എംവി ഹോൺഡിയസ് എന്ന ഡച്ച് പര്യവേഷണ കപ്പലിൽ ഹാൻ്റ വൈറസ് സ്ഥിരീകരിച്ച പശ്ചാത്തലത്തിൽ, ഇത് കൊവിഡ്-19 പോലെ ഒരു ആഗോള മഹാമാരിയായി മാറാൻ സാധ്യതയില്ലെന്ന് ലോകാരോഗ്യ സംഘടന (WHO) വ്യക്തമാക്കി. ലോകത്തിലെ ഏറ്റവും മാരകമായ വൈറസുകളിൽ ഒന്നാണെങ്കിലും, ഹാൻ്റ വൈറസ് വായുവിലൂടെ പെട്ടെന്ന് പടരുന്ന ഒന്നല്ലെന്നും രോഗബാധിതരുമായി അടുത്ത സമ്പർക്കം പുലർത്തുന്നവരിലേക്ക് മാത്രമേ ഇത് പകരുകയുള്ളൂ എന്നും പകർച്ചവ്യാധി വിദഗ്ധ മരിയ വാൻ കെർഖോവ് അറിയിച്ചു. നിലവിൽ കപ്പലിലെ സാഹചര്യത്തെക്കുറിച്ച് ലോകാരോഗ്യ സംഘടന വിശദമായ റിപ്പോർട്ട് തേടിയിട്ടുണ്ട്.
ഏപ്രിൽ ഒന്നിന് അർജന്റീനയിലെ ഉസുവായയിൽ നിന്ന് 149 യാത്രക്കാരുമായി പുറപ്പെട്ട കപ്പലിലാണ് വൈറസ് ബാധ റിപ്പോർട്ട് ചെയ്തത്. ഇതുവരെ എട്ട് പേർക്ക് രോഗം സ്ഥിരീകരിക്കുകയും മൂന്ന് പേർ മരിക്കുകയും ചെയ്തു. ഏപ്രിൽ ആറിന് രോഗലക്ഷണങ്ങൾ പ്രകടിപ്പിച്ച 70 വയസ്സുള്ള ഡച്ച് പൗരനാണ് ആദ്യം മരണപ്പെട്ടത്. തുടർന്ന് അദ്ദേഹത്തിന്റെ ഭാര്യയും മരണത്തിന് കീഴടങ്ങി. നിലവിൽ അറ്റ്ലാന്റിക് സമുദ്രത്തിൽ വെസ്റ്റ് ആഫ്രിക്കൻ തീരത്തോട് ചേർന്ന് കിടക്കുന്ന കപ്പലിൽ മൂന്ന് ഇന്ത്യക്കാർ ഉൾപ്പെടെയുള്ള ജീവനക്കാരുണ്ട്. രോഗലക്ഷണങ്ങൾ പ്രകടിപ്പിച്ച മൂന്ന് പേരെ ഇതിനോടകം കപ്പലിൽ നിന്നും മാറ്റി പാർപ്പിച്ചിട്ടുണ്ട്.
എലികളിലൂടെയാണ് പ്രധാനമായും ഹാൻ്റ വൈറസ് മനുഷ്യരിലേക്ക് പടരുന്നത്. എലികളുടെ വിസർജ്യങ്ങളോ ഉമിനീരോ കലർന്ന വായു ശ്വസിക്കുന്നതിലൂടെയോ, ഇവയുമായി നേരിട്ട് സമ്പർക്കത്തിൽ വരുന്നതിലൂടെയോ ആണ് അണുബാധ ഉണ്ടാകുന്നത്. ശ്വാസകോശത്തെയും വൃക്കകളെയും മാരകമായി ബാധിക്കാൻ ഈ വൈറസിന് ശേഷിയുണ്ട്. കപ്പൽ യാത്ര പുറപ്പെടുമ്പോൾ ആർക്കും ലക്ഷണങ്ങൾ ഉണ്ടായിരുന്നില്ലെങ്കിലും, യാത്രയ്ക്കിടയിലാണ് രോഗം പടർന്നത്. എങ്കിലും രോഗവ്യാപന രീതി പരിഗണിക്കുമ്പോൾ ഇതൊരു വലിയ പൊതുജനാരോഗ്യ ഭീഷണിയായി മാറില്ലെന്നാണ് വിദഗ്ധരുടെ വിലയിരുത്തൽ.
WHO Reassures: Hantavirus Won’t Spread Like COVID-19
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
