ഒട്ടാവ: കാനഡയിൽ ജോലി ചെയ്യുന്ന ഇന്ത്യൻ പ്രോഡക്ട് മാനേജർ കരൺ ഗോഗ്ന പങ്കുവെച്ച ഒരു ലിങ്ക്ഡ്ഇൻ കുറിപ്പാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. അവസാനഘട്ട അഭിമുഖത്തിൽ താൻ ചോദിച്ച ഒരു ചോദ്യം തന്റെ ജോലി നഷ്ടപ്പെടുത്താൻ കാരണമായി എന്ന് അദ്ദേഹം പറയുന്നു.
ഒരു പ്രമുഖ സ്റ്റാർട്ടപ്പിൽ പ്രോഡക്ട് മാനേജർ തസ്തികയിലേക്കുള്ള അഭിമുഖമായിരുന്നു അത്. എല്ലാ റൗണ്ടുകളും വിജയകരമായി പൂർത്തിയാക്കിയ ശേഷം, അവസാനഘട്ടമായി സിഇഒയുമായി സംസാരിക്കാൻ അദ്ദേഹത്തിന് അവസരം ലഭിച്ചു. മികച്ച രീതിയിൽ തന്നെയായിരുന്നു അഭിമുഖം നടന്നത്. അഭിമുഖത്തിന്റെ അവസാനം സിഇഒ എന്തെങ്കിലും ചോദിക്കാനുണ്ടോ എന്ന് ചോദിച്ചപ്പോൾ, താൻ വളരെ ആലോചിച്ച് ചോദിച്ച ചോദ്യമായിരുന്നു അത്: “നിങ്ങൾ ഇരുചക്രവാഹന വിപണിയിലേക്ക് (two-wheeler market) കടന്നുകയറാൻ പദ്ധതിയുണ്ടോ?”
എന്നാൽ സിഇഒ മറുപടി നൽകുന്നതിന് പകരം തിരിച്ചൊരു ചോദ്യമാണ് ചോദിച്ചത്: “നിങ്ങളെന്താണ് കരുതുന്നത്? ഞങ്ങൾ അത് ചെയ്യണോ?” കമ്പനിയുടെ ഫോർവീലർ വാഹനവിപണിയുമായി ബന്ധപ്പെട്ട കാര്യങ്ങൾ നന്നായി പഠിച്ചുവന്ന തനിക്ക്, ഇരുചക്രവാഹന വിപണിയെക്കുറിച്ച് വ്യക്തമായ ധാരണയൊന്നുമില്ലായിരുന്നു. ഇതോടെ താൻ ആശയക്കുഴപ്പത്തിലാവുകയും അർത്ഥവത്തായ ഒരു മറുപടി നൽകാൻ കഴിയാതെ വരികയും ചെയ്തു. പിറ്റേദിവസം തന്നെ തനിക്ക് ജോലി ലഭിക്കില്ലെന്ന് എച്ച്ആർ വിഭാഗം അറിയിക്കുകയായിരുന്നു.
തന്റെ അഭിമുഖം പരാജയപ്പെടാൻ കാരണം ആ ചോദ്യമാണെന്ന് വർഷങ്ങൾക്ക് ശേഷം കരൺ തിരിച്ചറിയുന്നു. അഭിമുഖത്തിനായി ഉദ്യോഗാർത്ഥികൾ ഉത്തരങ്ങൾ മാത്രം തയ്യാറാക്കിയാൽ പോരാ, ചോദിക്കേണ്ട ചോദ്യങ്ങളെക്കുറിച്ചും മുൻകൂട്ടി ചിന്തിക്കണമെന്ന് അദ്ദേഹം പറയുന്നു. സിഇഒയുടെ ചോദ്യം ഒരു വെല്ലുവിളിയായിരുന്നുവെന്നും, അപ്രതീക്ഷിത ചോദ്യങ്ങളെ എങ്ങനെ കൈകാര്യം ചെയ്യുന്നു എന്നതാണ് പലപ്പോഴും അവർ നിരീക്ഷിക്കുന്നതെന്നും അദ്ദേഹം കൂട്ടിച്ചേർത്തു.
സോഷ്യൽ മീഡിയയിൽ ഈ പോസ്റ്റ് വലിയ ചർച്ചകൾക്കാണ് വഴിവെച്ചിരിക്കുന്നത്. പലരും തങ്ങളുടെ സമാനമായ അനുഭവങ്ങൾ പങ്കുവെക്കുമ്പോൾ, ചിലർ പറയുന്നത് സിഇഒയുടെ ചോദ്യത്തിന് മറുപടി നൽകാൻ കഴിയാത്തതല്ല, മറിച്ച് അപ്രതീക്ഷിത സാഹചര്യങ്ങളെ നേരിടാനുള്ള കഴിവില്ലായ്മയാണ് തിരിച്ചടിക്ക് കാരണമെന്നാണ്.
Indian Man In Canada Says He Lost Job Offer By Asking CEO ‘One Question
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
