എഡ്മൺണ്ടൻ : കാനഡയിലെ നോർത്തേൺ ആൽബർട്ടയിലെ ജോൺ ഡി’ഓർ പ്രെയറിയിൽ അഞ്ചാംപനി (മീസിൽസ്) രോഗം സ്ഥിരീകരിച്ചതായി ആരോഗ്യ അധികാരികൾ അറിയിച്ചു. ലിറ്റിൽ റെഡ് റിവർ ക്രീ നേഷൻ എന്ന ആദിവാസി കമ്മ്യൂണിറ്റിയുടെ ഭാഗമായ ഈ പ്രദേശത്ത് ഒരേ കുടുംബത്തിലെ മൂന്ന് അംഗങ്ങൾക്കാണ് രോഗം സ്ഥിരീകരിച്ചത്. 2025-ൽ ആൽബർട്ടയിൽ റിപ്പോർട്ട് ചെയ്യപ്പെടുന്ന ആദ്യത്തെ അഞ്ചാംപനി കേസുകളാണിതെന്ന് കരുതപ്പെടുന്നു.
രോഗബാധിതരിൽ രണ്ടുപേരെ ആശുപത്രിയിൽ പ്രവേശിപ്പിച്ചിരുന്നെങ്കിലും ഇപ്പോൾ അവർ വീട്ടിലേക്ക് മടങ്ങി ഐസൊലേഷനിൽ കഴിയുകയാണ്. രോഗം എവിടെ നിന്ന് വന്നുവെന്ന് വ്യക്തമല്ലെങ്കിലും, ആദിവാസി സമൂഹത്തിന് പുറത്തുനിന്ന് വന്നതാകാനാണ് സാധ്യതയെന്ന് ആരോഗ്യ വിദഗ്ധർ പറയുന്നു.
ഇപ്പോൾ രോഗബാധിതരുമായി സമ്പർക്കം പുലർത്തിയവരെ കണ്ടെത്താനുള്ള ശ്രമങ്ങൾ നടക്കുന്നുണ്ട്. അഞ്ചാംപനിയുടെ 10 ദിവസത്തെ ഇൻകുബേഷൻ കാലയളവ് കഴിയുന്നതുവരെ രോഗം എത്രത്തോളം വ്യാപിച്ചുവെന്ന് വ്യക്തമാകില്ല.
ഹെൽത്ത് കാനഡയും ഇൻഡിജിനസ് സർവീസസ് കാനഡയും പ്രാദേശിക അധികാരികളുമായി ചേർന്ന് രോഗം നിയന്ത്രിക്കാനുള്ള നടപടികൾ സ്വീകരിച്ചുവരുന്നു. പ്രാദേശിക സ്കൂൾ ജിമ്നേഷ്യത്തിൽ വാക്സിനേഷൻ ക്യാമ്പ് സംഘടിപ്പിക്കാനുള്ള തീരുമാനം എടുത്തിട്ടുണ്ട്.
അഞ്ചാംപനി ലക്ഷണങ്ങളായ പനി, ചുമ, തൊണ്ടവേദന, ചുവന്ന പാടുകൾ എന്നിവ കണ്ടാൽ ഉടൻ തന്നെ ആരോഗ്യ കേന്ദ്രവുമായി ബന്ധപ്പെടണമെന്ന് അധികൃതർ ജനങ്ങളോട് അഭ്യർത്ഥിച്ചിട്ടുണ്ട്. ഈ സമയത്ത് അനാവശ്യ യാത്രകൾ ഒഴിവാക്കുകയും, ശുചിത്വം പാലിക്കുകയും ചെയ്യണമെന്നും നിർദേശിച്ചിട്ടുണ്ട്.
