കാൽഗറി : കാൽഗറി ആസ്ഥാനമായുള്ള ഓയിൽ ആൻഡ് ഗ്യാസ് കമ്പനിയായ പെർസിസ്റ്റ് ഓയിൽ ആൻഡ് ഗ്യാസ് ഇൻക്, ആൽബർട്ടയിലെ റോക്കി വ്യൂ കൗണ്ടിയിൽ നടത്തിവന്ന നിയമവിരുദ്ധ ബിറ്റ്കോയിൻ മൈനിംഗ് പ്രവർത്തനം അടച്ചുപൂട്ടി നീക്കം ചെയ്യാൻ കോടതി ഉത്തരവിട്ടു.കമ്പനി ഭൂമി പാട്ട വ്യവസ്ഥകൾ ലംഘിച്ചുകൊണ്ട് സ്ഥലത്തെ പ്രകൃതിവാതകം ഉപയോഗിച്ച് ബിറ്റ്കോയിൻ മൈനിംഗ് റിഗുകൾ പ്രവർത്തിപ്പിക്കുകയായിരുന്നു. ഓയിൽ ആൻഡ് ഗ്യാസ് പ്രവർത്തനങ്ങൾക്കായി നൽകിയിരുന്ന ഈ ലീസ് കരാർ ബിറ്റ്കോയിൻ മൈനിംഗിനോ ലാഭകരമായ വൈദ്യുതി ഉത്പാദനത്തിനോ അനുമതി നൽകിയിരുന്നില്ല.
പെർസിസ്റ്റ് കമ്പനി അഞ്ച് മെഗാവാട്ട് ഗ്യാസ് ജനറേറ്ററുകൾ സ്ഥാപിക്കുകയും, 2021 മുതൽ ഭൂമിഉടമയായ റോയ് ഫ്ലവേഴ്സിന്റെ എതിർപ്പുകൾ അവഗണിക്കുകയും ചെയ്തിരുന്നു. 2019-ൽ ലീസ് കാലാവധി അവസാനിച്ചെങ്കിലും ഒരു ഔദ്യോഗിക സർട്ടിഫിക്കറ്റ് പുറപ്പെടുവിക്കുന്നതുവരെ ഭൂമി തിരികെ ലഭിക്കാൻ കഴിയില്ലായിരുന്നു.
ജഡ്ജി സി.എ. റിക്കാർഡ്സ് മൈനിംഗ് പ്രവർത്തനം ലീസിന്റെ പരിധിക്ക് പുറത്താണെന്ന് വിധിച്ചു. അദ്ദേഹം ഒരു സ്ഥിരം നിരോധനാജ്ഞ പുറപ്പെടുവിച്ച് ബിറ്റ്കോയിൻ മൈനിംഗ് പ്രവർത്തനം നിർത്തുവാനും എല്ലാ ഉപകരണങ്ങളും (ട്രെയിലറുകൾ, ജനറേറ്ററുകൾ തുടങ്ങിയവ) ഭൂമിയിൽ നിന്ന് നീക്കം ചെയ്യാനും ഉത്തരവിട്ടു.
വിവിധ വ്യവസായങ്ങളിൽ ഡിജിറ്റൽ കറൻസികളുടെ സ്വീകാര്യത വർദ്ധിച്ചുവരുന്നുണ്ടെങ്കിലും, ക്രിപ്റ്റോകറൻസി മൈനിംഗ് നടത്തുന്നവർ നിയമപരമായ ചട്ടക്കൂടിനുള്ളിൽ പ്രവർത്തിക്കേണ്ടതിന്റെ ആവശ്യകത ഇത് ഉയർത്തിക്കാട്ടുന്നു. ഭാവിയിൽ ഇത്തരം പ്രവർത്തനങ്ങൾക്ക് കൂടുതൽ കർശനമായ നിബന്ധനകൾ ഏർപ്പെടുത്തപ്പെടാനുള്ള സാധ്യതയും വിദഗ്ധർ ചൂണ്ടിക്കാട്ടി.
