾ തകരാറിലായതിനാൽ ശുദ്ധജല ഉപയോഗത്തിന് കർശന നിയന്ത്രണമുണ്ട്. അപകടസാധ്യത കണക്കിലെടുത്ത് മേഖലയിലെ കാനഡ ദിനാഘോഷങ്ങൾ ഉൾപ്പെടെയുള്ള ഔദ്യോഗിക പരിപാടികളെല്ലാം റദ്ദാക്കി.
മഴ കനത്തതോടെ പ്രവിശ്യയിലെ പതിനാലായിരത്തിലധികം വീടുകളിലെ വൈദ്യുതി ബന്ധം പൂർണ്ണമായി വിച്ഛേദിക്കപ്പെട്ടു. റോഡുകൾ തകർന്നതും വൈദ്യുതി തൂണുകൾ കടപുഴകി വീണതും കാരണം തകർന്നുപോയ പ്രദേശങ്ങളിലേക്ക് ദുരന്തനിവാരണ സേനയ്ക്ക് എത്തിയപ്പെടാൻ സാധിക്കാത്തത് രക്ഷാപ്രവർത്തനത്തെ സങ്കീർണ്ണമാക്കുന്നുണ്ട്. ചൈൽഡ്സ് തടാകം, ബെനിറ്റോ, മിനിറ്റോനാസ്, സ്വാൻ റിവർ തുടങ്ങിയ മേഖലകൾ ഇപ്പോൾ പൂർണ്ണമായും ഒറ്റപ്പെട്ട അവസ്ഥയിലാണ്. വരും ദിവസങ്ങളിലും കനത്ത മഴ തുടരുമെന്നാണ് കാലാവസ്ഥാ നിരീക്ഷണ കേന്ദ്രത്തിന്റെ മുന്നറിയിപ്പ്. അടിയന്തര സാഹചര്യങ്ങളിലല്ലാതെ ജനങ്ങൾ പുറത്തിറങ്ങരുതെന്നും യാത്രകൾ ഒഴിവാക്കണമെന്നും ഗവൺമെന്റ് വക്താവ് അറിയിച്ചു.
Manitoba inundated again by heavy flooding; drainage system overwhelmed by torrential rain; alert issued.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
