ലാബ്രഡോർ വൈദ്യുതി കരാർ: നിർണ്ണായക റിപ്പോർട്ട് ഉടൻ; പ്രതീക്ഷയോടെ ക്യുബെക്

ക്യുബെക് സിറ്റി: ക്യുബെക്കും ന്യൂഫൗണ്ട്‌ലാൻഡ് ആൻഡ് ലാബ്രഡോറും തമ്മിലുള്ള ചരിത്രപരമായ ഊർജ്ജ പങ്കാളിത്ത കരാറിൽ അനിശ്ചിതത്വം തുടരുന്നു. ഇരു പ്രവിശ്യകളും തമ്മിലുള്ള കരട് കരാറിന്റെ കാലാവധി കഴിഞ്ഞ വ്യാഴാഴ്ച അവസാനിച്ച സാഹചര്യത്തിൽ, ന്യൂഫൗണ്ട്‌ലാൻഡ് പ്രീമിയർ ടോണി വേക്കാം സ്വീകരിക്കുന്ന നിലപാടിനായി കാത്തിരിക്കുകയാണ് ക്യൂബെക്. ലാബ്രഡോറിലെ ഊർജ്ജ വിഭവങ്ങൾ പങ്കുവെക്കുന്നതുമായി ബന്ധപ്പെട്ട ധാരണാപത്രം (MoU) നിലനിൽക്കുന്നുണ്ടെന്നാണ് താൻ വിശ്വസിക്കുന്നതെന്ന് ക്യൂബെക് പ്രീമിയർ ക്രിസ്റ്റീൻ ഫ്രെഷെറ്റ് വ്യക്തമാക്കി.

വിഷയത്തിൽ നിയോഗിക്കപ്പെട്ട വിദഗ്ധ സമിതിയുടെ റിപ്പോർട്ട് പഠിച്ച ശേഷം ടോണി വേക്കാം മറുപടി നൽകുമെന്നാണ് പ്രതീക്ഷിക്കുന്നത്. ഇരു പ്രവിശ്യകൾക്കും ഒരുപോലെ ഗുണകരമാകുന്നതാണ് ഈ കരാറെന്ന് ഫ്രെഷെറ്റ് മാധ്യമങ്ങളോട് പറഞ്ഞു. വരും പതിറ്റാണ്ടുകളിൽ ക്യൂബെക്കിന്റെ ഊർജ്ജ സുരക്ഷ ഉറപ്പാക്കുന്നതിനൊപ്പം ന്യൂഫൗണ്ട്‌ലാൻഡിന് വലിയ സാമ്പത്തിക ലാഭമുണ്ടാക്കാനും ഈ പദ്ധതി സഹായിക്കുമെന്നും അവർ കൂട്ടിച്ചേർത്തു. എന്നാൽ റിപ്പോർട്ട് പുറത്തുവിടുന്ന കാര്യത്തിൽ ന്യൂഫൗണ്ട്‌ലാൻഡ് സർക്കാർ ഇതുവരെ ഔദ്യോഗിക പ്രതികരണം നടത്തിയിട്ടില്ല.

കരാറിനെച്ചൊല്ലിയുള്ള രാഷ്ട്രീയ തർക്കങ്ങളും പ്രവിശ്യയിൽ ശക്തമാണ്. 2024-ൽ മുൻ ലിബറൽ സർക്കാർ ഒപ്പുവെച്ച കരട് കരാറിൽ മാറ്റങ്ങൾ വേണമെന്ന നിലപാടിലാണ് നിലവിലെ പ്രോഗ്രസീവ് കൺസർവേറ്റീവ് സർക്കാർ. കരാർ പുനഃപരിശോധിക്കാൻ മൂന്നംഗ സമിതിയെ പ്രീമിയർ ടോണി വേക്കാം ചുമതലപ്പെടുത്തിയിരുന്നു. നിയമപരമായ പരിശോധനകൾക്ക് ശേഷം മാത്രമേ ഈ റിപ്പോർട്ട് നിയമസഭയിൽ സമർപ്പിക്കൂ എന്നാണ് സർക്കാർ വൃത്തങ്ങൾ നൽകുന്ന സൂചന. അതേസമയം, കരാർ ഒപ്പിടാൻ വൈകുന്നത് തിരിച്ചടിയാകുമെന്ന് ക്യുബെക്കിലെ പ്രതിപക്ഷ നേതാവ് ചാർലസ് മില്ലിയാർഡും മുന്നറിയിപ്പ് നൽകി.

നിലവിലെ കരാർ പ്രതിസന്ധി 1969-ലെ വിവാദപരമായ കരാറിലേക്ക് പ്രവിശ്യയെ വീണ്ടും തളച്ചിടുമെന്ന ആശങ്കയും ഉയരുന്നുണ്ട്. ചർച്ചിൽ ഫാൾസ് പ്ലാന്റിൽ നിന്നുള്ള വൈദ്യുതി വളരെ കുറഞ്ഞ നിരക്കിൽ ഹൈഡ്രോ-ക്യൂബെക്കിന് നൽകുന്നതാണ് 1969-ലെ കരാർ. ഇത് 2041-ൽ മാത്രമേ അവസാനിക്കൂ. പുതിയ കരാർ പ്രാബല്യത്തിൽ വരികയാണെങ്കിൽ വൈദ്യുതി നിരക്ക് ഘട്ടംഘട്ടമായി വർദ്ധിപ്പിക്കാനും ലാബ്രഡോറിലെ പുതിയ ജലവൈദ്യുത പദ്ധതികളുടെ നിയന്ത്രണം സംയുക്തമായി ഏറ്റെടുക്കാനും സാധിക്കും. ഈ ഒരു പ്രധാന മാറ്റം ലക്ഷ്യമിട്ടാണ് ക്യുബെക് ചർച്ചകൾ തുടരുന്നത്.

Labrador power deal: Final report soon; Quebec hopeful

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt