കാനഡയിൽ ഇന്ധനവില വർദ്ധിക്കും; നികുതി കുറച്ചാലും ലാഭം സമ്മർ ബ്ലെൻഡ് കൊണ്ടുപോകുമെന്ന് റിപ്പോർട്ട്

ഒട്ടാവ: കാനഡയിലെ വാഹന ഉടമകളെ ആശങ്കയിലാഴ്ത്തി ഇന്ധനവിലയിൽ വൻ വർധനവ്. ഏപ്രിൽ 15-ഓടെ രാജ്യത്തെ പെട്രോൾ പമ്പുകളിൽ വില കൂടിയ ‘സമ്മർ ബ്ലെൻഡ്’ ഇന്ധനം എത്തുന്നതോടെ സാധാരണ പെട്രോളിന് ലിറ്ററിന് ശരാശരി 10 സെന്റ് വരെ വർധിക്കാനാണ് സാധ്യത. ഫെഡറൽ ഗവൺമെന്റ് പ്രഖ്യാപിച്ച ഇന്ധന നികുതി ഇളവ് ഇതോടെ ഫലപ്രദമാകില്ലെന്ന ആശങ്കയും ശക്തമാണ്. വരും ദിവസങ്ങളിൽ വില ഇനിയും ഉയരുമെന്നാണ് വിപണിയിൽ നിന്നുള്ള സൂചനകൾ.

ശൈത്യകാലത്ത് ഉപയോഗിക്കുന്ന ഇന്ധനത്തിൽ നിന്നും വ്യത്യസ്തമായി വേനൽക്കാലത്തെ ചൂടിനെ പ്രതിരോധിക്കാൻ പ്രത്യേകമായി തയ്യാറാക്കുന്നതാണ് സമ്മർ ബ്ലെൻഡ് ഇന്ധനം. ശൈത്യകാലത്ത് കുറഞ്ഞ താപനിലയിൽ വണ്ടി സ്റ്റാർട്ട് ചെയ്യാൻ സഹായിക്കുന്ന ബ്യൂട്ടേൻ (Butane) വേനൽക്കാല ഇന്ധനത്തിൽ ഒഴിവാക്കുന്നു. കുറഞ്ഞ ചിലവിൽ ലഭ്യമായ ബ്യൂട്ടേൻ നീക്കം ചെയ്യുന്നതും വേനൽക്കാലത്തെ മലിനീകരണം കുറയ്ക്കുന്നതിനുള്ള പ്രത്യേക മിശ്രിതങ്ങൾ ചേർക്കുന്നതുമാണ് വില ഉയരാൻ പ്രധാന കാരണം. സമ്മർ ബ്ലെൻഡ് മികച്ച മൈലേജ് നൽകുമെങ്കിലും ഉപഭോക്താവിന്റെ പോക്കറ്റ് ചോർത്തുന്നതാണ് നിലവിലെ സാഹചര്യം.

ഇറാൻ സംഘർഷവും ഹോർമുസ് കടലിടുക്കിലെ കപ്പൽ ഗതാഗത തടസ്സങ്ങളും ആഗോള വിപണിയിൽ എണ്ണവില വർധിപ്പിച്ചിട്ടുണ്ട്. ഇതിന്റെ ആഘാതം കുറയ്ക്കാൻ ഏപ്രിൽ 20 മുതൽ സെപ്റ്റംബർ 7 വരെ ഇന്ധന നികുതി (Federal Fuel Excise Tax) താൽക്കാലികമായി നിർത്തലാക്കാൻ കനേഡിയൻ സർക്കാർ തീരുമാനിച്ചിരുന്നു. ലിറ്ററിന് 10 സെന്റ് വരെ ലാഭം പ്രതീക്ഷിച്ച ഈ നീക്കം, സമ്മർ ബ്ലെൻഡിന്റെ വിലക്കയറ്റത്തോടെ അപ്രസക്തമാകുമെന്ന് ‘കാനഡയൻസ് ഫോർ അഫോർഡബിൾ എനർജി’ പ്രസിഡന്റ് ഡാൻ മക്ടീഗ് പറഞ്ഞു. സർക്കാർ ജിഎസ്ടി (GST) കൂടി ഒഴിവാക്കിയാൽ മാത്രമേ സാധാരണക്കാർക്ക് യഥാർത്ഥ ആശ്വാസം ലഭിക്കൂ എന്ന് അദ്ദേഹം ചൂണ്ടിക്കാട്ടി.

ആഗോള സാഹചര്യങ്ങൾ അനുകൂലമായാൽ പോലും ഇന്ധനവില സാധാരണ നിലയിലാകാൻ മാസങ്ങൾ എടുക്കുമെന്നാണ് റിപ്പോർട്ടുകൾ. ജൂലൈ അല്ലെങ്കിൽ ഓഗസ്റ്റ് മാസത്തിന് മുൻപ് വിപണിയിൽ വലിയ മാറ്റമുണ്ടാകില്ല. വരും ദിവസങ്ങളിൽ പെട്രോൾ വില ലിറ്ററിന് 5 സെന്റ് കൂടി വർധിക്കാൻ സാധ്യതയുണ്ട്. കാനഡയിലുടനീളം ശരാശരി ഇന്ധനവില 1.75 ഡോളറിന് മുകളിൽ തന്നെ തുടരാനാണ് സാധ്യത. വേനൽക്കാല യാത്രകൾക്കായി തയ്യാറെടുക്കുന്ന കനേഡിയൻ കുടുംബങ്ങൾക്ക് ഈ വിലക്കയറ്റം വലിയ തിരിച്ചടിയാകും.

Fuel prices to rise in Canada; Summer Blend will take profits even with tax cuts, report says

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt