ഹൗസിംഗ്, ആരോഗ്യ മേഖലകളിലെ സമ്മർദ്ദം കുറയ്ക്കാൻ നീക്കം; കുടിയേറ്റ ലക്ഷ്യങ്ങൾ വെട്ടിക്കുറച്ച് സർക്കാർ

ഒട്ടാവ: കാനഡയിലെ വോട്ടർമാരുടെ മുൻഗണനകളിൽ വലിയ മാറ്റം സംഭവിക്കുന്നതായും കുടിയേറ്റം ഇപ്പോൾ ജനങ്ങളുടെ പ്രധാന ആശങ്കയല്ലെന്നും നാനോസ് റിസർച്ചിന്റെ പുതിയ റിപ്പോർട്ട് . 2025 ഡിസംബർ 26 വരെയുള്ള നാലാഴ്ചകളിൽ നടത്തിയ സർവ്വേ പ്രകാരം സാമ്പത്തിക സ്ഥിതി (21.8%), യുഎസ് ബന്ധം (10%), വിലക്കയറ്റം (8.4%), ആരോഗ്യ മേഖല (6.6%) എന്നിവയാണ് ജനങ്ങളെ കൂടുതൽ അലട്ടുന്ന വിഷയങ്ങൾ. കുടിയേറ്റം ആറാം സ്ഥാനത്താണ് (6.4%). പൊതുജന ശ്രദ്ധ കുറഞ്ഞെങ്കിലും 2026-ൽ കുടിയേറ്റ നിയമങ്ങളിൽ വലിയ മാറ്റങ്ങൾ വരുത്താനാണ് ഫെഡറൽ സർക്കാരിന്റെ തീരുമാനം.

തൊഴിൽക്ഷാമം പരിഹരിക്കുന്നതിനായി കാർഷിക, മത്സ്യസംസ്കരണ മേഖലകൾക്കായി പുതിയ വിദേശ തൊഴിലാളി സ്ട്രീം ഈ വർഷം ആരംഭിക്കുമെന്ന് IRCC അറിയിച്ചു. സംരംഭകർക്കായി പുതിയ പൈലറ്റ് പ്രോഗ്രാമും നിർമ്മാണ മേഖലയിൽ രേഖകളില്ലാതെ ജോലി ചെയ്യുന്ന 6,000 പേർക്ക് സ്ഥിരതാമസത്തിന് അവസരമൊരുക്കുന്ന പ്രത്യേക പാതയും പരിഗണനയിലുണ്ട്. ഇതിന് പുറമെ, അമേരിക്കയിലെ H1-B വിസയുള്ള വിദഗ്ധ തൊഴിലാളികളെ കാനഡയിലേക്ക് ആകർഷിക്കാൻ വേഗത്തിലുള്ള പിആർ നടപടികളും വരും മാസങ്ങളിൽ നടപ്പിലാക്കും.

എക്സ്പ്രസ് എൻട്രി സംവിധാനത്തിൽ മൂന്ന് പുതിയ വിഭാഗങ്ങൾ ഉൾപ്പെടുത്താൻ സർക്കാർ ആലോചിക്കുന്നുണ്ട്. നേതൃപാടവമുള്ള സീനിയർ മാനേജർമാർ, ഗവേഷകർ, ദേശീയ സുരക്ഷാ-പ്രതിരോധ മേഖലയിലെ വിദഗ്ധർ എന്നിവർക്കായിരിക്കും ഇതിൽ മുൻഗണന. കൂടാതെ, കാനഡയിലെ തൊഴിൽ വർഗ്ഗീകരണ സംവിധാനമായ NOC നിയമങ്ങളിൽ സമഗ്രമായ പരിഷ്കരണം 2026-ൽ നടപ്പിലാക്കും. ഇത് പല ഉദ്യോഗാർത്ഥികളുടെയും യോഗ്യതാ മാനദണ്ഡങ്ങളെ ബാധിക്കാൻ സാധ്യതയുണ്ടെന്ന് തൊഴിൽ മന്ത്രാലയം (ESDC) വിലയിരുത്തുന്നു.

കാനഡയിൽ നിലവിൽ താൽക്കാലിക താമസക്കാരായിട്ടുള്ളവർക്ക് സ്ഥിരതാമസം നൽകുന്നതിനായിരിക്കും 2026-ൽ മുൻഗണന നൽകുക. ഇതിന്റെ ഭാഗമായി പ്രൊവിൻഷ്യൽ നോമിനി പ്രോഗ്രാം വഴിയുള്ള സ്ഥിരതാമസ അനുമതികളുടെ എണ്ണം 55,000-ൽ നിന്ന് 91,500 ആയി ഉയർത്തി. കാനഡയിൽ പ്രവൃത്തിപരിചയമുള്ള ഡോക്ടർമാർക്കായി പുതിയ വിഭാഗം ഈ വർഷം ആദ്യം മുതൽ പ്രാബല്യത്തിൽ വരും. ഹൈ-ഡിമാൻഡ് മേഖലകളിൽ ജോലി ചെയ്യുന്ന 33,000 താൽക്കാലിക തൊഴിലാളികൾക്ക് പിആർ നൽകുന്ന നടപടികൾ വേഗത്തിലാക്കുമെന്നും ഇമിഗ്രേഷൻ മന്ത്രി അറിയിച്ചു.

കുടിയേറ്റ അപേക്ഷകൾ നിരസിക്കാനും നിർത്തിവെക്കാനും സർക്കാരിന് അധികാരം നൽകുന്ന Bill C-12 ഉടൻ നിയമമാകാൻ സാധ്യതയുണ്ടെന്ന് റിപ്പോർട്ട് വ്യക്തമാക്കുന്നു. വിസകൾ, വർക്ക് പെർമിറ്റുകൾ, സ്റ്റഡി പെർമിറ്റുകൾ എന്നിവയിൽ നിയന്ത്രണമേർപ്പെടുത്താൻ ഗവർണർ ജനറലിന് അധികാരം നൽകുന്നതാണ് ഈ ബിൽ. കൂടാതെ, പോസ്റ്റ് ഗ്രാജുവേഷൻ വർക്ക് പെർമിറ്റിന് അർഹമായ കോഴ്സുകളുടെ പട്ടിക 2026 ആദ്യം പരിഷ്കരിക്കും. ഇത് ചില പഠന മേഖലകളിലുള്ളവർക്ക് വർക്ക് പെർമിറ്റ് ലഭിക്കുന്നത് തടയാൻ കാരണമാകുമെന്ന് അധികൃതർ വ്യക്തമാക്കി.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/JNSnrvnSqw1DUJljLTLp82

ഒരു അം​ഗീകൃത ഇമി​ഗ്രേഷൻ കൺസൽട്ടന്റിന്റെ സേവനങ്ങൾക്ക് ബന്ധപ്പെടാം: +1 (289) 690-8119 ( eHouse Immigrations Services Ltd) (https://ehouseimmigration.ca/)

Moves to reduce pressure on housing and health sectors; Government cuts immigration targets.