“ഖലിസ്ഥാൻ വിഘടനവാദം കാനഡയുടെ പ്രശ്നം, ഇന്ത്യയുടേതല്ല”: നിലപാട് വ്യക്തമാക്കി കാനഡയിലെ ഇന്ത്യൻ ഹൈക്കമ്മീഷണർ

ഒട്ടാവ: കാനഡയിലെ ഖലിസ്ഥാൻ ഭീഷണികളെ ഇന്ത്യയുടെ പ്രശ്‌നമായി കാണേണ്ടെന്നും, അത് കാനഡയുടെ ആഭ്യന്തര പ്രശ്നമായി കണക്കാക്കണമെന്നും കാനഡയിലെ ഇന്ത്യൻ ഹൈക്കമ്മിഷണർ ദിനേഷ് പട്നായിക്. ഇന്ത്യൻ നയതന്ത്ര ഉദ്യോഗസ്ഥരെ ക്രിമിനൽ പ്രവർത്തനങ്ങളുമായി ബന്ധിപ്പിച്ചുള്ള ആരോപണങ്ങൾ അദ്ദേഹം അസംബന്ധവും അടിസ്ഥാനരഹിതവുമാണ് എന്ന് പറഞ്ഞ് തള്ളിക്കളഞ്ഞു. കനേഡിയൻ മാധ്യമത്തിന് നൽകിയ അഭിമുഖത്തിലാണ് പട്നായിക് ഇന്ത്യ-കാനഡ ബന്ധങ്ങളിലെ സമീപകാല സംഭവവികാസങ്ങളെക്കുറിച്ച് സംസാരിച്ചത്.

ഇന്ത്യ-കാനഡ ബന്ധങ്ങളെക്കുറിച്ച്

ഇരു രാജ്യങ്ങളും തമ്മിലുള്ള നയതന്ത്ര ചർച്ചകളിൽ മൊത്തത്തിലുള്ള സുരക്ഷാ സാഹചര്യം പ്രധാന വിഷയമാണെന്ന് ദിനേഷ് പട്നായിക് പറഞ്ഞു. “ഈ രാജ്യത്ത് സംഭവിക്കുന്ന വിവിധ സുരക്ഷാ സാഹചര്യങ്ങളെക്കുറിച്ചാണ് ഞങ്ങൾ സംസാരിക്കുന്നത്. ഒരു കൂട്ടം ആളുകൾ ഭീഷണിപ്പെടുത്തുകയും ബന്ധങ്ങളെ ബന്ദിയാക്കുകയും ചെയ്യുന്ന സാഹചര്യങ്ങൾ… അവരെ എങ്ങനെ കൈകാര്യം ചെയ്യും? ഈ നിയമ പ്രശ്നം എങ്ങനെ പരിഹരിക്കും?” അദ്ദേഹം ചോദിച്ചു. കാനഡ അതിർത്തിക്കുള്ളിലെ സിഖ് വേർതിരിവ് വാദത്തെ എതിർക്കാത്ത കനേഡിയൻ നിലപാടിനെതിരെ ഇന്ത്യ ദീർഘകാലമായി വിമർശനം ഉന്നയിക്കുന്നുണ്ട്.

ഖലിസ്ഥാൻ വിഘടനവാദത്തിന് പിന്നിൽ പ്രവർത്തിക്കുന്നത് കനേഡിയൻ പൗരന്മാർ തന്നെയാണെന്ന് സ്ഥാനപതി ഊന്നിപ്പറഞ്ഞു. ഈ സാഹചര്യത്തെ കാനഡയ്ക്ക് ഇത് ഒരു ഇന്ത്യൻ പ്രശ്‌നമായി കാണാൻ കഴിയില്ല. ഇത് ഒരു കനേഡിയൻ പ്രശ്‌നമാണ്. ഈ പ്രശ്നം സൃഷ്ടിക്കുന്നത് കാനഡക്കാരാണ്.

“ഇവിടെയുള്ള ഒരു ഹൈക്കമ്മിഷണർക്ക് സുരക്ഷാ വലയത്തിൽ കഴിയേണ്ടിവരുന്നത് വിചിത്രമായി തോന്നുന്നു. ഞാൻ സംരക്ഷണത്തിലാണ്. ഇങ്ങനെയുള്ള ഒരു രാജ്യത്ത് ഞാൻ സംരക്ഷണത്തിലായിരിക്കേണ്ട കാര്യമില്ല,” അദ്ദേഹം പറഞ്ഞു.

ട്രൂഡോയുടെ ആരോപണങ്ങൾ തള്ളി

സിഖ് വിഘടനവാദി നേതാവ് ഹർദീപ് സിങ് നിജ്ജാറിൻ്റെ കൊലപാതകത്തിൽ ഇന്ത്യൻ ഏജൻ്റുമാർക്ക് പങ്കുണ്ടെന്ന മുൻ കനേഡിയൻ പ്രധാനമന്ത്രി ജസ്റ്റിൻ ട്രൂഡോയുടെ ആരോപണങ്ങളെയും ദിനേഷ് പട്നായിക് തള്ളിക്കളഞ്ഞു. ഈ ആരോപണങ്ങൾ അടിസ്ഥാനരഹിതവും അസംബന്ധവുമാണ് എന്നും, “തെളിവുകളില്ലാതെയാണ് ഉന്നയിച്ചതെന്നും അദ്ദേഹം പറഞ്ഞു.

മാർക്ക് കാർണിയുടെ നേതൃത്വത്തിന് പ്രശംസ

ഇന്ത്യയുമായുള്ള ബന്ധം സാധാരണ നിലയിലാക്കുന്നതിൽ കാനഡയുടെ പുതിയ പ്രധാനമന്ത്രി മാർക്ക് കാർണി വളരെ വലിയ പങ്ക് വഹിച്ചതായി ഇന്ത്യൻ ഹൈക്കമ്മിഷണർ പ്രശംസിച്ചു. ബന്ധങ്ങളിലെ പുരോഗതി അനിവാര്യമായിരുന്നെങ്കിലും കാർണിയുടെ നേതൃത്വം ഈ പ്രക്രിയയ്ക്ക് വേഗത കൂട്ടിയെന്ന് അദ്ദേഹം ചൂണ്ടിക്കാട്ടി.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

Indian Envoy On Khalistan Extremism In Canada