കൊൽക്കത്ത: അഞ്ച് തവണ ലോക ചാമ്പ്യന്മാരായ ബ്രസീൽ ഫുട്ബോൾ ടീം ഒക്ടോബർ 3-ന് ഇന്ത്യയ്ക്കെതിരെ കൊൽക്കത്തയിൽ സൗഹൃദ മത്സരം കളിച്ചേക്കുമെന്ന് റിപ്പോർട്ട്. 2026 ലോകകപ്പിന് മുന്നോടിയായുള്ള ഫിഫ വിൻഡോയുടെ ഭാഗമായാണ് മത്സരം സംഘടിപ്പിക്കുന്നത്. ബ്രസീലിയൻ മാധ്യമമായ ‘ജി ഇ ഗ്ലോബോ’യാണ് (GE Globo) ഈ വിവരങ്ങൾ പുറത്തുവിട്ടത്. മത്സരം നടക്കുകയാണെങ്കിൽ അത് ഇന്ത്യൻ ഫുട്ബോൾ ചരിത്രത്തിലെ തന്നെ ഏറ്റവും വലിയ സംഭവങ്ങളിൽ ഒന്നായി മാറും.
തങ്ങളുടെ ഫിഫ വിൻഡോയുടെ ഭാഗമായി മൂന്ന് സൗഹൃദ മത്സരങ്ങളാണ് ബ്രസീൽ ആസൂത്രണം ചെയ്യുന്നത്. ഇതിൽ ആദ്യത്തെ രണ്ട് മത്സരങ്ങൾ ഓസ്ട്രേലിയയിൽ വെച്ചാണ് നടക്കുക. സെപ്റ്റംബർ 25-ന് ടൗൺസ്വില്ലെയിലും സെപ്റ്റംബർ 29-ന് ബ്രിസ്ബേനിലുമാണ് ഓസ്ട്രേലിയയ്ക്കെതിരെയുള്ള മത്സരങ്ങൾ നിശ്ചയിച്ചിട്ടുള്ളത്. ഇതിനുശേഷമായിരിക്കും ഒക്ടോബർ 3-ന് മൂന്നാമത്തെ മത്സരത്തിനായി ബ്രസീൽ ടീം ഇന്ത്യയിലെത്തുക.
1977-ൽ ലോക ഫുട്ബോൾ ഇതിഹാസം പെലെ മോഹൻ ബഗാനെതിരെ കളിക്കാൻ കൊൽക്കത്തയിലെ ഈഡൻ ഗാർഡൻസിൽ എത്തിയിരുന്നു. അന്നുതൊട്ടേ ബ്രസീലിയൻ ഫുട്ബോളിനോട് കൊൽക്കത്തയ്ക്ക് പ്രത്യേകമായൊരു ആത്മബന്ധമുണ്ട്. കഴിഞ്ഞ ലോകകപ്പ് കാലത്തും നഗരത്തിലുടനീളം വലിയ രീതിയിലുള്ള പിന്തുണയാണ് ബ്രസീൽ ടീമിന് ലഭിച്ചത്. നിലവിൽ മത്സരവുമായി ബന്ധപ്പെട്ട ഔദ്യോഗിക സ്ഥിരീകരണവും കരാറുകളും പുറത്തുവരാനുണ്ടെങ്കിലും, വാർത്തകൾ പുറത്തുവന്നതോടെ വലിയ പ്രതീക്ഷയിലാണ് കായികപ്രേമികൾ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
They are coming... An 'India vs. Brazil' football clash in Kolkata?
