ഒന്റാരിയോ : ഒന്റാരിയോയിലെ പോർട്ട് സെവേണിലെ ട്രെന്റ് സെവേൺ വാട്ടർവേയ്സിൽ ‘ഐസ് പാൻകേക്കുകൾ’ എന്നറിയപ്പെടുന്ന അപൂർവ പ്രകൃതി പ്രതിഭാസം ദൃശ്യമായി. അതിശൈത്യത്തെത്തുടർന്ന് വെള്ളത്തിന് മുകളിൽ വൃത്താകൃതിയിൽ ഐസ് പാളികൾ രൂപപ്പെടുന്ന പ്രതിഭാസമാണിത്. നദികളിലെ ഓളങ്ങൾ ചെറിയ ഐസ് പരലുകളെ ഒന്നിച്ച് ചേർക്കുന്നതിലൂടെയാണ് പാൻകേക്കുകൾക്ക് സമാനമായ ഈ രൂപങ്ങൾ ഉണ്ടാകുന്നത്. മേഖലയിൽ ശക്തമായ തണുപ്പും കാറ്റും തുടരുന്ന സാഹചര്യത്തിലാണ് ഇവ വ്യാപകമായി കാണപ്പെടുന്നത്.
അതിശൈത്യവും ശക്തമായ കാറ്റുമാണ് ഈ പ്രതിഭാസത്തിന് അനുകൂലമായ സാഹചര്യമെന്ന് കനേഡിയൻ ഐസ് സർവീസിലെ സീനിയർ ഐസ് ഫോർകാസ്റ്ററായ ജോർജ്ജ് കരാഗാനിസ് വ്യക്തമാക്കി. വായുവിലെ താപനില മൈനസ് 10 ഡിഗ്രിയോ അതിൽ താഴെയോ എത്തുമ്പോൾ ജലത്തിനടിയിൽ സൂചി പോലെയുള്ള ഐസ് പരലുകൾ (ഫ്രാസിൽ ഐസ്) രൂപപ്പെടുന്നു. ഇവ പിന്നീട് ഒന്നിച്ചുചേർന്ന് ‘ഗ്രീസ് ഐസ്’ ആയി മാറുകയും കാറ്റിന്റെയും തിരമാലകളുടെയും സ്വാധീനത്താൽ വട്ടത്തിൽ കറങ്ങി പാൻകേക്കുകളുടെ ആകൃതി കൈവരിക്കുകയുമാണ് ചെയ്യുന്നത്.
വെള്ളത്തിലെ ഓളങ്ങൾ കാരണം ഈ ഐസ് പാളികളുടെ അരികുകളിൽ വെള്ളം തെറിക്കുകയും അവ പിന്നീട് ഉറഞ്ഞ് ഉയർന്നുനിൽക്കുന്ന അതിരുകൾ രൂപപ്പെടുകയും ചെയ്യുന്നു. 30 സെന്റീമീറ്റർ മുതൽ മൂന്ന് മീറ്റർ വരെ വ്യാസമുള്ളവയാണ് ഈ ഐസ് ഡിസ്കുകൾ. വെള്ളത്തിലെ ഇളക്കം കാരണം ജലം പൂർണ്ണമായും ഐസായി മാറാതെ ദ്രാവകാവസ്ഥയിൽ തന്നെ തുടരുന്നത് കൊണ്ടാണ് ഇവയ്ക്ക് വൃത്താകൃതി ലഭിക്കുന്നതെന്ന് വിദഗ്ധർ വ്യക്തമാക്കുന്നു. ഒരു ജലാശയം പൂർണ്ണമായും ഐസായി മാറുന്നതിന് മുൻപുള്ള ഇടക്കാല ഘട്ടമാണിതെന്ന് കരാഗാനിസ് വിലയിരുത്തി.
സാധാരണയായി ഡിസംബർ അവസാനം മുതൽ മാർച്ച് വരെയുള്ള മാസങ്ങളിൽ വലിയ ജലാശയങ്ങളിലാണ് ഈ പ്രതിഭാസം കൂടുതലായി കാണപ്പെടുന്നത്. കാറ്റില്ലാത്ത ശാന്തമായ കാലാവസ്ഥയാണെങ്കിൽ സാധാരണ ഐസ് പാളികളാണ് രൂപപ്പെടുക. മറിച്ച് അമിതമായ തണുപ്പാണെങ്കിൽ ജലാശയം വളരെ വേഗത്തിൽ പൂർണ്ണമായും ഐസായി മാറും. കൃത്യമായ കാലാവസ്ഥാ ഘടകങ്ങൾ ഒത്തുചേരുമ്പോൾ മാത്രമാണ് ഐസ് പാൻകേക്കുകൾ ഉണ്ടാകുന്നത് എന്നതിനാൽ ഇതിനെ സവിശേഷമായ ഒരു പ്രതിഭാസമായാണ് ശാസ്ത്രലോകം കാണുന്നത്.
കാണാൻ മനോഹരമാണെങ്കിലും ഐസ് പാൻകേക്കുകൾ അങ്ങേയറ്റം അപകടകാരികളാണെന്ന് അധികൃതർ മുന്നറിയിപ്പ് നൽകി. ഇവയ്ക്ക് ഒട്ടും സ്ഥിരതയില്ലാത്തതിനാൽ ആരും ഇതിന് മുകളിലൂടെ നടക്കാൻ ശ്രമിക്കരുതെന്ന് ജോർജ്ജ് കരാഗാനിസ് നിർദ്ദേശിച്ചു. വരും ദിവസങ്ങളിൽ മേഖലയിൽ അതിശൈത്യം തുടരുമെന്നതിനാൽ കൂടുതൽ ഐസ് പാൻകേക്കുകൾ രൂപപ്പെടാൻ സാധ്യതയുണ്ടെന്നാണ് കാലാവസ്ഥാ നിരീക്ഷകരുടെ വിലയിരുത്തൽ.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82
‘Ice pancakes’ bloom in rivers; A natural wonder in Canada’s waterways
