ഒന്റാരിയോ; ഒന്റാറിയോയെയും അമേരിക്കയിലെ മിഷിഗണിനെയും ബന്ധിപ്പിക്കുന്ന ഗോർഡി ഹൗ ഇന്റർനാഷണൽ പാലം പൊതുഗതാഗതത്തിനായി തുറക്കാനിരിക്കെ, പാലവുമായി ബന്ധപ്പെട്ട പുതിയ കാനഡ–അമേരിക്ക ധാരണ ഏറെ ചർച്ചയാകുകയാണ്. പാലത്തിന്റെ പ്രവർത്തനം ആരംഭിക്കുന്നതുമായി ബന്ധപ്പെട്ട് ഇരു രാജ്യങ്ങളും ഈ മാസം പ്രഖ്യാപിച്ച പുതിയ കരാർ, പ്രത്യേകിച്ച് ടോൾ വരുമാനം എങ്ങനെ പങ്കിടും, കാനഡ പദ്ധതിക്കായി ചെലവഴിച്ച തുക എങ്ങനെ തിരിച്ചുപിടിക്കും എന്നീ കാര്യങ്ങളിൽ ആശയക്കുഴപ്പത്തിന് ഇടയാക്കിയിരുന്നു. എന്നാൽ പുതിയ ധാരണ 2012-ൽ ഒപ്പുവെച്ച അടിസ്ഥാന കരാറിനെ മാറ്റുന്നില്ലെന്നും, ആദ്യ 15 വർഷത്തെ വരുമാന വിനിയോഗത്തിന് മാത്രമാണ് പ്രത്യേക ക്രമീകരണം കൊണ്ടുവന്നിരിക്കുന്നതെന്നും രേഖകൾ വ്യക്തമാക്കുന്നു.
ഗോർഡി ഹൗ പാലത്തിന്റെ നിർമ്മാണത്തിന് വഴിയൊരുക്കിയ നിർണായക കരാർ 2012 ജൂണിലായിരുന്നു. അന്നത്തെ കനേഡിയൻ പ്രധാനമന്ത്രി സ്റ്റീഫൻ ഹാർപ്പറും മിഷിഗൺ ഗവർണർ റിക്ക് സ്നൈഡറും ചേർന്നാണ് വിൻഡ്സറിനെയും ഡെട്രോയിറ്റിനെയും ബന്ധിപ്പിക്കുന്ന പുതിയ അതിർത്തി പാലത്തിനായുള്ള കരാർ പ്രഖ്യാപിച്ചത്. അന്നത്തെ കണക്കുപ്രകാരം ഏകദേശം ഒരു ബില്യൺ ഡോളർ ചെലവ് പ്രതീക്ഷിച്ചിരുന്ന പദ്ധതിയുടെ നിയമപരവും സാമ്പത്തികവുമായ അടിസ്ഥാനരേഖകൾ 50-ലധികം പേജുകളുള്ള കരാറിൽ ഉൾപ്പെടുത്തിയിരുന്നു. ഉത്തര അമേരിക്കയിലെ ഏറ്റവും തിരക്കേറിയ കര അതിർത്തി കടന്നുപോകുന്ന വ്യാപാര ഗതാഗതത്തിന് പുതിയ മാർഗം ഒരുക്കുകയെന്ന ലക്ഷ്യത്തോടെയായിരുന്നു പദ്ധതി മുന്നോട്ടുവന്നത്. പഴക്കമേറിയ ആംബാസഡർ പാലത്തിലുണ്ടായിരുന്ന ചരക്കുവാഹനങ്ങളുടെ തിരക്ക് കുറയ്ക്കുന്നതും പ്രധാന ലക്ഷ്യമായിരുന്നു.
2008-ലെ സാമ്പത്തിക പ്രതിസന്ധിക്ക് പിന്നാലെ സാമ്പത്തികമായി ബുദ്ധിമുട്ടിലായിരുന്ന മിഷിഗണിന് സഹായകരമായ നിലപാടാണ് കാനഡ അന്ന് സ്വീകരിച്ചത്. പാലത്തിന്റെ നിർമ്മാണം, കാനഡയിലെ ഇൻസ്പെക്ഷൻ പ്ലാസ, ആവശ്യമായ ഭൂമി ഏറ്റെടുക്കൽ, മിഷിഗൺ ഭാഗത്തെ ഐ-75 ഹൈവേയിലേക്കുള്ള പുതിയ ഇന്റർചേഞ്ച് എന്നിവയുടെ ചെലവ് മുഴുവൻ കാനഡ വഹിക്കാമെന്ന് കരാറിൽ അംഗീകരിച്ചു. ഈ പിന്തുണയെ അന്ന് മിഷിഗൺ ഗവർണർ റിക്ക് സ്നൈഡർ പരസ്യമായി അഭിനന്ദിക്കുകയും കാനഡയുടെ സഹകരണത്തിന് നന്ദി അറിയിക്കുകയും ചെയ്തിരുന്നു.
2012-ലെ കരാർ പ്രകാരം ടോൾ ഈടാക്കുക കാനഡ ഭാഗത്ത് മാത്രമായിരിക്കും. ഈ വരുമാനം പദ്ധതിക്കായി ചെലവഴിച്ച തുക തിരിച്ചുപിടിക്കാൻ ഉപയോഗിക്കും. ഈ കടബാധ്യത പൂർണമായി തീരാൻ കുറഞ്ഞത് 50 വർഷമെങ്കിലും വേണ്ടിവരുമെന്നാണ് അന്നത്തെ വിലയിരുത്തൽ. കടം പൂർണമായി അടച്ചുതീർന്നതിന് ശേഷമാണ് ടോൾ വരുമാനം പാലത്തിന്റെ സഹഉടമകളിലൊരാളായ മിഷിഗൺ സംസ്ഥാനവുമായി പങ്കിടുക. അതോടൊപ്പം ടോൾ നിരക്ക് നിശ്ചയിക്കാനുള്ള അധികാരം നിലവിൽ വിൻഡ്സർ–ഡെട്രോയിറ്റ് ബ്രിഡ്ജ് അതോറിറ്റിക്കാണെന്നും കരാറിൽ വ്യക്തമാക്കിയിരുന്നു.
അതേസമയം, സമീപ വർഷങ്ങളിൽ കാനഡ–അമേരിക്ക ബന്ധത്തിൽ വലിയ മാറ്റങ്ങളുണ്ടായി. അമേരിക്കൻ പ്രസിഡന്റ് ഡോണൾഡ് ട്രംപിന്റെ വ്യാപാരനയങ്ങളും ഇരുരാജ്യങ്ങൾക്കുമിടയിലെ തർക്കങ്ങളും ഗോർഡി ഹൗ പാലം പദ്ധതിയെയും ബാധിച്ചു. പദ്ധതിയെ വിമർശിച്ച് ട്രംപ് സാമൂഹികമാധ്യമങ്ങളിൽ നടത്തിയ പരാമർശങ്ങളും കാനഡ ഇളവുകൾ നൽകണമെന്ന് ആവശ്യപ്പെട്ടതും പാലം എപ്പോൾ തുറക്കും എന്നതിനെക്കുറിച്ചുള്ള അനിശ്ചിതത്വം വർധിപ്പിച്ചു. ആംബാസഡർ പാലത്തിന്റെ ഉടമകളുടെ ലോബിയിംഗും രാഷ്ട്രീയ സംഭാവനകളും ഇതുമായി ബന്ധപ്പെട്ട ചർച്ചകളിൽ ശ്രദ്ധ നേടിയിരുന്നു.
കഴിഞ്ഞ മാസം ഒരിക്കൽ ഉദ്ഘാടന ശ്രമം നീണ്ടുപോയെങ്കിലും, ജൂലൈ 10-ന് കാനഡയും അമേരിക്കയും പുതിയ ‘അഗ്രിമെന്റ് ഇൻ പ്രിൻസിപ്പിൾ’ പ്രഖ്യാപിച്ചു. ഈ ധാരണ പ്രകാരം ആദ്യഘട്ടത്തിൽ ലഭിക്കുന്ന ടോൾ വരുമാനം പരിപാലനം, ജീവനക്കാരുടെ ശമ്പളം, മഞ്ഞ് നീക്കം ഉൾപ്പെടെയുള്ള പ്രവർത്തനച്ചെലവുകൾക്കായിരിക്കും ഉപയോഗിക്കുക. അതിന് ശേഷം ശേഷിക്കുന്ന തുക തുല്യമായി വിഭജിക്കും. ഒരു ഭാഗം കാനഡയ്ക്ക് ലഭിക്കുമ്പോൾ മറ്റേ ഭാഗം അമേരിക്കൻ ഫെഡറൽ സർക്കാർ സ്ഥാപിക്കുകയും പൂർണ നിയന്ത്രണം വഹിക്കുകയും ചെയ്യുന്ന സാമ്പത്തിക വികസന ഫണ്ടിലേക്കാണ് പോകുക.
ഈ ക്രമീകരണം ആദ്യ 15 വർഷത്തേക്കാണ് ബാധകമാകുക. കാനഡയ്ക്ക് ലഭിക്കുന്ന വിഹിതം പദ്ധതിയുടെ നിർമ്മാണച്ചെലവിനായി എടുത്ത കടം തിരിച്ചടയ്ക്കാൻ ഉപയോഗിക്കാം. അമേരിക്കയ്ക്ക് ലഭിക്കുന്ന വിഹിതം അമേരിക്കയുടെ താൽപര്യത്തിനും കാനഡ–അമേരിക്ക വ്യാപാര വികസനത്തിനുമായി വിനിയോഗിക്കുമെന്നാണ് ധാരണയിൽ പറയുന്നത്. അതിനാൽ കാനഡയ്ക്ക് കടം ഉടൻ തിരിച്ചടയ്ക്കാൻ കഴിയുമെങ്കിലും ലഭിക്കുന്ന ശുദ്ധ ടോൾ വരുമാനം മുൻ വ്യവസ്ഥകളേക്കാൾ കുറവായിരിക്കും.
15 വർഷത്തെ ഈ പുതിയ ക്രമീകരണം അവസാനിച്ചാലും 2012-ലെ കരാറിലെ അടിസ്ഥാന വ്യവസ്ഥകൾ തുടരും. അതായത് കാനഡയുടെ കടം പൂർണമായി തീർന്നശേഷം ടോൾ വരുമാനം മിഷിഗൺ സംസ്ഥാനവുമായി പങ്കിടുന്ന സംവിധാനം നിലനിൽക്കും. എന്നാൽ പുതിയ ധാരണയിലൂടെ ടോൾ നിരക്കിൽ മാറ്റം വരുത്തുന്ന കാര്യങ്ങളിൽ അമേരിക്കൻ ഫെഡറൽ സർക്കാരിനും മുൻകാലത്തേക്കാൾ കൂടുതൽ പങ്കാളിത്തം ലഭിക്കുന്നതാണ് മറ്റൊരു പ്രധാന മാറ്റം.
ഗോർഡി ഹൗ ഇന്റർനാഷണൽ പാലത്തിന്റെ ഔദ്യോഗിക ഉദ്ഘാടനച്ചടങ്ങ് വെള്ളിയാഴ്ച നടക്കും. അതിന് പിന്നാലെ തിങ്കളാഴ്ച മുതൽ പാലം പൊതുജനങ്ങൾക്കും വാണിജ്യ വാഹനങ്ങൾക്കും ഗതാഗതത്തിനായി തുറന്നുകൊടുക്കും. ഉത്തര അമേരിക്കയിലെ ഏറ്റവും പ്രധാനപ്പെട്ട അതിർത്തി വ്യാപാരപാതകളിലൊന്നായി മാറുമെന്ന പ്രതീക്ഷയിലാണ് ഈ പുതിയ പാലത്തെ ഇരു രാജ്യങ്ങളും കാണുന്നത്.
Gordie Howe International Bridge set to open; here is how the old agreement and new understanding regarding toll revenue sharing compare.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
