ടൊറന്റോ: കാനഡയിലേക്ക് കുടിയേറാൻ തയ്യാറെടുക്കുന്നവർക്കും നിലവിൽ അപേക്ഷ സമർപ്പിച്ചവർക്കും നിർണ്ണായകമായ അപ്ഡേറ്റുമായി ഐ.ആർ.സി.സി (IRCC). 2026 ജനുവരി 21 വരെയുള്ള കണക്കുകൾ പ്രകാരം മിക്ക ഇമിഗ്രേഷൻ വിഭാഗങ്ങളിലെയും പ്രോസസ്സിംഗ് സമയത്തിൽ കാര്യമായ മാറ്റങ്ങൾ വന്നിട്ടുണ്ട്. 80 ശതമാനം അപേക്ഷകരും നേരിടുന്ന യഥാർത്ഥ സമയപരിധിയാണ് ഇപ്പോൾ പുറത്തുവിട്ടിരിക്കുന്നത്.
സാമ്പത്തിക വിഭാഗത്തിൽ കനേഡിയൻ എക്സ്പീരിയൻസ് ക്ലാസ് (CEC) വഴി അപേക്ഷിക്കുന്നവർക്ക് വലിയ ആശ്വാസ വാർത്തയാണുള്ളത്. ഇവരുടെ പ്രോസസ്സിംഗ് സമയം ആറ് മാസമായി കുറഞ്ഞിരിക്കുന്നു. എന്നാൽ ഫെഡറൽ സ്കിൽഡ് വർക്കർ പ്രോഗ്രാം, എക്സ്പ്രസ് എൻട്രി വഴിയുള്ള പി.എൻ.പി എന്നിവയുടെ സമയപരിധി ഏഴ് മാസമായി വർദ്ധിച്ചു. സ്റ്റാർട്ട്-അപ്പ് വിസ, സെൽഫ് എംപ്ലോയ്ഡ് വിഭാഗങ്ങളിൽ അപേക്ഷിക്കുന്നവർ പത്ത് വർഷത്തിലധികം കാത്തിരിക്കേണ്ടി വരുന്ന സാഹചര്യമാണ് നിലവിലുള്ളത്.
കുടുംബാംഗങ്ങളെ സ്പോൺസർ ചെയ്യുന്ന കാര്യത്തിൽ കാനഡയ്ക്ക് പുറത്തുള്ള പങ്കാളികൾക്കായി 14 മാസമാണ് സമയം കണക്കാക്കുന്നത്. എന്നാൽ ക്യുബെക് പ്രവിശ്യയിൽ ഇത് 35 മാസത്തോളമാണ്. മാതാപിതാക്കളെയും മുത്തശ്ശീമുത്തശ്ശന്മാരെയും സ്പോൺസർ ചെയ്യുന്ന പ്രക്രിയയിൽ നേരിയ പുരോഗതിയുണ്ട്. പ്രൊട്ടക്റ്റഡ് പേഴ്സൺസ് വിഭാഗത്തിൽ കാനഡയ്ക്ക് പുറത്തുള്ളവർക്ക് 17 മാസത്തിനുള്ളിൽ നടപടികൾ പൂർത്തിയാക്കാൻ സാധിക്കുന്നു എന്നത് ശ്രദ്ധേയമാണ്.
ഇന്ത്യയിൽ നിന്നുള്ള അപേക്ഷകരെ സംബന്ധിച്ചിടത്തോളം സന്ദർശക വിസ ലഭിക്കാൻ ഇപ്പോൾ ശരാശരി 88 ദിവസത്തോളം കാത്തിരിക്കണം. ഇത് കഴിഞ്ഞ മാസത്തെ അപേക്ഷിച്ച് ഏഴ് ദിവസം കൂടുതലാണ്. സൂപ്പർ വിസയുടെ കാര്യത്തിൽ 212 ദിവസമാണ് ഇന്ത്യക്കാർക്കുള്ള കാത്തിരിപ്പ് സമയം. അതേസമയം പഠന വിസയുടെ നടപടികൾ വെറും നാല് ആഴ്ചയ്ക്കുള്ളിൽ പൂർത്തിയാകുന്നത് വിദ്യാർത്ഥികൾക്ക് ഗുണകരമാകും. വർക്ക് പെർമിറ്റ് നടപടികൾക്കായി എട്ട് ആഴ്ചയാണ് ഇന്ത്യക്കാർക്ക് വേണ്ടിവരുന്നത്.
പുതിയ പെർമനന്റ് റെസിഡന്റ് (PR) കാർഡിനായി 61 ദിവസവും കാർഡ് പുതുക്കുന്നതിനായി 35 ദിവസവുമാണ് ഇപ്പോൾ എടുക്കുന്നത്. സിറ്റിസൺഷിപ്പ് സർട്ടിഫിക്കറ്റുകൾ ലഭിക്കുന്നതിനുള്ള സമയം 10 മാസമായി വർദ്ധിച്ചിട്ടുണ്ട്. സെക്യൂരിറ്റി പരിശോധനകൾ, അപേക്ഷയിലെ കൃത്യത, ഉദ്യോഗസ്ഥരുടെ ജോലിഭാരം എന്നിവയനുസരിച്ച് ഓരോ വ്യക്തിയുടെയും അപേക്ഷയിൽ ഈ സമയപരിധികളിൽ മാറ്റം വരാമെന്ന് ഐ.ആർ.സി.സി വ്യക്തമാക്കുന്നു. അപേക്ഷകൾ വൈകാതിരിക്കാൻ എല്ലാ രേഖകളും കൃത്യമായി സമർപ്പിക്കാൻ അപേക്ഷകർ പ്രത്യേകം ശ്രദ്ധിക്കണം.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada Immigration: IRCC releases latest processing times
