ഒരു വ്യക്തിയുടെ യഥാർത്ഥ സ്വഭാവം ഒരിക്കൽ കണ്ടാൽ അത് വിശ്വസിക്കണമെന്ന് മഹാകവിയും എഴുത്തുകാരിയുമായ മായ ആഞ്ചലോ പറഞ്ഞിട്ടുണ്ട്. ഡൊണാൾഡ് ട്രംപിൻ്റെ കാര്യത്തിൽ ഈ വാക്കുകൾക്ക് വലിയ പ്രസക്തിയുണ്ട്. താരിഫ് എന്നത് അദ്ദേഹത്തിൻ്റെ സാമ്പത്തിക വീക്ഷണത്തിലെ ഒരു പോരായ്മയല്ല, മറിച്ച് അദ്ദേഹത്തിൻ്റെ ‘അമേരിക്ക ഫസ്റ്റ്’ അജണ്ടയുടെ പ്രധാന സവിശേഷതയാണ്. 1980-കളിൽ ലാറി കിങ്ങിനും ഓപ്ര വിൻഫ്രിക്കും നൽകിയ അഭിമുഖങ്ങളിൽ പോലും ജപ്പാനെതിരെ താരിഫുകൾ ചുമത്തുന്നതിനെക്കുറിച്ച് ട്രംപ് വാചാലനായി സംസാരിക്കുന്നത് കാണാം.
ട്രംപിൻ്റെ നിലപാടുകൾ എന്തുതന്നെയായാലും, താരിഫ് ഒരു ആയുധമായി ഉപയോഗിക്കാനുള്ള അദ്ദേഹത്തിൻ്റെ കാഴ്ചപ്പാടിനെ ആർക്കും ചോദ്യം ചെയ്യാൻ കഴിയില്ല. ഈയൊരു സാഹചര്യത്തിൽ അമേരിക്ക കാനഡയ്ക്കെതിരെ താരിഫ് ചുമത്തിയത് അപ്രതീക്ഷിതമായിരുന്നില്ലെന്ന് മുൻ ഫെഡറൽ കാബിനറ്റ് മന്ത്രിയും കോളമിസ്റ്റുമായ ജെയിംസ് മൂർ പറയുന്നു. ഈ വെല്ലുവിളിയെ നേരിടാൻ കാനഡ സ്വീകരിക്കേണ്ട ഏഴ് നിർദേശങ്ങളും അദ്ദേഹം മുന്നോട്ട് വെക്കുന്നു.
ട്രംപിൻ്റെ പുതിയ താരിഫ് പ്രകാരം, ഫെൻ്റാനിൽ ഇറക്കുമതിക്ക് 35% താരിഫ്, സ്റ്റീൽ, അലുമിനിയം, ചില കോപ്പർ ഉൽപ്പന്നങ്ങൾക്ക് 50% താരിഫ്, കൂടാതെ സി-യുഎസ്എംഎയിൽ (CUSMA) ഉൾപ്പെടാത്ത വാഹന ഘടകങ്ങൾക്ക് 25% താരിഫ് എന്നിവയാണ് ചുമത്തിയിട്ടുള്ളത്. ഈ താരിഫ് മൂലമുള്ള പ്രതിസന്ധി ബാധിച്ച വ്യവസായങ്ങളെയും ഭൂമിശാസ്ത്രപരമായ സാമ്പത്തിക മേഖലകളിലെയും കനേഡിയൻ പൗരന്മാരെ ആശ്രയിച്ചിരിക്കും. കാനഡയിൽ നിന്ന് അമേരിക്കയിലേക്ക് കയറ്റുമതി ചെയ്യുന്ന ചരക്കുകളുടെ ഒരു ചെറിയ ഭാഗത്തിന് (10-20%) മാത്രമാണ് ഈ താരിഫ് ബാധകമാവുന്നതെങ്കിലും, ഇത് സാധാരണ കനേഡിയൻ ജനതയെ സംബന്ധിച്ചിടത്തോളം വലിയ ആശങ്കയാണ് ഉണ്ടാക്കുന്നത്.
ഈ താരിഫ് വർധന ഇവിടെ അവസാനിക്കില്ലെന്ന് കരുതാൻ കാരണമില്ലെന്നും ജെയിംസ് മൂർ മുന്നറിയിപ്പ് നൽകുന്നു. ജപ്പാനുമായി താരിഫ് സംബന്ധിച്ച ഒരു കരാറിൽ എത്തിയ ശേഷം ഒരു ആഴ്ച കഴിയും മുൻപ് തന്നെ ട്രംപ് അത് ലംഘിച്ച് വീണ്ടും താരിഫ് വർദ്ധിപ്പിച്ചിരുന്നു. അതുകൊണ്ട് തന്നെ കാനഡ സർക്കാർ ഈ വിഷയത്തിൽ നിഷ്ക്രിയരായി ഇരിക്കരുതെന്നും, ഫലപ്രദമായി പ്രതികരിക്കാൻ ബാധ്യസ്ഥരാണെന്നും അദ്ദേഹം ചൂണ്ടിക്കാട്ടുന്നു. ഇതിനായി അദ്ദേഹം ഏഴ് നിർദേശങ്ങളാണ് മുന്നോട്ട് വെക്കുന്നത്.
- വ്യവസായങ്ങളെ വിലയിരുത്തുക: ഈ താരിഫുകൾ കനേഡിയൻ കയറ്റുമതിക്കാരെയും തൊഴിലാളികളെയും എങ്ങനെ ബാധിക്കുന്നുവെന്ന് നിരന്തരം വിലയിരുത്തുക. സ്റ്റീഫൻ ഹാർപ്പർ പ്രധാനമന്ത്രിയായിരുന്നപ്പോൾ കാനഡ-യൂറോപ്യൻ യൂണിയൻ സമഗ്ര സാമ്പത്തിക, വ്യാപാര കരാർ (CETA), ട്രാൻസ്-പസഫിക് പങ്കാളിത്തം (TPP) എന്നിവയുമായി ബന്ധപ്പെട്ട് നടപ്പിലാക്കിയ പ്രവർത്തന സമിതികളും (working roundtables) ക്രമീകരിച്ച പ്രതികരണ സംവിധാനങ്ങളും (structured feedback loops) പുനരുജ്ജീവിപ്പിക്കണം.
- പിന്തുണ നൽകുക: താരിഫ് മൂലം പ്രതിസന്ധിയിലായ വ്യവസായങ്ങളെ പിന്തുണയ്ക്കുന്നതിനായി ക്രിയാത്മകമായ പൊതുനയ ഓപ്ഷനുകൾ പരിഗണിക്കണം. ഈ വിഷയത്തിൽ ചർച്ചകൾ നടത്താൻ പാർലമെൻ്റ് വിളിച്ചു ചേർക്കണം.
- പരസ്പര താരിഫുകൾ പരിഗണിക്കണം: അന്യായമായി ബാധിച്ച വ്യവസായങ്ങളെ പിന്തുണയ്ക്കുന്നതിനായി ഹ്രസ്വകാലത്തേക്ക് പരസ്പര താരിഫുകൾ പരിഗണിക്കണം.
- ആക്രമണാത്മക നിലപാട് ഒഴിവാക്കണം: ഒന്നിന് ഒന്ന് എന്ന നിലയിലുള്ള വ്യാപാര യുദ്ധത്തിന് പകരം താത്കാലികമായി സംയമനം പാലിക്കാൻ ശ്രമിക്കണം.
- പുതിയ വിപണികൾ കണ്ടെത്തണം: അമേരിക്കയ്ക്ക് പുറത്തുള്ള രാജ്യങ്ങളിൽ കനേഡിയൻ ഉൽപ്പന്നങ്ങൾക്കും സേവനങ്ങൾക്കുമായി പുതിയ കയറ്റുമതി വിപണികൾ കെട്ടിപ്പടുക്കണം. നിലവിലെ പ്രസിഡൻ്റിൻ്റെ ഇഷ്ടത്തിനനുസരിച്ച് ബന്ദിയാക്കപ്പെടാതിരിക്കാൻ, വൈവിധ്യമാർന്ന ആഗോള ബദൽ വിപണികൾ കണ്ടെത്തേണ്ടത് അത്യാവശ്യമാണ്.
- രാജ്യത്തിൻ്റെ ആഭ്യന്തര വളർച്ചയ്ക്ക് ഊന്നൽ നൽകുക: ‘ബിൽഡ്, ബേബി, ബിൽഡ്’ എന്ന പ്രധാമന്ത്രി കാർണിയുടെ ആഹ്വാനം യാഥാർത്ഥ്യമാക്കണം. ബിൽ സി-5 എന്ന നിയമം ശരിയായ ദിശയിലുള്ള ഒരു ചുവടുവെപ്പാണ്, ഇത് കൂടുതൽ വേഗത്തിലാക്കണം.
- വ്യാപാര സഹകരണത്തിൻ്റെ പ്രാധാന്യം ഓർമ്മിപ്പിക്കുക: മാനവരാശിയുടെ ചരിത്രത്തിലെ ഏറ്റവും വലിയ സാമ്പത്തിക പങ്കാളിത്തമായ നോർത്ത് അമേരിക്കൻ ട്രേഡിംഗ് അലയൻസിൻ്റെ പ്രാധാന്യത്തെക്കുറിച്ച് അമേരിക്കയെ ബോധവത്കരിക്കുന്നത് തുടരുക. ചൈനയുടെ വളർച്ചയെ ചെറുക്കാനുള്ള പ്രതിരോധം കൂടിയാണ് ഈ വ്യാപാര സഹകരണം എന്ന് അമേരിക്കയെ നിരന്തരം ഓർമ്മിപ്പിക്കണമെന്നും ജെയിംസ് മൂർ നിർദേശിക്കുന്നു.
