ഇന്ത്യൻ വനിതാ ഹോക്കി ടീമിന്റെ മുൻ ചീഫ് കോച്ച് ഗുർദിയാൽ സിംഗ് ഭാങ്ഗു കാനഡയിൽ അന്തരിച്ചു

ന്യൂഡൽഹി: ഇന്ത്യൻ വനിതാ ഹോക്കിയുടെ സുവർണ്ണ അധ്യായമായ 2002-ലെ കോമൺവെൽത്ത് ഗെയിംസ് സ്വർണ്ണനേട്ടത്തിന് വഴികാട്ടിയായ മുൻ ചീഫ് കോച്ച് ഗുർദിയാൽ സിംഗ് ഭാങ്ഗു (86) അന്തരിച്ചു. സറെയിലായിരുന്നു അന്ത്യം. അദ്ദേഹത്തിന്റെ നിര്യാണത്തിൽ ഹോക്കി ഇന്ത്യ ആഴത്തിലുള്ള ദുഃഖം രേഖപ്പെടുത്തി. ഇന്ത്യൻ ഹോക്കിക്ക് അദ്ദേഹം നൽകിയ സംഭാവനകൾ എക്കാലവും സ്മരിക്കപ്പെടുമെന്ന് ഹോക്കി ഇന്ത്യ അനുശോചന സന്ദേശത്തിൽ വ്യക്തമാക്കി.

ഇന്ത്യൻ കായികചരിത്രത്തിലെ എക്കാലത്തെയും ശ്രദ്ധേയമായ വിജയങ്ങളിലൊന്നിന് ഗുർദിയാൽ സിംഗിന്റെ പരിശീലനമികവ് കരുത്തേകി. 2002-ൽ മാഞ്ചസ്റ്ററിൽ നടന്ന കോമൺവെൽത്ത് ഗെയിംസ് ഫൈനലിൽ ആതിഥേയരായ ഇംഗ്ലണ്ടിനെ 3-2ന് പരാജയപ്പെടുത്തിയാണ് ക്യാപ്റ്റൻ സൂരജ് ലതാ ദേവിയുടെ നേതൃത്വത്തിലുള്ള ഇന്ത്യൻ ടീം കിരീടം ചൂടിയത്. പിന്നീട് ഏറെ ജനപ്രീതി നേടിയ ഷാറുഖ് ഖാൻ ചിത്രം ‘ചക് ദേ! ഇന്ത്യ’യുടെ ഇതിവൃത്തത്തിന് പ്രചോദനമായത് മാഞ്ചസ്റ്ററിലെ ഈ ചരിത്രവിജയമായിരുന്നു.

ഫൈനൽ മത്സരത്തിന്റെ അവസാന നിമിഷങ്ങളിൽ ഗുർദിയാൽ സിംഗ് സ്വീകരിച്ച തന്ത്രപരമായ തീരുമാനങ്ങൾ ഇന്ത്യയുടെ വിജയത്തിൽ നിർണായകമായി. അവസാന വിസിൽ മുഴങ്ങിയാലും പെനാൽറ്റി കോർണർ അവസരം പൂർത്തിയാക്കാമെന്ന ഹോക്കിയിലെ സാങ്കേതിക നിയമത്തെക്കുറിച്ച് വ്യക്തമായ ധാരണയുണ്ടായിരുന്ന അദ്ദേഹം, വിസിൽ മുഴങ്ങിയാലും കളി പൂർത്തിയാകുന്നതുവരെ ശ്രദ്ധ കൈവിടരുതെന്ന് താരങ്ങൾക്ക് നിർദേശം നൽകിയിരുന്നു. എക്സ്ട്രാ ടൈമിൽ ഹൂട്ടർ മുഴങ്ങിയതോടെ ഇംഗ്ലീഷ് പ്രതിരോധം അയഞ്ഞെങ്കിലും പന്ത് കൈവിടാതിരുന്ന മമത ഖരബ് അത് വലയിലെത്തിച്ച് ഇന്ത്യക്ക് ചരിത്രവിജയം സമ്മാനിക്കുകയായിരുന്നു.

പാകിസ്ഥാനിലെ ഫൈസലാബാദിൽ ജനിച്ച ഗുർദിയാൽ സിംഗ് അംബാലയിലാണ് വളർന്നത്. പട്യാലയിലെ നാഷണൽ ഇൻസ്റ്റിറ്റ്യൂട്ട് ഓഫ് സ്പോർട്സിൽ (NIS) പരിശീലനം നേടിയ അദ്ദേഹം ഹോക്കി ഇതിഹാസം ധ്യാൻചന്ദ്, ഒളിമ്പിക് സ്വർണമെഡൽ ജേതാവ് ബൽ കിഷൻ സിംഗ് എന്നിവരിൽനിന്നാണ് പരിശീലകമികവ് സ്വായത്തമാക്കിയത്. 1972 മുതൽ 1976 വരെ നൈജീരിയൻ വനിതാ ടീമിന്റെ ചീഫ് കോച്ചായി പ്രവർത്തിച്ച അദ്ദേഹം, 1976-ൽ ആ ടീമിനെ ആദ്യമായി ലോകകപ്പിന് യോഗ്യരാക്കുന്നതിലും നിർണായക പങ്കുവഹിച്ചു.

ALSO READ: 8 ഡോളറുമായി കാനഡയിലെത്തിയ ഇന്ത്യക്കാരൻ; സെയിൽസ്മാനിൽ നിന്ന് ഐഡിബിഐ ബാങ്കിന്റെ അമരക്കാരനിലേക്ക്

1998-ലാണ് ഗുർദിയാൽ സിംഗ് ഇന്ത്യൻ വനിതാ ടീമിന്റെ ചീഫ് കോച്ചായി ചുമതലയേറ്റത്. അദ്ദേഹത്തിന്റെ പരിശീലനത്തിൽ അതേ വർഷം ബാങ്കോക്കിൽ നടന്ന ഏഷ്യൻ ഗെയിംസിൽ ഇന്ത്യ വെള്ളിമെഡൽ നേടി. ഇന്ത്യൻ ഹോക്കിക്ക് നൽകിയ സമഗ്ര സംഭാവനകൾ പരിഗണിച്ച് 2000-ൽ രാജ്യം അദ്ദേഹത്തെ ദ്രോണാചാര്യ പുരസ്കാരം നൽകി ആദരിച്ചു. ഈ പുരസ്കാരം നേടുന്ന ആദ്യ ഹോക്കി പരിശീലകൻ കൂടിയായിരുന്നു ഗുർദിയാൽ സിംഗ് ഭാങ്ഗു.

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z