ന്യൂഫൗണ്ട്ലാൻഡ് ആൻഡ് ലാബ്രഡോർ: ന്യൂഫൗണ്ട്ലാൻഡ് ആൻഡ് ലാബ്രഡോർ പ്രവിശ്യ അവരുടെ ഏറ്റവും പുതിയ പ്രൊവിൻഷ്യൽ നോമിനി പ്രോഗ്രാം (NLPNP) നറുക്കെടുപ്പ് ഫലം പുറത്തുവിട്ടു. സെപ്റ്റംബർ 4-ന് നടന്ന തിരഞ്ഞെടുപ്പിൽ 97 ഉദ്യോഗാർത്ഥികൾക്കാണ് പ്രൊവിൻഷ്യൽ നോമിനേഷനായി അപേക്ഷിക്കാനുള്ള ക്ഷണം ലഭിച്ചത്. 2026-ൽ പ്രവിശ്യ നടത്തുന്ന 13-ാമത് നറുക്കെടുപ്പാണിത്. തിരഞ്ഞെടുക്കപ്പെട്ട ഉദ്യോഗാർത്ഥികൾക്ക് കനേഡിയൻ പെർമനന്റ് റെസിഡൻസി പ്രക്രിയയുടെ അടുത്ത ഘട്ടത്തിലേക്ക് കടക്കാൻ ഇത് വഴിയൊരുക്കുന്നു.
2026 ജൂൺ 9 മുതൽ പ്രാബല്യത്തിൽ വന്ന പുതിയ വ്യവസ്ഥ പ്രകാരം, കാനഡയ്ക്കുള്ളിൽ നിന്ന് അപേക്ഷിക്കുന്ന പ്രൊവിൻഷ്യൽ നോമിനികൾക്ക് അക്നോളജ്മെന്റ് ഓഫ് റെസീപ്റ്റ് (AoR) ലഭിക്കുന്നതിന് മുൻപ് തന്നെ ബ്രിഡ്ജിംഗ് ഓപ്പൺ വർക്ക് പെർമിറ്റിന് അപേക്ഷിക്കാൻ സാധിക്കും. ഇത് പിആർ അപേക്ഷയിൽ അന്തിമ തീരുമാനം വരുന്നതുവരെ കാനഡയിൽ നിയമപരമായ സ്റ്റാറ്റസോടെ തുടരാൻ അപേക്ഷകരെ സഹായിക്കും. ഈ സെപ്റ്റംബർ 4 ഡ്രോയിൽ അറ്റ്ലാന്റിക് ഇമിഗ്രേഷൻ പ്രോഗ്രാം (AIP) വഴി ആർക്കും ക്ഷണം നൽകിയിട്ടില്ല. 2025 ഫെബ്രുവരിയിൽ എക്സ്പ്രഷൻ ഓഫ് ഇന്ററസ്റ്റ് (EOI) രീതിയിലേക്ക് മാറിയതിനു ശേഷം അറ്റ്ലാന്റിക് ഇമിഗ്രേഷൻ പ്രോഗ്രാം വഴി അപേക്ഷകരെ ഒഴിവാക്കുന്നത് ഇത് രണ്ടാം തവണയാണ്. ഇതോടെ 2026 സെപ്റ്റംബർ 4 വരെ പ്രവിശ്യ രണ്ട് പ്രോഗ്രാമുകളിലുമായി ആകെ 2,556 ക്ഷണങ്ങൾ നൽകി. ഇതിൽ 2,162 എണ്ണം NLPNP വഴിയും 394 എണ്ണം AIP വഴിയുമാണ്. ഏതെല്ലാം പ്രത്യേക സ്ട്രീമുകൾ വഴിയോ തൊഴിൽ മേഖലകൾ വഴിയോ ആണ് ക്ഷണം നൽകിയതെന്ന് പ്രവിശ്യയുടെ ഓഫീസ് ഓഫ് ഇമിഗ്രേഷൻ ആൻഡ് മൾട്ടികൾച്ചറലിസം പരസ്യപ്പെടുത്താറില്ല.
വർഷത്തിന്റെ തുടക്കം മുതൽ വലിയ തോതിലുള്ള ക്ഷണങ്ങളാണ് പ്രവിശ്യ നൽകിയിട്ടുള്ളത്. മാർച്ച് 6-ന് നടന്ന ഡ്രോയിൽ 445 പേർക്കും (362 NLPNP, 83 AIP), മാർച്ച് 30-ന് 245 പേർക്കും (209 NLPNP, 36 AIP), ഏപ്രിൽ 13-ന് 210 പേർക്കും (177 NLPNP, 33 AIP), മേയ് 1-ന് 190 പേർക്കും (157 NLPNP, 33 AIP) ക്ഷണം ലഭിച്ചു. തുടർന്ന് മേയ് 11-ന് 186 അപേക്ഷകരും (168 NLPNP, 18 AIP), മേയ് 28-ന് 103 അപേക്ഷകരും (84 NLPNP, 19 AIP), ജൂൺ 10-ന് 108 അപേക്ഷകരും (89 NLPNP, 19 AIP) തിരഞ്ഞെടുക്കപ്പെട്ടു. ജൂലൈ 10-ന് 57 അപേക്ഷകർക്ക് (17 NLPNP, 40 AIP) ക്ഷണം ലഭിച്ചപ്പോൾ, ജൂലൈ 28-ന് നടന്ന വലിയ ഡ്രോയിൽ 445 പേരെ (400 NLPNP, 45 AIP) പ്രവിശ്യ വീണ്ടും ക്ഷണിച്ചു. അതിനുശേഷം ഓഗസ്റ്റ് 10-ന് 208 പേർക്കും (186 NLPNP, 22 AIP), ഓഗസ്റ്റ് 18-ന് 122 പേർക്കും (മുഴുവൻ NLPNP), ഓഗസ്റ്റ് 26-ന് 140 പേർക്കും (94 NLPNP, 46 AIP) അവസരം നൽകിയ ശേഷമാണ് സെപ്റ്റംബർ 4-ന് 97 NLPNP അപേക്ഷകർക്ക് മാത്രം ക്ഷണം നൽകിയത്.
ഈ പ്രോഗ്രാം വഴി പിആർ നേടുന്നതിനായി അപേക്ഷകർ പ്രവിശ്യയുടെ ഇമിഗ്രേഷൻ ആക്സിലറേറ്റർ പോർട്ടൽ വഴി എക്സ്പ്രഷൻ ഓഫ് ഇന്ററസ്റ്റ് (EOI) സമർപ്പിക്കണം. വിദ്യാഭ്യാസം, പ്രവൃത്തിപരിചയം, ഭാഷാ നൈപുണ്യം, പ്രവിശ്യയിൽ താമസമാക്കാനുള്ള പ്ലാൻ എന്നിവ ഇതിൽ വ്യക്തമാക്കണം. വർക്കർ സ്ട്രീമുകളിലേക്ക് അപേക്ഷിക്കുന്ന എല്ലാവർക്കും തൊഴിലുടമയിൽ നിന്നുള്ള ജോബ് ഓഫർ നിർബന്ധമാണ്. ആരോഗ്യമേഖലയിലെ തൊഴിൽ, പ്രധാന നഗരങ്ങൾക്ക് പുറത്തുള്ള ജോലി, ഫ്രഞ്ച് ഭാഷാ പ്രാവീണ്യം, പ്രാദേശികമായി വിദ്യാഭ്യാസം പൂർത്തിയാക്കിയവർ എന്നിവർക്ക് പ്രവിശ്യ മുൻഗണന നൽകും. തിരഞ്ഞെടുക്കപ്പെടുന്ന ഉദ്യോഗാർത്ഥികൾക്ക് നോമിനേഷൻ അപേക്ഷ പൂർത്തിയാക്കാൻ 60 ദിവസത്തെ സമയമുണ്ട്. നോമിനേഷൻ ലഭിച്ച ശേഷം ഫെഡറൽ ഗവൺമെന്റ് അപേക്ഷ അംഗീകരിച്ചാൽ കൺഫർമേഷൻ ഓഫ് പെർമനന്റ് റെസിഡൻസ് (COPR) ലഭിക്കും.
ALSO READ: ഒന്റാരിയോ നിവാസികളെ അറിഞ്ഞോ? ഈ മാസം രണ്ട് CRA ആനുകൂല്യങ്ങൾ അക്കൗണ്ടിലെത്തും, തീയതികൾ അറിയാം
നിലവിലെ വിവരങ്ങൾ അനുസരിച്ച് ബേസ് പിഎൻപി (Base PNP) അപേക്ഷകൾക്ക് 13 മാസവും എൻഹാൻസ്ഡ് പിഎൻപി (Enhanced PNP) അപേക്ഷകൾക്ക് 7 മാസവുമാണ് പ്രോസസിംഗ് സമയം എടുക്കുന്നത്. ഒരു തവണ സമർപ്പിക്കുന്ന ഇഒഐ പ്രൊഫൈലിന് 12 മാസത്തെ കാലാവധിയാണുള്ളത്. ഈ കാലയളവിനുള്ളിൽ ക്ഷണം ലഭിച്ചില്ലെങ്കിൽ, തുടർന്ന് വരുന്ന നറുക്കെടുപ്പുകളിൽ പരിഗണിക്കപ്പെടുന്നതിനായി പുതിയ പ്രൊഫൈൽ വീണ്ടും സമർപ്പിക്കേണ്ടതുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
