സെന്റ് ജോൺ : ന്യൂഫൗണ്ട്ലാൻഡ് ആൻഡ് ലാബ്രഡോറിലുള്ള മില്ലർ സെന്റർ പുനരധിവാസ ആശുപത്രിയിൽ ഹീറ്റിങ് സിസ്റ്റത്തിലുണ്ടാകുന്ന തുടർച്ചയായ തകരാറുകൾ വലിയ പ്രതിസന്ധി സൃഷ്ടിക്കുന്നു. വിവരാവകാശ രേഖകൾ വഴി ലഭിച്ച ആഭ്യന്തര നിർദേശക്കുറിപ്പിലാണ് ഗുരുതരമായ ഈ വിവരങ്ങളുള്ളത്. കെട്ടിടത്തിലുണ്ടാകുന്ന ചോർച്ചയും തകരാറുകളും കാരണം ഏകദേശം 1.2 മില്യൺ ഡോളർ വിലമതിക്കുന്ന കൃത്രിമാവയവങ്ങളും അനുബന്ധ മെഡിക്കൽ സാമഗ്രികളും നശിച്ചുപോകാൻ സാധ്യതയുണ്ടെന്ന് ജൂണിൽ തയാറാക്കിയ റിപ്പോർട്ട് വ്യക്തമാക്കുന്നു.
1941-ൽ നിർമ്മിച്ച ഈ കെട്ടിടത്തിലെ പൈപ്പുകൾ കോൺക്രീറ്റ് തറകൾക്കടിയിലും ആസ്ബസ്റ്റോസ് അടങ്ങിയ പ്ലാസ്റ്ററുകൾക്ക് പിന്നിലുമാണ് സ്ഥാപിച്ചിരിക്കുന്നത്. അതിനാൽ ഇവയുടെ അറ്റകുറ്റപ്പണികൾ ഏറെ ചെലവേറിയതും സങ്കീർണ്ണവുമാണ്. 500-ലധികം രോഗികൾക്ക് കൃത്രിമാവയവങ്ങൾ നിർമ്മിച്ചു നൽകുന്നതും 25 ജീവനക്കാർ ജോലി ചെയ്യുന്നതുമായ റിഹാബ് ടെക്നോളജി വിഭാഗത്തിലാണ് പ്രശ്നം ഏറ്റവും രൂക്ഷം. ചോർച്ച കാരണം ചികിത്സാ സേവനങ്ങൾ ദീർഘനേരം തടസ്സപ്പെടുകയും കെട്ടിടത്തിനുള്ളിൽ ചൂടും ഈർപ്പവും 28 ഡിഗ്രി സെൽഷ്യസിനു മുകളിലേക്ക് ഉയരുകയും ചെയ്യുന്നത് ജീവനക്കാർക്കും രോഗികൾക്കും ഒരുപോലെ ബുദ്ധിമുട്ട് സൃഷ്ടിക്കുന്നുണ്ട്.
സെന്റ് ക്ലെയർ ആശുപത്രിക്ക് പകരം നിർമ്മിക്കാൻ ഉദ്ദേശിച്ച പുതിയ ആശുപത്രി വളപ്പിലേക്ക് മില്ലർ സെന്റർ മാറ്റാൻ പ്രവിശ്യാ സർക്കാർ മുൻപ് പദ്ധതിയിട്ടിരുന്നു. എന്നാൽ ടോണി വെയ്ക്ഹാമിന്റെ നേതൃത്വത്തിലുള്ള സർക്കാർ കടുത്ത സാമ്പത്തിക ബാധ്യത ചൂണ്ടിക്കാട്ടി ജനുവരിയിൽ ഈ പദ്ധതി ഉപേക്ഷിക്കുകയായിരുന്നു. നിലവിൽ ചോർച്ച പരിഹരിക്കുന്നതിനായി എഞ്ചിനീയറിങ് ഏജൻസിയെ ചുമതലപ്പെടുത്തിയിട്ടുണ്ടെന്നും ബദൽ സംവിധാനങ്ങൾ ഉറപ്പാക്കി രോഗീപരിചരണം തടസ്സമില്ലാതെ മുന്നോട്ട് കൊണ്ടുപോകുമെന്നും ന്യൂഫൗണ്ട്ലാൻഡ് ആൻഡ് ലാബ്രഡോർ ഹെൽത്ത് സർവീസസ് (NLHS) അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
