ഒട്ടാവ: കാനഡയിലേക്ക് കുടിയേറാൻ ആഗ്രഹിക്കുന്നവർക്കും നിലവിൽ അവിടെയുള്ളവർക്കും സുരക്ഷയൊരുക്കാൻ ഇമിഗ്രേഷൻ കൺസൾട്ടന്റുമാരുടെ നിയന്ത്രണ ചട്ടങ്ങളിൽ കേന്ദ്ര സർക്കാർ നിർണ്ണായക ഭേദഗതി വരുത്തുന്നു. കോളേജ് ഓഫ് ഇമിഗ്രേഷൻ ആൻഡ് സിറ്റിസൺഷിപ്പ് കൺസൾട്ടന്റ്സിന്റെ (CICC) പ്രവർത്തനങ്ങൾ കൂടുതൽ സുതാര്യമാക്കുന്നതിനും ഉപഭോക്താക്കളുടെ അവകാശങ്ങൾ സംരക്ഷിക്കുന്നതിനുമുള്ള പുതിയ നിയമങ്ങൾ 2026 ജൂലൈ 15 മുതൽ പ്രാബല്യത്തിൽ വരുമെന്ന് സർക്കാർ അറിയിച്ചു. മേയ് ആറിന് പുറത്തിറക്കിയ വാർത്താക്കുറിപ്പിലൂടെയാണ് ഈ സുപ്രധാന പ്രഖ്യാപനം നടത്തിയത്.
പുതിയ പരിഷ്കാരങ്ങളിൽ ഏറ്റവും ശ്രദ്ധേയം ഇമിഗ്രേഷൻ കൺസൾട്ടന്റുമാരുടെ ചതിക്കുഴികളിൽ വീഴുന്നവർക്കായി രൂപീകരിക്കുന്ന പ്രത്യേക നഷ്ടപരിഹാര നിധിയാണ് (Compensation Fund). കൺസൾട്ടന്റുമാർ നടത്തുന്ന സാമ്പത്തിക തട്ടിപ്പുകൾ, ഫണ്ട് ദുരുപയോഗം, വ്യാജരേഖ ചമയ്ക്കൽ തുടങ്ങിയവ മൂലം നഷ്ടമുണ്ടാകുന്ന ഇരകൾക്ക് ഈ നിധിയിൽ നിന്ന് സഹായം ലഭിക്കും. 2021 നവംബർ 23-ന് ശേഷമുണ്ടായ തട്ടിപ്പുകൾക്ക് ഇരയായവർക്ക് ഇതിനായി അപേക്ഷിക്കാം. എന്നാൽ, ഇതിന്മേലുള്ള സി.ഐ.സി.സി അച്ചടക്ക സമിതിയുടെ അന്തിമ തീരുമാനം 2026 ജൂലൈ 15-നോ അതിനു ശേഷമോ ആയിരിക്കണം പുറത്തുവരേണ്ടത്.
കൺസൾട്ടന്റുമാരുടെ മേൽ സർക്കാരിന് കൂടുതൽ നിയന്ത്രണാധികാരം നൽകുന്നതാണ് പുതിയ നിയമം. നിയമലംഘനം നടത്തുന്ന കൺസൾട്ടന്റുമാർക്കെതിരെ കടുത്ത പിഴ ചുമത്താനും സി.ഐ.സി.സി ബോർഡിന്റെ തീരുമാനങ്ങളിൽ നേരിട്ട് ഇടപെടാനും ഫെഡറൽ സർക്കാരിന് ഇനി സാധിക്കും. കാനഡയിലെ നിയമമനുസരിച്ച്, അംഗീകൃത ലോ സൊസൈറ്റികളിലോ സി.ഐ.സി.സിയിലോ രജിസ്റ്റർ ചെയ്തവർക്ക് മാത്രമേ പ്രതിഫലം വാങ്ങി ഇമിഗ്രേഷൻ സേവനങ്ങൾ നൽകാൻ അനുവാദമുള്ളൂ. ഈ വ്യവസ്ഥ കർശനമായി നടപ്പിലാക്കുന്നതിലൂടെ വ്യാജ ഏജന്റുമാരെ പൂർണ്ണമായും ഒഴിവാക്കാനാണ് ലക്ഷ്യമിടുന്നത്.
കൂടാതെ, കൺസൾട്ടന്റുമാരുടെ വിവരങ്ങൾ പൊതുജനങ്ങൾക്ക് ലഭ്യമാക്കുന്ന പബ്ലിക് രജിസ്റ്റർ കൂടുതൽ വിപുലീകരിക്കും. രജിസ്റ്റർ ചെയ്ത കൺസൾട്ടന്റുമാരുടെ നിലവിലെ പദവി, അവർക്കെതിരെ മുമ്പ് സ്വീകരിച്ചിട്ടുള്ള അച്ചടക്ക നടപടികൾ തുടങ്ങിയ വിവരങ്ങൾ വായനക്കാർക്ക് ഇതിലൂടെ പരിശോധിക്കാം. 2024 ഡിസംബർ 21-ന് കരട് നിയമമായി അവതരിപ്പിച്ച ഈ മാറ്റങ്ങൾ കാനഡയുടെ കുടിയേറ്റ മേഖലയിലെ സുതാര്യത വർദ്ധിപ്പിക്കുമെന്നാണ് വിലയിരുത്തപ്പെടുന്നത്. നഷ്ടപരിഹാരത്തിനുള്ള അപേക്ഷാ രീതിയും മറ്റ് നടപടിക്രമങ്ങളും ജൂലൈ മാസത്തോടെ സി.ഐ.സി.സി ഔദ്യോഗികമായി പുറത്തുവിടും.
Between the snow-capped mountains and the sea; To Canada in search of dream trips
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
