നൂറ്റാണ്ടുകൾ പഴക്കമുള്ള മരങ്ങൾ വെട്ടാൻ നീക്കം; പ്രതിഷേധവുമായി തദ്ദേശീയർ

ബ്രിട്ടീഷ് കൊളംബിയ: തെക്കുപടിഞ്ഞാറൻ വാൻകൂവർ ദ്വീപിലെ പുരാതന മഴക്കാടുകളിൽ വീണ്ടും വനനശീകരണ ഭീഷണി ഉയർന്നതോടെ ഫസ്റ്റ് നേഷൻസ് സമൂഹാംഗങ്ങളും, പരിസ്ഥിതി പ്രവർത്തകരും പ്രതിഷേധവുമായി രംഗത്തെത്തി. പഴക്കമേറിയ മരങ്ങൾ വെട്ടിമാറ്റാനെത്തുന്ന ലോ​ഗിംഗ് കമ്പനിയുടെ വാഹനങ്ങൾ തടയാൻ ഇരുപതോളം വനസംരക്ഷകർ രാത്രിയോടെ വനത്തിനുള്ളിൽ ക്യാമ്പ് സ്ഥാപിച്ചു. പുലർച്ചെ നാല് മണിയോടെ എത്തിയ ആദ്യ ലോ​ഗിംഗ് ട്രക്ക് പ്രതിഷേധം കണ്ട് തിരികെ മടങ്ങുകയായിരുന്നു. ചെറിയ വിജയമായിരുന്നെങ്കിലും വനസംരക്ഷണ പോരാട്ടത്തിൽ അതിന് വലിയ പ്രതീകാത്മക പ്രാധാന്യമുണ്ടെന്നാണ് പ്രതിഷേധക്കാർ പറയുന്നത്.

86-കാരനായ പചീഡഹ്റ്റ് (Pacheedaht) ആദിവാസി വിഭാഗത്തിലെ മുതിർന്ന അംഗം ബിൽ ജോൺസ് ജീവിതകാലം മുഴുവൻ സ്വന്തം പാരമ്പര്യ വനങ്ങൾ ഇല്ലാതാകുന്നത് കണ്ടുവെന്ന് പറയുന്നു. 18-ാം വയസ്സിൽ താനും വനമേഖലയിൽ ജോലി ചെയ്തിരുന്നെങ്കിലും പിന്നീട് അതിന്റെ ദൂഷ്യഫലങ്ങൾ തിരിച്ചറിഞ്ഞതായും അദ്ദേഹം പറഞ്ഞു. “നമ്മുടെ ഭൂമി ഇപ്പോൾ ഏതാണ്ട് നഗ്നമായി. അവശേഷിക്കുന്ന ചെറിയ ഭാഗമെങ്കിലും രക്ഷിക്കേണ്ടത് നമ്മുടെ കടമയാണ്,” എന്നാണ് അദ്ദേഹത്തിന്റെ വാക്കുകൾ.

ഭൂമിയുടെ ആകെ കരഭാഗത്തിന്റെ വെറും അര ശതമാനത്തിൽ താഴെ മാത്രമാണ് തീരദേശ മഴക്കാടുകൾ നിലനിൽക്കുന്നത്. അവയിൽ ഏറ്റവും അപൂർവമായ ആവാസവ്യവസ്ഥകളിലൊന്നാണ് വാൻകൂവർ ദ്വീപിലെ പുരാതന വനങ്ങൾ. ആയിരം വർഷത്തിലേറെ പഴക്കമുള്ള മരങ്ങൾ ഉൾപ്പെടുന്ന ഈ വനങ്ങൾ ലോകത്തിലെ ഏറ്റവും കൂടുതൽ കാർബൺ സംഭരിക്കുന്ന വനപ്രദേശങ്ങളിലൊന്നാണെന്ന് പരിസ്ഥിതി സംഘടനകൾ ചൂണ്ടിക്കാട്ടുന്നു. എന്നാൽ ഒരു സഹസ്രാബ്ദം വളർന്ന ഒരു മരം ഒരു മണിക്കൂറിനുള്ളിൽ മുറിച്ചുനീക്കാൻ കഴിയുന്നതാണ് യാഥാർഥ്യം.

വ്യാവസായിക വനനശീകരണം ആരംഭിച്ചതിനുശേഷം വാൻകൂവർ ദ്വീപിലെ ഉൽപ്പാദനക്ഷമമായ പഴയ വളർച്ചാ വനങ്ങളുടെ ഭൂരിഭാഗവും ഇതിനകം ഇല്ലാതായി. ഇത്തരത്തിലുള്ള വനങ്ങളിൽ ഏകദേശം 20 ശതമാനം മാത്രമാണ് ഇപ്പോൾ അവശേഷിക്കുന്നതെന്നും അതിലെ ഭൂരിഭാഗവും ഇപ്പോഴും വനനശീകരണത്തിന് തുറന്നുകിടക്കുകയാണെന്നും പരിസ്ഥിതി സംഘടനകൾ പറയുന്നു. പ്രത്യേകിച്ച് 250 വർഷത്തിലേറെ പഴക്കമുള്ള വെസ്റ്റേൺ റെഡ് സീഡർ മരങ്ങൾ ഉയർന്ന വിലയ്ക്ക് കയറ്റുമതി ചെയ്യപ്പെടുന്നതിനാൽ ഇവ മുറിച്ചുമാറ്റാനുള്ള സമ്മർദം തുടരുകയാണ്.

ബ്രിട്ടീഷ് കൊളംബിയ സർക്കാർ 2021 മുതൽ 24 ലക്ഷം ഹെക്ടർ പഴയ വളർച്ചാ വനങ്ങൾക്ക് സംരക്ഷണമോ താൽക്കാലിക വിലക്കോ ഏർപ്പെടുത്തിയിട്ടുണ്ടെന്ന് അവകാശപ്പെടുന്നു. എന്നാൽ ഇവയിൽ പലതും താൽക്കാലിക നടപടികളാണെന്നും ചില സംരക്ഷിത മേഖലകളിലും വനനശീകരണം തുടരുകയാണെന്നും വിമർശകർ ആരോപിക്കുന്നു. അതേസമയം വനവ്യവസായം പുനരുജ്ജീവിപ്പിക്കുന്നതിന്റെ ഭാഗമായി മരംവെട്ട് വർധിപ്പിക്കുമെന്ന പ്രവിശ്യാ സർക്കാരിന്റെ പ്രഖ്യാപനവും വിവാദങ്ങൾക്ക് വഴിവെച്ചിരിക്കുകയാണ്.

വനങ്ങൾ നഷ്ടപ്പെടുന്നതിന്റെ പ്രത്യാഘാതം പരിസ്ഥിതിയിലൊതുങ്ങുന്നില്ലെന്ന് വിദഗ്ധർ മുന്നറിയിപ്പ് നൽകുന്നു. ആയിരക്കണക്കിന് വർഷങ്ങളായി രൂപപ്പെട്ട ഈ വനങ്ങളുടെ ആവാസവ്യവസ്ഥ നശിച്ചാൽ അതേ രൂപത്തിൽ വീണ്ടും വീണ്ടെടുക്കാൻ സഹസ്രാബ്ദങ്ങൾ വേണ്ടിവരുമെന്നാണ് വനപരിസ്ഥിതി ശാസ്ത്രജ്ഞർ പറയുന്നത്. സാൽമൺ മത്സ്യങ്ങൾ, അപൂർവ പക്ഷികൾ തുടങ്ങി നൂറുകണക്കിന് ജീവജാലങ്ങളുടെ നിലനിൽപ്പും ഈ വനങ്ങളെ ആശ്രയിച്ചാണ്.

അതേസമയം, വനവ്യവസായം ബ്രിട്ടീഷ് കൊളംബിയയുടെ സമ്പദ്‌വ്യവസ്ഥയുടെ പ്രധാന അധിഷ്ഠാനമാണെന്നും ഏകദേശം ഒരു ലക്ഷം നേരിട്ടും പരോക്ഷമായും തൊഴിൽ അവസരങ്ങൾ ഈ മേഖലയുമായി ബന്ധപ്പെട്ടിരിക്കുന്നുവെന്നും പ്രവിശ്യയുടെ വനംമന്ത്രി രവി പാർമർ പറഞ്ഞു. പഴയ വളർച്ചാ വനങ്ങളിലെ മരംവെട്ട് പൂർണമായും അവസാനിപ്പിച്ചാൽ വനവ്യവസായം ഉടൻ തകരുമെന്നും അദ്ദേഹം മുന്നറിയിപ്പ് നൽകി. പഴയ വനങ്ങളെ ആശ്രയിക്കുന്നത് കുറച്ച് രണ്ടാംഘട്ട വനങ്ങളിൽ നിന്നുള്ള മരം ഉപയോഗത്തിലേക്ക് വ്യവസായത്തെ ക്രമേണ മാറ്റാനുള്ള ശ്രമങ്ങളാണ് സർക്കാർ നടത്തുന്നതെന്നും അദ്ദേഹം വ്യക്തമാക്കി.

എന്നാൽ വനസംരക്ഷകരുടെ പോരാട്ടം അവസാനിക്കുന്നില്ല. പുതിയ വനനശീകരണ പദ്ധതികൾ പ്രഖ്യാപിക്കുന്നിടത്തെല്ലാം പ്രദേശവാസികളെയും ആദിവാസി സമൂഹങ്ങളെയും ഒന്നിപ്പിച്ച് പ്രതിഷേധം ശക്തമാക്കാനാണ് അവരുടെ തീരുമാനം. “നമ്മൾ ഇന്ന് പോരാടുന്നത് അവശേഷിക്കുന്ന വനങ്ങൾക്കുവേണ്ടിയാണ്. ശേഷിച്ചിരിക്കുന്നതെങ്കിലും സംരക്ഷിക്കണം,” എന്നാണ് പചീഡഹ്റ്റ് ഫസ്റ്റ് നേഷൻ സമൂഹത്തിലെ 86 വയസ്സുള്ള മുതിർന്ന അംഗം ബിൽ ജോൺസ് പറയുന്നത്.

/it-looked-like-a-war-zone-okanagan-chief-describes-devastation-after-bc-wildfire/

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt