വാഷിങ്ടൺ : യുഎസ് പ്രസിഡൻ്റ് ഡൊണാൾഡ് ട്രംപിൻ്റെ ഭീഷണികളിൽ പ്രതിഷേധിച്ച് സ്വിറ്റ്സർലൻഡിൽ നടന്നിരുന്ന സമാധാന ചർച്ചകളിൽ നിന്ന് ഇറാൻ പ്രതിനിധി സംഘം നാടകീയമായി ഇറങ്ങിപ്പോയി. സമ്മർദ്ദങ്ങൾക്കും ഭീഷണികൾക്കും വഴങ്ങി ചർച്ച തുടരാനാകില്ലെന്ന് വ്യക്തമാക്കിയ ഇറാൻ, ഇനി അമേരിക്കയുമായി നേരിട്ടുള്ള ചർച്ചകൾക്കില്ലെന്ന കർശന നിലപാടിലാണ്. ഭീഷണികളോ നിർബന്ധങ്ങളോ പാടില്ലെന്ന കരാറിലെ ആദ്യ വ്യവസ്ഥ ലംഘിച്ചുകൊണ്ട്, ട്രംപ് ഇറാൻ പ്രസിഡൻ്റിനും ചർച്ചാ സംഘത്തിനുമെതിരെ പ്രകോപനപരമായ പരാമർശങ്ങൾ നടത്തിയതാണ് പ്രതിസന്ധിക്ക് കാരണമായതെന്ന് ഇറാൻ പാർലമെൻ്റ് സ്പീക്കർ മുഹമ്മദ് ബാഗർ ഗാലിബാഫ് വെളിപ്പെടുത്തി.
ചർച്ചാ മേശ വിട്ടതിന് പിന്നാലെ മധ്യസ്ഥർ വഴി വീണ്ടും കൂടിക്കാഴ്ച നടത്താനുള്ള യുഎസിൻ്റെ ആവശ്യം ഇറാൻ പൂർണ്ണമായി നിരസിച്ചു. യുഎസ് വിഭാഗവുമായി ഇനി നേരിട്ട് സംസാരിക്കില്ലെന്നും എന്നാൽ ചർച്ചകളിൽ മധ്യസ്ഥത വഹിക്കുന്ന ഖത്തർ, പാകിസ്ഥാൻ പ്രതിനിധികളുമായി ആശയവിനിമയം തുടരുമെന്നും ഗാലിബാഫ് യുഎസ് വൈസ് പ്രസിഡൻ്റ് ജെ.ഡി. വാൻസിനെ അറിയിച്ചു. ടെഹ്റാൻ്റെ പരമാധികാരത്തെയും ആത്മാഭിമാനത്തെയും ചോദ്യം ചെയ്യുന്ന തരത്തിലുള്ള യാതൊരുവിധ നീക്കങ്ങളും അനുവദിക്കില്ലെന്ന ശക്തമായ സന്ദേശമാണ് ഇറാൻ ഇതിലൂടെ നൽകുന്നത്.
അതേസമയം, നാടകീയ രംഗങ്ങൾക്കൊടുവിൽ അലസിപ്പിരിഞ്ഞ 80 മിനിറ്റ് നീണ്ട ഈ ചർച്ചകളുടെ വിശദാംശങ്ങൾ മധ്യസ്ഥ രാജ്യങ്ങളായ പാകിസ്ഥാനും ഖത്തറും സംയുക്ത പ്രസ്താവനയിലൂടെ പുറത്തുവിട്ടു. ചർച്ചകൾ പോസിറ്റീവും ക്രിയാത്മകവുമായിരുന്നു എന്നാണ് ഇവരുടെ വിലയിരുത്തൽ. ആണവ പ്രശ്നങ്ങൾ, ഉപരോധങ്ങൾ, തർക്ക പരിഹാര സംവിധാനങ്ങൾ എന്നിവ പരിഹരിക്കുന്നതിനായി ഇരുപക്ഷത്തെയും ചീഫ് നെഗോഷ്യേറ്റർമാർ ഉൾപ്പെടുന്ന ഒരു ഉന്നതതല രാഷ്ട്രീയ മേൽനോട്ട സമിതിക്കും വിവിധ വർക്കിംഗ് ഗ്രൂപ്പുകൾക്കും രൂപം നൽകാൻ ചർച്ചയിൽ ധാരണയായിട്ടുണ്ടെന്നും മധ്യസ്ഥർ വ്യക്തമാക്കി.
Iran, angered by Trump’s threat, withdraws from direct talks with the US
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
