ഇന്ത്യയിൽ യാത്ര ചെയ്യുമ്പോൾ ശ്രദ്ധിക്കേണ്ട കാര്യങ്ങൾ പങ്കുവെച്ച് ജർമ്മൻ ട്രാവൽ വ്ലോഗറായ പൗളി. ഇന്ത്യയിലൂടെ തനിച്ച് നടത്തിയ യാത്രകളിൽനിന്നുള്ള അനുഭവങ്ങളുടെ അടിസ്ഥാനത്തിൽ വിദേശ സഞ്ചാരികൾക്ക് ഉപകാരപ്പെടുന്ന 10 നിർദേശങ്ങളാണ് പൗളി പങ്കുവെച്ചത്. യാത്രാച്ചെലവ് കുറയ്ക്കുന്നതു മുതൽ ഭക്ഷണവും താമസവും തിരഞ്ഞെടുക്കുന്നതു വരെയുള്ള കാര്യങ്ങൾ ഇതിൽ ഉൾപ്പെടുന്നു.
- യാത്രയ്ക്ക് പൊതുഗതാഗതം ഉപയോഗിക്കാം
ഇന്ത്യയിൽ യാത്ര ചെയ്യാൻ ഓട്ടോറിക്ഷ, ബസ്, ട്രെയിൻ തുടങ്ങിയവ ഉപയോഗിക്കുന്നത് ചെലവ് കുറയ്ക്കാൻ സഹായിക്കും. റാപ്പിഡോ, ഉബർ, റെഡ്ബസ് തുടങ്ങിയ ആപ്പുകളും യാത്രയ്ക്ക് ഉപയോഗിക്കാം.
- ഇ-സിം വാങ്ങാൻ തിരക്കുകൂട്ടേണ്ട
ഇന്ത്യയിലേക്ക് പുറപ്പെടുന്നതിന് മുൻപ് ഇ-സിം വാങ്ങേണ്ടതില്ലെന്നാണ് പൗളിയുടെ നിർദേശം. ഇന്ത്യയിൽ മൊബൈൽ ഡാറ്റയ്ക്ക് ചെലവ് കുറവാണെന്നും എയർടെൽ നെറ്റ്‌വർക്ക് ഉപയോഗിക്കാമെന്നും അവർ പറയുന്നു.
ALSO READ: പശ്ചിമേഷ്യയിൽ ആശങ്ക തുടരുന്നു; സൗദി സർവീസുകൾ നവംബർ 14 വരെ റദ്ദാക്കി ഇൻഡിഗോ
- വീസയ്ക്ക് നേരത്തേ അപേക്ഷിക്കണം
ഇന്ത്യയിലേക്കുള്ള യാത്രയ്ക്ക് മുൻപ് വീസാ നടപടികൾ പൂർത്തിയാക്കണം. വീണ്ടും ഇന്ത്യ സന്ദർശിക്കാൻ പദ്ധതിയുള്ളവർക്ക് ഒരു വർഷത്തെ വീസ എടുക്കുന്നത് പരിഗണിക്കാമെന്നും പൗളി നിർദേശിക്കുന്നു.
- യാത്രാദൂരം കണക്കിലെടുക്കണം
ഇന്ത്യയിലെ സ്ഥലങ്ങൾ തമ്മിലുള്ള ദൂരം കൂടുതലായതിനാൽ യാത്ര ആസൂത്രണം ചെയ്യുമ്പോൾ സമയം കൂടി കണക്കാക്കണം. ദീർഘദൂര യാത്രകൾക്ക് രാത്രികാല ബസുകളോ ട്രെയിനുകളോ തിരഞ്ഞെടുക്കുന്നത് സമയം ലാഭിക്കാൻ സഹായിക്കും.
- ഭക്ഷണവും സാധനങ്ങളും ഓൺലൈനിൽ വാങ്ങാം
ഭക്ഷണമോ മറ്റ് അവശ്യസാധനങ്ങളോ ആവശ്യമുള്ളപ്പോൾ ബ്ലിങ്കിറ്റ്, സൊമാറ്റോ തുടങ്ങിയ ആപ്പുകൾ ഉപയോഗിക്കാം. എന്നാൽ എല്ലാ സ്ഥലങ്ങളിലും ഈ സേവനങ്ങൾ ലഭ്യമാകണമെന്നില്ല.
- ആളുകൾ തുറിച്ചുനോക്കിയാൽ അത്ഭുതപ്പെടേണ്ട
ഇന്ത്യയിൽ വിദേശികളെ ആളുകൾ തുറിച്ചുനോക്കുന്നത് കൗതുകം കൊണ്ടാകാമെന്നാണ് പൗളി പറയുന്നത്. ഇത് തുടക്കത്തിൽ അസ്വസ്ഥതയുണ്ടാക്കിയേക്കാമെങ്കിലും യാത്രയ്ക്കിടെ പരിചയപ്പെടുന്ന അനുഭവങ്ങളിലൊന്നായി ഇതിനെ കാണാമെന്നും അവർ പറയുന്നു.
- നാടൻ ഭക്ഷണം രുചിച്ചുനോക്കാം
ഇന്ത്യൻ ഭക്ഷണത്തെ പേടിക്കേണ്ടതില്ലെന്നാണ് പൗളിയുടെ അഭിപ്രായം. തട്ടുകടകളിലെ ഭക്ഷണവും നാടൻ വിഭവങ്ങളും കഴിച്ചാണ് താൻ യാത്ര ചെയ്തതെന്നും വലിയ ആരോഗ്യപ്രശ്നങ്ങളൊന്നും ഉണ്ടായിട്ടില്ലെന്നും അവർ പറയുന്നു. ഭക്ഷണത്തിന്റെ ശുചിത്വം ഉറപ്പാക്കാനും ശ്രദ്ധിക്കണം.
- തലയാട്ടലിന്റെ അർത്ഥം മനസ്സിലാക്കണം
ഇന്ത്യക്കാരുടെ തലയാട്ടൽ വിദേശികൾക്ക് ചിലപ്പോൾ ആശയക്കുഴപ്പമുണ്ടാക്കാം. സന്ദർഭത്തിനനുസരിച്ച് അതിന്റെ അർത്ഥം മാറുന്നതിനാൽ സംസാരിക്കുമ്പോൾ ഇതും ശ്രദ്ധിക്കണമെന്നാണ് നിർദേശം.
- ഹോസ്റ്റലുകളിൽ താമസിക്കാം
ഇന്ത്യയിലെ ഹോസ്റ്റലുകളിൽ വിദേശികൾക്കൊപ്പം ഇന്ത്യക്കാരും താമസിക്കാറുണ്ട്. സ്വകാര്യത ആഗ്രഹിക്കുന്നവർക്ക് സ്ത്രീകൾക്കായുള്ള ഡോർമെറ്ററികളോ സ്വകാര്യ മുറികളോ തിരഞ്ഞെടുക്കാം. താമസസ്ഥലം ബുക്ക് ചെയ്യുന്നതിന് മുൻപ് സൗകര്യങ്ങളും സുരക്ഷയും പരിശോധിക്കണം.
- ഇന്ത്യൻ സംസ്കാരത്തെക്കുറിച്ച് അറിയാം
ഇന്ത്യയിലെ ക്ഷേത്രങ്ങളും ഉത്സവങ്ങളും ആചാരങ്ങളും മനസ്സിലാക്കാൻ രാജ്യത്തിന്റെ സംസ്കാരത്തെക്കുറിച്ച് അറിഞ്ഞിരിക്കുന്നത് സഹായിക്കും. പ്രാദേശിക ആചാരങ്ങളെക്കുറിച്ച് മനസ്സിലാക്കുന്നത് യാത്ര കൂടുതൽ എളുപ്പമാക്കുമെന്നും പൗളി പറയുന്നു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/GIh0npbq3d1GgGCL00k37z
