കാനഡ കൂടുതൽ സുരക്ഷിതമാകുന്നുവോ? രാജ്യത്തെ ക്രൈം നിരക്ക് താഴേക്ക്; പുതിയ കണക്കുകൾ പറയുന്നത് ഇങ്ങനെ

ടൊറന്റോ: കാനഡയിൽ 2025-ൽ ഭൂരിഭാഗം വിഭാഗങ്ങളിലുമുള്ള കുറ്റകൃത്യങ്ങൾ കുറഞ്ഞതായി സ്റ്റാറ്റിസ്റ്റിക്സ് കാനഡയുടെ (Statistics Canada) പുതിയ കണക്കുകൾ വ്യക്തമാക്കുന്നു. ക്രൈം സിവിയാരിറ്റി ഇൻഡക്സ് (Crime Severity Index) പ്രകാരമുള്ള റിപ്പോർട്ടിൽ അക്രമരഹിത കുറ്റകൃത്യങ്ങൾ 5.3 ശതമാനവും അക്രമപരമായ കുറ്റകൃത്യങ്ങൾ 4.9 ശതമാനവും കുറഞ്ഞതായി രേഖപ്പെടുത്തിയിട്ടുണ്ട്. 2015-നുശേഷം നിരവധി വിഭാഗങ്ങളിൽ കുറ്റകൃത്യങ്ങൾ ഉയർന്നുവരികയായിരുന്നു. എന്നാൽ തുടർച്ചയായ രണ്ടാം വർഷമാണ് കുറവ് രേഖപ്പെടുത്തുന്നതെന്നാണ് അധികൃതർ വ്യക്തമാക്കുന്നത്.

കുറ്റകൃത്യങ്ങളുടെ എണ്ണം മാത്രമല്ല, അവയുടെ തീവ്രതയിലും കൂടുതൽ ഇടിവുണ്ടായതായി കണക്കുകൾ സൂചിപ്പിക്കുന്നു. അതേസമയം, ഔദ്യോഗിക കണക്കുകൾ കുറഞ്ഞ കുറ്റനിരക്കാണ് കാണിക്കുന്നതെങ്കിലും പൊതുജനങ്ങളുടെ സുരക്ഷാബോധം അതേ രീതിയിൽ മെച്ചപ്പെട്ടിട്ടില്ലെന്നാണ് വിദഗ്ധരുടെ വിലയിരുത്തൽ. ഫേസ്ബുക്ക്, ഇൻസ്റ്റഗ്രാം പോലുള്ള പ്ലാറ്റ്‌ഫോമുകൾ അക്രമ സംഭവങ്ങളുടെ വീഡിയോകൾ കൂടുതൽ ആളുകളിലേക്ക് എത്തിക്കുന്നതും കുറ്റകൃത്യങ്ങൾ വർധിക്കുകയാണെന്ന തോന്നൽ സൃഷ്ടിക്കുന്നുവെന്ന് മുൻ പൊലീസ് ഉദ്യോഗസ്ഥർ ചൂണ്ടിക്കാട്ടുന്നു.

കൂടാതെ രാജ്യതലത്തിലുള്ള ശരാശരി കണക്കുകൾ മാത്രം നോക്കുമ്പോൾ ഓരോ നഗരത്തിലെയും പ്രദേശങ്ങളിലെയും യഥാർത്ഥ സാഹചര്യം ഒരുപോലെ പ്രതിഫലിക്കണമെന്നില്ലെന്നും അവർ പറയുന്നു. 2025-ൽ വർധന രേഖപ്പെടുത്തിയ പ്രധാന വിഭാഗം 5,000 കാനഡൻ ഡോളറിന് താഴെയുള്ള ഷോപ്പ്‌ലിഫ്റ്റിംഗാണ്. ഈ വിഭാഗത്തിലെ കേസുകൾ 11 ശതമാനം ഉയർന്നു.

ജീവിതച്ചെലവ് വർധിച്ചതും സാമ്പത്തിക സമ്മർദ്ദങ്ങളും ലഹരി ഉപയോഗവുമായി ബന്ധപ്പെട്ട പ്രശ്നങ്ങളും ശിക്ഷാഭയം കുറഞ്ഞുവെന്ന ധാരണയും ഇതിന് കാരണമായിരിക്കാമെന്നാണ് കുറ്റകൃത്യ വിശകലന വിദഗ്ധരുടെ വിലയിരുത്തൽ. പ്രത്യേകിച്ച് ഒന്റാറിയോ ഉൾപ്പെടെ വിവിധ പ്രദേശങ്ങളിലെ വ്യാപാര സ്ഥാപനങ്ങളിൽ നിന്ന് സാധനങ്ങൾ വൻതോതിൽ മോഷ്ടിക്കുന്ന സംഭവങ്ങൾ റിപ്പോർട്ട് ചെയ്യപ്പെടുന്നുണ്ടെന്നും അവർ ചൂണ്ടിക്കാട്ടുന്നു.

ന്യൂ ബ്രൺസ്വിക്കും നുനാവുട്ടും ഒഴികെയുള്ള മിക്ക പ്രവിശ്യകളിലും ടെറിറ്ററികളിലും കുറ്റകൃത്യങ്ങൾ കുറഞ്ഞതായി റിപ്പോർട്ട് വ്യക്തമാക്കുന്നു. എന്നിരുന്നാലും, തുടർച്ചയായി രണ്ട് വർഷം മാത്രം കുറവ് രേഖപ്പെടുത്തിയതിന്റെ അടിസ്ഥാനത്തിൽ കാനഡയിൽ കുറ്റകൃത്യങ്ങൾ ദീർഘകാലമായി താഴോട്ടുള്ള പ്രവണതയിലാണെന്ന് ഉറപ്പിച്ച് പറയാൻ കഴിയില്ലെന്നാണ് സ്റ്റാറ്റിസ്റ്റിക്സ് കാനഡയുടെ നിലപാട്.

കുറഞ്ഞത് അഞ്ച് വർഷത്തേക്ക് തുടർച്ചയായി കുറ്റനിരക്കിൽ ഇടിവ് രേഖപ്പെടുത്തിയാൽ മാത്രമേ രാജ്യം കൂടുതൽ സുരക്ഷിതമായ ദിശയിലേക്ക് സ്ഥിരമായി നീങ്ങുകയാണെന്ന് വിലയിരുത്താനാകൂ എന്നും നിലവിലെ കണക്കുകൾ കോവിഡ് മഹാമാരിക്ക് മുമ്പുള്ള നിലയിലേക്കുള്ള ഒരു പുനഃക്രമീകരണമാകാനും സാധ്യതയുണ്ടെന്നും വിദഗ്ധർ അഭിപ്രായപ്പെടുന്നു.

Is Canada becoming safer? The country's crime rate is declining.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt