വാഷിങ്ടൺ: അമേരിക്കൻ രാജ്യങ്ങളുടെ വികസന ബാങ്ക് (ഐ.ഡി.ബി) വെനസ്വേലയ്ക്കായി പുതിയ രണ്ട് വർഷത്തെ കർമ്മപദ്ധതി തയ്യാറാക്കുന്നു. വൈദ്യുതി വിതരണം, സാമൂഹിക സുരക്ഷ തുടങ്ങിയ മേഖലകൾക്ക് മുൻഗണന നൽകിക്കൊണ്ടുള്ള പദ്ധതിയാണ് തയ്യാറാക്കുന്നതെന്ന് ഐ.ഡി.ബി പ്രസിഡന്റ് ഇലാൻ ഗോൾഡ്ജജൻ റോയിട്ടേഴ്സിന് നൽകിയ അഭിമുഖത്തിൽ വ്യക്തമാക്കി.
വെനസ്വേലയുമായി വീണ്ടും സഹകരണം ശക്തമാക്കുന്നതിന്റെ ഭാഗമായാണ് പുതിയ നീക്കമെന്ന് അദ്ദേഹം പറഞ്ഞു. രാജ്യത്തെ നിലവിലെ സാഹചര്യം വിലയിരുത്തുന്നതിനും മാക്രോ ഇക്കണോമിക് ഘടന പഠിക്കുന്നതിനുമായി ഐ.ഡി.ബി സംഘം വെനസ്വേലയിൽ സന്ദർശനം നടത്തിവരികയാണ്. അടുത്ത രണ്ട് വർഷത്തിനുള്ളിൽ നടപ്പാക്കാൻ ഉദ്ദേശിക്കുന്ന പദ്ധതികളുടെ രൂപരേഖ ഈ പഠന റിപ്പോർട്ടിന്റെ അടിസ്ഥാനത്തിൽ തയ്യാറാക്കുമെന്നും അദ്ദേഹം കൂട്ടിച്ചേർത്തു.
ലാറ്റിൻ അമേരിക്കയിലെയും കരീബിയൻ മേഖലയിലെയും ഏറ്റവും വലിയ വികസന വായ്പാദാതാവാണ് ഐ.ഡി.ബി. എന്നാൽ, വെനസ്വേല വായ്പാ തിരിച്ചടവ് മുടക്കിയതിനെ തുടർന്ന് 2018 മേയ് മുതൽ രാജ്യത്തേക്കുള്ള പുതിയ വായ്പകൾ ബാങ്ക് നിർത്തിവച്ചിരുന്നു. നിലവിൽ ഏകദേശം 200 കോടി ഡോളറിന്റെ കുടിശ്ശികയാണ് വെനസ്വേലയ്ക്ക് ബാങ്കിനോടുള്ളത്.
രാജ്യത്തിന്റെ സാമ്പത്തിക ബാധ്യതകൾ എങ്ങനെ പരിഹരിക്കുമെന്നോ എപ്പോഴാണ് പുതിയ വായ്പകൾ പുനരാരംഭിക്കുകയെന്നോ ഗോൾഡ്ജജൻ വ്യക്തമാക്കാൻ തയ്യാറായില്ല. നിലവിൽ കാര്യങ്ങൾ വിലയിരുത്തുന്നതിന്റെയും വെനസ്വേലൻ അധികൃതരുമായി ചർച്ചകൾ നടത്തുന്നതിന്റെയും പ്രാഥമിക ഘട്ടത്തിലാണ് ബാങ്ക് പ്രവർത്തിക്കുന്നതെന്ന് അദ്ദേഹം പറഞ്ഞു. രാജ്യത്തിന്റെ മൊത്തത്തിലുള്ള സാമ്പത്തിക സ്ഥിതിയും വിവിധ മേഖലകളിലെ ആവശ്യങ്ങളുമാണ് നിലവിൽ ബാങ്ക് പ്രധാനമായും പരിശോധിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
