താരിഫ് തർക്കത്തിന്റെ നിഴലിൽ ഗോർഡി ഹോവ് പാലം യാഥാർഥ്യമായി; ഉദ്ഘാടനച്ചടങ്ങിൽ അമേരിക്ക വിട്ടുനിന്നു

വിൻഡ്സർകാനഡയിലെ വിൻഡ്സറിനെയും അമേരിക്കയിലെ ഡെട്രോയിറ്റിനെയും ബന്ധിപ്പിക്കുന്ന ഗോർഡി ഹോവ് ഇന്റർനാഷണൽ ബ്രിഡ്ജിന്റെ ഔദ്യോഗിക ഉദ്ഘാടനച്ചടങ്ങ് വെള്ളിയാഴ്ച വിൻഡ്സറിൽ നടന്നു. കാനഡ സർക്കാരിന്റെ നേതൃത്വത്തിൽ നടന്ന ചടങ്ങിൽ അമേരിക്കൻ പ്രതിനിധികൾ പങ്കെടുത്തിരുന്നില്ല.അമേരിക്കൻ പ്രതിനിധികൾ ചടങ്ങിൽ പങ്കെടുത്തിരുന്നില്ല. കാനഡ സർക്കാർ, ഒന്റാറിയോ സർക്കാർ, വിൻഡ്സർ-ഡെട്രോയിറ്റ് ബ്രിഡ്ജ് അതോറിറ്റി (WDBA), നിർമാണ പങ്കാളികളായ ബ്രിഡ്ജിംഗ് നോർത്ത് അമേരിക്ക, ഹോക്കി ഇതിഹാസം ഗോ‍ർഡി ഹോവിന്റെ കുടുംബാംഗങ്ങൾ തുടങ്ങിയവർ ചടങ്ങിൽ പങ്കെടുത്തു. തിങ്കളാഴ്ച ഉച്ചയോടെ പാലം ഗതാഗതത്തിനായി തുറക്കുമെന്നാണ് WDBA അറിയിച്ചിട്ടുള്ളത്.

കാനഡയും അമേരിക്കയും സംയുക്തമായി ഉദ്ഘാടനം നടത്താനിരുന്ന പദ്ധതി അവസാന നിമിഷം റദ്ദാക്കുകയായിരുന്നു. അമേരിക്ക പ്രഖ്യാപിച്ച 50 ശതമാനം താരിഫ് ഭീഷണിയുടെ പശ്ചാത്തലത്തിൽ സംയുക്ത ആഘോഷം നടത്തുന്നത് ഉചിതമല്ലെന്ന നിലപാടാണ് കാനഡ സ്വീകരിച്ചത്. ഇതോടെ ഒരു അമേരിക്കൻ ഉദ്യോഗസ്ഥനും ചടങ്ങിൽ പങ്കെടുത്തില്ല. ചടങ്ങ് പുരോഗമിക്കുന്നതിനിടെ അമേരിക്കൻ പ്രസിഡന്റ് ഡൊണാൾഡ് ട്രംപ് സമൂഹമാധ്യമമായ ട്രൂത്ത് സോഷ്യലിലൂടെ, “കാനഡ അമേരിക്കയെ ചടങ്ങിൽ നിന്ന് ഒഴിവാക്കി” എന്ന് ആരോപിച്ചു. പാലവുമായി ബന്ധപ്പെട്ട പുതിയ ധാരണപ്രകാരം ആദ്യ 15 വർഷത്തേക്ക് പാലത്തിൽ നിന്നുള്ള ശുദ്ധവരുമാനത്തിന്റെ 50 ശതമാനം അമേരിക്കയ്ക്ക് ലഭിക്കുമെന്നും അദ്ദേഹം അവകാശപ്പെട്ടു.

അതേസമയം, കാനഡയുടെ ഹൗസിംഗ് ആൻഡ് ഇൻഫ്രാസ്ട്രക്ചർ മന്ത്രി ഗ്രെഗർ റോബർട്സൺ, തിങ്കളാഴ്ച തന്നെ പാലം തുറക്കുമെന്ന പ്രതീക്ഷ സർക്കാർ തുടരുന്നതായി വ്യക്തമാക്കി. കാനഡയുടെ ഭാഗത്തെ എല്ലാ സംവിധാനങ്ങളും പൂർണ സജ്ജമാണെന്നും അമേരിക്കൻ ഭാഗവും തയ്യാറായിട്ടുണ്ടെന്നാണ് മനസ്സിലാക്കുന്നതെന്നും അദ്ദേഹം പറഞ്ഞു. “ഈ പാലം കാനഡയും അമേരിക്കയും ഒരുമിച്ച് പ്രവർത്തിച്ചാൽ എന്തെല്ലാം സാധ്യമാകുമെന്ന് തെളിയിക്കുന്ന പ്രതീകമാണ്. വിൻഡ്സറിനും ഡെട്രോയിറ്റിനും ഇടയിലെ ജനങ്ങൾക്കും വ്യാപാര മേഖലയ്ക്കും ഏറെ പ്രതീക്ഷയുള്ള പദ്ധതിയാണിത്,” അദ്ദേഹം കൂട്ടിച്ചേർത്തു.

ചടങ്ങിൽ പങ്കെടുത്ത ഒന്റാറിയോ പ്രീമിയർ ഡഗ് ഫോർഡ്, കാനഡക്കാരും അമേരിക്കക്കാരും പരസ്പരം സ്നേഹിക്കുന്നവരാണെന്നും ഇരു രാജ്യങ്ങളും ഒരുമിച്ച് പ്രവർത്തിക്കുമ്പോഴാണ് കൂടുതൽ നേട്ടങ്ങൾ കൈവരിക്കാനാകുകയെന്നും പറഞ്ഞു. എന്നാൽ പുതിയ അമേരിക്കൻ താരിഫുകൾ നടപ്പായാൽ ഒന്റാറിയോ ശക്തമായി പ്രതികരിക്കുമെന്നും അദ്ദേഹം മുന്നറിയിപ്പ് നൽകി.

പാലത്തിന് പേരുനൽകപ്പെട്ട ഹോക്കി ഇതിഹാസം ഗോ‍ർഡി ഹോവിന്റെ ഇളയമകൻ ഡോ. മുറേ ഹോവ്, പിതാവിന്റെ പേരിൽ അന്താരാഷ്ട്ര പാലം ഉയർന്നത് കുടുംബത്തിന് അഭിമാന നിമിഷമാണെന്ന് പറഞ്ഞു. 2015-ൽ പാലത്തിന് പിതാവിന്റെ പേര് നൽകുമെന്ന് അറിയിച്ചപ്പോൾ, “അതൊക്കെ നന്നായിരിക്കും” എന്നായിരുന്നു അദ്ദേഹത്തിന്റെ പ്രതികരണമെന്നും അദ്ദേഹം ഓർത്തെടുത്തു.

അഞ്ച് പതിറ്റാണ്ടോളം നീണ്ട കരിയറിലൂടെ കാനഡയെയും അമേരിക്കയെയും കായികരംഗത്ത് കൂടുതൽ അടുപ്പിച്ച വ്യക്തിയായിരുന്നു ഗോ‍ർഡി ഹോവെന്ന് ചടങ്ങിൽ പങ്കെടുത്തവർ അനുസ്മരിച്ചു. ഏകദേശം 25 വർഷത്തെ ആസൂത്രണത്തിനും എട്ട് വർഷത്തെ നിർമാണത്തിനും ശേഷമാണ് പാലം യാഥാർഥ്യമായത്. 2018-ൽ ആരംഭിച്ച നിർമാണത്തിൽ 15,800-ലധികം തൊഴിലാളികൾ 20.1 ദശലക്ഷം മണിക്കൂർ ജോലി ചെയ്തു.

ഡെട്രോയിറ്റ് നദിക്ക് കുറുകെ 2.5 കിലോമീറ്റർ നീളത്തിൽ നിർമ്മിച്ചിരിക്കുന്ന ഈ കേബിൾ-സ്റ്റേയ്ഡ് പാലത്തിൽ ആറ് ഗതാഗത പാതകളും 16 ടോൾ ലെയിനുകളും 60 പരിശോധനാ ലെയിനുകളും ഒരുക്കിയിട്ടുണ്ട്. മണിക്കൂറിൽ 400-ഓളം വാണിജ്യ വാഹനങ്ങൾ കടന്നുപോകാൻ കഴിയുന്ന ഈ പാലത്തിന്റെ സേവനകാലം 125 വർഷമെന്നാണ് കണക്കാക്കുന്നത്.

6.4 ബില്യൺ ഡോളർ ചെലവിൽ നിർമിച്ച പദ്ധതിയുടെ ഭാഗമായി ആദ്യം മുഴുവൻ ടോൾ വരുമാനവും കാനഡയ്ക്ക് ലഭിക്കുമെന്നായിരുന്നു 2012-ലെ കരാർ. എന്നാൽ പുതിയ തത്വധാരണ പ്രകാരം ആദ്യ 15 വർഷക്കാലം പാലത്തിൽ നിന്നുള്ള ശുദ്ധവരുമാനത്തിന്റെ 50 ശതമാനം അമേരിക്കയുമായി പങ്കിടാനാണ് തീരുമാനിച്ചിരിക്കുന്നത്. ഇരു രാജ്യങ്ങളും തമ്മിലുള്ള വ്യാപാരത്തിനും ചരക്ക് ഗതാഗതത്തിനും പുതിയ കരുത്തേകുന്ന ഈ പാലം, നിലവിലെ രാഷ്ട്രീയ-വ്യാപാര സംഘർഷങ്ങൾക്കിടയിലും വടക്കേ അമേരിക്കയിലെ ഏറ്റവും പ്രധാനപ്പെട്ട അതിർത്തി അടിസ്ഥാനസൗകര്യ പദ്ധതികളിലൊന്നായി വിലയിരുത്തപ്പെടുന്നു.

Gordie Howe Bridge becomes reality amidst tariff dispute; US stays away from inauguration ceremony.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt