വാഷിങ്ടൺ: അന്താരാഷ്ട്ര ക്രിമിനൽ കോടതിക്കെതിരെ (ഐ.സി.സി) സമഗ്ര ഉപരോധം ഏർപ്പെടുത്താനുള്ള നടപടികൾ ട്രംപ് ഭരണകൂടം പൂർത്തിയാക്കിയതായി റിപ്പോർട്ട്. ഉപരോധം ഉടൻ പ്രഖ്യാപിച്ചേക്കുമെന്നും വിഷയവുമായി ബന്ധപ്പെട്ട രണ്ട് വൃത്തങ്ങളെ ഉദ്ധരിച്ച് റോയിട്ടേഴ്സ് റിപ്പോർട്ട് ചെയ്തു. യുദ്ധക്കുറ്റങ്ങളും വംശഹത്യയും വിചാരണ ചെയ്യുന്ന അന്താരാഷ്ട്ര കോടതിക്കെതിരായ യുഎസ് നടപടികൾ കൂടുതൽ ശക്തമാക്കുന്നതിന്റെ ഭാഗമായാണ് പുതിയ നീക്കം. എന്നാൽ, ഉപരോധം പ്രഖ്യാപിക്കുന്ന കൃത്യമായ സമയക്രമം വ്യക്തമല്ല.
ഐ.സി.സിക്കെതിരായ നിലപാട് ട്രംപ് ഭരണകൂടം നേരത്തെ തന്നെ വ്യക്തമാക്കിയിരുന്നു. ഇസ്രയേൽ നേതാക്കൾക്കെതിരായ അറസ്റ്റ് വാറന്റുകൾ പിൻവലിക്കണമെന്നും അഫ്ഗാനിസ്ഥാനിലെ അമേരിക്കൻ സൈനികരെക്കുറിച്ചുള്ള മുൻ അന്വേഷണത്തിൽനിന്ന് കോടതി പിന്മാറണമെന്നും യുഎസ് ആവശ്യപ്പെട്ടിട്ടുണ്ട്. ജൂലൈയിൽ യുഎസ് സ്റ്റേറ്റ് സെക്രട്ടറി മാർക്കോ റൂബിയോ ഐ.സി.സിയെ ഒറ്റപ്പെടുത്താനുള്ള നീക്കം പ്രഖ്യാപിക്കുകയും മറ്റ് രാജ്യങ്ങളോട് കോടതിയിൽനിന്ന് പിന്മാറാൻ ആവശ്യപ്പെടുകയും ചെയ്തിരുന്നു. നിരവധി ഐ.സി.സി ജഡ്ജിമാർക്കും പ്രോസിക്യൂട്ടർമാർക്കുമെതിരെ വാഷിങ്ടൺ ഇതിനകം ഉപരോധം ഏർപ്പെടുത്തിയിട്ടുണ്ട്.
കോടതിയെ മുഴുവനായി ലക്ഷ്യമിട്ടുള്ള ഉപരോധം ഐ.സി.സിയുടെ പ്രവർത്തനങ്ങളെ ഗുരുതരമായി ബാധിച്ചേക്കാം. യുഎസ് ട്രഷറിയുടെ വിദേശ ആസ്തി നിയന്ത്രണ ഓഫിസായ ഒഫാക്കിന്റെ (OFAC) ലൈസൻസില്ലാതെ അമേരിക്കൻ പൗരന്മാർക്കും കമ്പനികൾക്കും കോടതിക്ക് പണം, സാധനങ്ങൾ, സേവനങ്ങൾ എന്നിവ നൽകാൻ കഴിയാത്ത സാഹചര്യമുണ്ടാകും. അമേരിക്കൻ സാമ്പത്തിക സംവിധാനത്തിലേക്കുള്ള പ്രവേശനം നിലനിർത്തേണ്ടതിനാൽ ബാങ്കുകൾ ഇത്തരം ഉപരോധങ്ങൾ കർശനമായി നടപ്പാക്കാറുണ്ട്.
ഐ.ടി. സേവനങ്ങളും ഇൻഷുറൻസും വാങ്ങുന്നതുമുതൽ അന്വേഷണ ഉദ്യോഗസ്ഥരെ നിയമിക്കുന്നതും ദൈനംദിന സാമ്പത്തിക ഇടപാടുകളും അമേരിക്കൻ ജീവനക്കാർക്ക് ശമ്പളം നൽകുന്നതുമടക്കമുള്ള പ്രവർത്തനങ്ങളെ ഇത് ബാധിക്കാമെന്ന് ഐ.സി.സി രജിസ്ട്രാറും പ്രസിഡന്റും മുന്നറിയിപ്പ് നൽകിയിട്ടുണ്ട്.
2002-ലാണ് യുദ്ധക്കുറ്റങ്ങൾ, വംശഹത്യ, മനുഷ്യരാശിക്കെതിരായ കുറ്റകൃത്യങ്ങൾ എന്നിവ വിചാരണ ചെയ്യുന്നതിനായി അന്താരാഷ്ട്ര സമൂഹം ഐ.സി.സി സ്ഥാപിച്ചത്. ഒരു അംഗരാജ്യത്തിന് അതിക്രമങ്ങൾ സ്വയം അന്വേഷിക്കാനോ വിചാരണ ചെയ്യാനോ കഴിയാത്തപ്പോഴോ അതിന് താൽപര്യമില്ലാത്തപ്പോഴോ മാത്രമാണ് കോടതി അധികാരം പ്രയോഗിക്കുന്നത്. അമേരിക്ക ഒരിക്കലും ഐ.സി.സിയിലെ അംഗമായിട്ടില്ല.
ട്രംപിന്റെ കോടതിവിരുദ്ധ നിലപാട് അദ്ദേഹത്തിന്റെ ആദ്യ ഭരണകാലം മുതൽ തുടരുന്നതാണ്. 2024 നവംബറിൽ ട്രംപ് വീണ്ടും പ്രസിഡന്റായി തിരഞ്ഞെടുക്കപ്പെട്ടതിനു പിന്നാലെ, ഗാസ സംഘർഷവുമായി ബന്ധപ്പെട്ട യുദ്ധക്കുറ്റങ്ങളും മനുഷ്യരാശിക്കെതിരായ കുറ്റകൃത്യങ്ങളും ആരോപിച്ച് ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവിനെതിരെ ഐ.സി.സി അറസ്റ്റ് വാറന്റ് പുറപ്പെടുവിച്ചതോടെയാണ് കോടതി ഉദ്യോഗസ്ഥർക്കെതിരെ നടപടിയെടുക്കാനുള്ള നീക്കം വീണ്ടും സജീവമായത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
