ജർമനി: വിദേശത്ത് ഉയർന്ന ശമ്പളമുള്ള ജോലി ലഭിച്ചാൽ വലിയ സാമ്പത്തിക നേട്ടമുണ്ടാകുമെന്ന ധാരണയ്ക്ക് മറുവശം ചൂണ്ടിക്കാട്ടി ജർമനിയിൽ ആറ് വർഷമായി കഴിയുന്ന ഇന്ത്യൻ പ്രവാസി തനൂജ്. ജർമനിയിലെ 70,000 യൂറോ വാർഷിക ശമ്പളം ഇന്ത്യൻ രൂപയിലേക്ക് മാറ്റുമ്പോൾ ഏകദേശം ₹77 ലക്ഷം വരുമെങ്കിലും, നികുതിയും ജീവിതച്ചെലവും കണക്കാക്കിയാൽ യഥാർഥ സാമ്പത്തിക നേട്ടം അത്ര വലുതായിരിക്കില്ലെന്നാണ് അദ്ദേഹത്തിന്റെ വാദം.
ജർമനിയിൽ ശമ്പളത്തിന്റെ ഏകദേശം 40 ശതമാനം വരെ നികുതിയായി പോകാമെന്നാണ് തനൂജ് പറയുന്നത്. പ്രധാന നഗരങ്ങളിൽ വീടിന്റെ വാടക പ്രതിമാസം 1,500 യൂറോയ്ക്ക് മുകളിലെത്താം. ഇതിന് പുറമെ വൈദ്യുതി, ഇന്റർനെറ്റ്, ഇൻഷുറൻസ് തുടങ്ങിയ ചെലവുകളും ഉയർന്നതാണ്. പുറത്തുനിന്ന് ഭക്ഷണം കഴിക്കുന്നതിനും വിവിധ സേവനങ്ങൾ ഉപയോഗിക്കുന്നതിനും കൂടുതൽ തുക ചെലവാകുമെന്നും അദ്ദേഹം പറയുന്നു.
വിദേശ ശമ്പളം നേരിട്ട് ഇന്ത്യൻ രൂപയിലേക്ക് മാറ്റി താരതമ്യം ചെയ്യുന്നതിന് പകരം പർച്ചേസിങ് പവർ പാരിറ്റി (PPP) കൂടി പരിഗണിക്കണമെന്നാണ് തനൂജിന്റെ നിർദേശം. അദ്ദേഹത്തിന്റെ കണക്കനുസരിച്ച് ജർമനിയിലെ ജീവിതച്ചെലവ് പരിഗണിച്ചാൽ 70,000 യൂറോ ശമ്പളത്തിന്റെ വാങ്ങൽശേഷി ഇന്ത്യയിലെ ഏകദേശം ₹32–35 ലക്ഷം വാർഷിക ശമ്പളത്തിന് സമാനമായി അനുഭവപ്പെടാം.
തനൂജിന്റെ കുറിപ്പിന് സോഷ്യൽ മീഡിയയിൽ സമ്മിശ്ര പ്രതികരണമാണ് ലഭിച്ചത്. നികുതി, വാടക, ഇൻഷുറൻസ്, ദൈനംദിന ചെലവുകൾ എന്നിവ ശമ്പളത്തിന്റെ യഥാർഥ മൂല്യത്തെ ബാധിക്കുമെന്ന് ചിലർ അഭിപ്രായപ്പെട്ടു. അതേസമയം, വിദേശത്തേക്ക് പോകാനുള്ള തീരുമാനം പണം മാത്രം അടിസ്ഥാനമാക്കിയല്ലെന്നും ചിലർ ചൂണ്ടിക്കാട്ടി. വിദേശ ജോലി തിരഞ്ഞെടുക്കുമ്പോൾ ശമ്പളത്തിനൊപ്പം നികുതി, വാടക, ജീവിതച്ചെലവ്, സേവിങ്സ് എന്നിവ കൂടി കണക്കാക്കണമെന്നാണ് തനൂജിന്റെ മുന്നറിയിപ്പ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/BtwqAqvdF2uKsGDzfK81Nq
