ന്യൂ ഡൽഹി : ഇന്ത്യ വെറുമൊരു വിപണി മാത്രമല്ല, മറിച്ച് ആഗോള വളർച്ചയുടെ വലിയൊരു ലോഞ്ച്പാഡാണെന്ന് പ്രധാനമന്ത്രി നരേന്ദ്ര മോദി. ഓക്ലൻഡിൽ നടന്ന ‘ഇന്ത്യ-ന്യൂസിലൻഡ് ബിസിനസ് ആൻഡ് സ്പോർട്സ് എൻഗേജ്മെന്റ്’ പരിപാടിയിൽ ന്യൂസിലൻഡിലെ പ്രമുഖ ബിസിനസ്സ് നേതാക്കളെ അഭിസംബോധന ചെയ്യുകയായിരുന്നു അദ്ദേഹം. ഇരുരാജ്യങ്ങളും തമ്മിൽ ഒപ്പുവെച്ച ചരിത്രപരമായ സ്വതന്ത്ര വ്യാപാര കരാറിന് (FTA) തൊട്ടുപിന്നാലെയാണ് സാമ്പത്തിക-തന്ത്രപരമായ ബന്ധങ്ങൾ കൂടുതൽ ശക്തമാക്കുന്നതിനുള്ള വിപുലമായ ഒരു റോഡ്മാപ്പ് ഇരുരാജ്യങ്ങളും പുറത്തിറക്കിയത്. 40 വർഷത്തിന് ശേഷം ഒരു ഇന്ത്യൻ പ്രധാനമന്ത്രി ന്യൂസിലൻഡ് സന്ദർശിക്കുന്നു എന്ന പ്രത്യേകതയും ഈ കൂടിക്കാഴ്ചയ്ക്കുണ്ട്.
റെക്കോർഡ് ഒമ്പത് മാസം കൊണ്ട് ഒപ്പുവെച്ച എഫ്ടിഎ ഇരുരാജ്യങ്ങളും തമ്മിലുള്ള വിപണി പങ്കാളിത്തം, സാങ്കേതികവിദ്യ, സേവനങ്ങൾ, നിക്ഷേപം എന്നിവയ്ക്ക് പുതിയ അവസരങ്ങൾ തുറക്കുമെന്ന് പ്രധാനമന്ത്രി വ്യക്തമാക്കി. വരും വർഷങ്ങളിൽ ഇരുരാജ്യങ്ങളും തമ്മിലുള്ള ഉഭയകക്ഷി വ്യാപാരം ഇരട്ടിയാക്കി 7 ബില്യൺ ന്യൂസിലൻഡ് ഡോളറിലേക്ക് (ഏകദേശം 35,000 കോടി രൂപ) എത്തിക്കാനാണ് ലക്ഷ്യമിടുന്നത്. കൂടാതെ, അടുത്ത 15 വർഷത്തിനുള്ളിൽ ഇന്ത്യയിൽ 20 ബില്യൺ യുഎസ് ഡോളർ നിക്ഷേപിക്കാനുള്ള ന്യൂസിലൻഡിന്റെ പ്രതിജ്ഞാബദ്ധതയെയും അദ്ദേഹം എടുത്തുപറഞ്ഞു. ഇത് വെറുമൊരു നിക്ഷേപമല്ല, ഇന്ത്യയുടെ വളർച്ചാ യാത്രയുടെ ഭാഗമാകാനുള്ള അവരുടെ ദൃഢനിശ്ചയമാണെന്നും അദ്ദേഹം കൂട്ടിച്ചേർത്തു.
ലോകത്തിലെ ഏറ്റവും വേഗത്തിൽ വളരുന്ന വലിയ സമ്പദ്വ്യവസ്ഥയാണ് ഇന്ത്യയെന്ന് വിശേഷിപ്പിച്ച പ്രധാനമന്ത്രി, രാജ്യത്ത് വികസിച്ചുകൊണ്ടിരിക്കുന്ന മധ്യവർഗവും വേഗത്തിലുള്ള ഡിജിറ്റൽ മുന്നേറ്റങ്ങളുമാണ് ഈ വളർച്ചയുടെ പ്രധാന ചാലകശക്തികളെന്ന് ചൂണ്ടിക്കാണിച്ചു. “പരിഷ്കരണം, പ്രകടനം, പരിവർത്തനം” (Reform, perform and transform) എന്ന തത്വമാണ് ഇന്ത്യയുടെ ഭരണത്തിന്റെ അടിത്തറ. സ്മാർട്ട് സിറ്റീസ് മിഷന്റെ കീഴിൽ 100 നഗരങ്ങളിലായി 8,000-ത്തിലധികം പദ്ധതികൾ നിലവിൽ പുരോഗമിക്കുന്നുണ്ടെന്ന് വ്യക്തമാക്കിയ പ്രധാനമന്ത്രി, നഗരങ്ങളിലെ യാത്രാ സൗകര്യങ്ങൾ, ജല മാനേജ്മെന്റ്, മാലിന്യ സംസ്കരണം എന്നീ മേഖലകളിൽ ഇന്ത്യയുമായി പങ്കാളികളാകാൻ ന്യൂസിലൻഡിനെ ക്ഷണിച്ചു.
ന്യൂസിലൻഡിലെ തദ്ദേശീയ മാവോറി ഗോത്ര വിഭാഗത്തിലെ ബിസിനസ്സ് നേതാക്കളെ സ്വാഗതം ചെയ്തുകൊണ്ട്, ഇന്ത്യയുടെ സാംസ്കാരിക മൂല്യങ്ങളും മാവോറി പാരമ്പര്യങ്ങളും പ്രകൃതിയോടും സുസ്ഥിരതയോടും ആഴത്തിലുള്ള ആദരവ് പങ്കിടുന്നവയാണെന്ന് മോദി പറഞ്ഞു. ഇരുരാജ്യങ്ങളും തമ്മിലുള്ള ബന്ധം ‘സ്ട്രാറ്റജിക് പാർട്ണർഷിപ്പ്’ എന്ന നിലയിലേക്ക് ഉയർത്തുകയും പ്രതിരോധം, സമുദ്ര സുരക്ഷ, ഭീകരവാദ വിരുദ്ധ പ്രവർത്തനങ്ങൾ, കൃഷി, വിദ്യാഭ്യാസം എന്നിവയുൾപ്പെടുന്ന 18 ഔദ്യോഗിക രേഖകളിൽ ഇരുപക്ഷവും ഒപ്പുവെക്കുകയും ചെയ്തു. ഇരുരാജ്യങ്ങളും ചേർന്ന് നാഗാലാൻഡിലും ഉത്തരാഖണ്ഡിലും കീവി പഴത്തിനായി രണ്ട് ‘സെന്റർ ഓഫ് എക്സലൻസുകൾ’ സ്ഥാപിക്കുന്ന ‘കീവിഫ്രൂട്ട് ആക്ഷൻ പ്ലാനും’ പ്രഖ്യാപിച്ചിട്ടുണ്ട്.
India is a launchpad for global growth: PM Narendra Modi highlights investment opportunities in New Zealand
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
