ഷാർലറ്റൗൺ: പ്രിൻസ് എഡ്വേഡ് ഐലൻഡിലെ (P.E.I.) കടൽത്തീരങ്ങൾ വേനൽക്കാലത്ത് കൂടുതൽ ശുചിയായി നിലനിർത്താൻ വിദ്യാർഥികളെ ഉൾപ്പെടുത്തി നടത്തുന്ന ‘ക്ലീനിംഗ് അവർ ഷോർലൈൻ’ പദ്ധതിക്ക് ഇത്തവണയും മികച്ച പ്രതികരണം. 2020-ൽ ആരംഭിച്ച പദ്ധതിയുടെ ഭാഗമായി മൂന്ന് സംഘങ്ങളായി തിരിഞ്ഞ് പ്രവർത്തിക്കുന്ന വിദ്യാർഥികൾ ദ്വീപിന്റെ വിവിധ തീരപ്രദേശങ്ങളിൽ നിന്ന് തിരമാലകളും കൊടുങ്കാറ്റുകളും മനുഷ്യരുടെ അശ്രദ്ധയും കാരണം അടിഞ്ഞുകൂടിയ മാലിന്യങ്ങൾ നീക്കം ചെയ്യുകയാണ്. വീടുകളിലെ മാലിന്യങ്ങൾ, സ്റ്റൈറോഫോം, ലോഹാവശിഷ്ടങ്ങൾ തുടങ്ങി പലതരത്തിലുള്ള വസ്തുക്കളാണ് ഇവർ ശേഖരിക്കുന്നത്.
ഹൈസ്കൂൾ, കോളജ്, സർവകലാശാലകളിൽ പഠിക്കുന്ന കൗമാരക്കാരും യുവാക്കളുമാണ് പദ്ധതിയുടെ പ്രധാന കരുത്ത്. പ്രിൻസ് എഡ്വേഡ് ഐലൻഡ് സർവകലാശാലയിൽ പരിസ്ഥിതി പഠനം നടത്തുന്ന 19-കാരനായ കെൽഡൻ ഇർവിംഗ് ഉൾപ്പെടെയുള്ള വിദ്യാർഥികൾ ഗ്രീൻവിച്ച് ബീച്ചിൽ ശുചീകരണ പ്രവർത്തനങ്ങളിൽ സജീവമാണ്. ക്ലാസ് മുറികളിൽ പഠിക്കുന്ന പരിസ്ഥിതി സംരക്ഷണ ആശയങ്ങൾ യഥാർഥ സാഹചര്യത്തിൽ പ്രാവർത്തികമാക്കാൻ ഈ ജോലി അവസരമൊരുക്കുന്നതായും പ്രകൃതിയെ കൂടുതൽ അടുത്തറിയാൻ ഇതിലൂടെ സാധിക്കുന്നതായും വിദ്യാർഥികൾ പറയുന്നു.
പി.ഇ.ഐ നാഷണൽ പാർക്കിന്റെ ഭാഗമായ ഗ്രീൻവിച്ച് മേഖല ദ്വീപിലെ ഏറ്റവും വലിയ മണൽത്തിട്ടകളും അപൂർവ സസ്യജന്തു വൈവിധ്യവും സംരക്ഷിക്കുന്ന പ്രദേശമാണ്. ഫെഡറൽ നിയമത്തിന്റെ സംരക്ഷണത്തിലുള്ള വംശനാശഭീഷണി നേരിടുന്ന പൈപ്പിംഗ് പ്ലോവർ ഉൾപ്പെടെയുള്ള ജീവികളുടെ ആവാസവ്യവസ്ഥയിൽ മാലിന്യം എത്താതിരിക്കാൻ ഇത്തരം ശുചീകരണ പ്രവർത്തനങ്ങൾ നിർണായകമാണെന്ന് പദ്ധതി അധികൃതർ ചൂണ്ടിക്കാട്ടുന്നു.
അതേസമയം, പി.ഇ.ഐയുടെ പ്രശസ്തമായ കടൽത്തീരങ്ങളുടെ ശുചിത്വം വിനോദസഞ്ചാരികളുടെ അനുഭവത്തെയും ദ്വീപിന്റെ പ്രതിച്ഛായയെയും നേരിട്ട് സ്വാധീനിക്കുന്നതിനാൽ, തീരങ്ങളിലും തടാകങ്ങളുടെയും ജലാശയങ്ങളുടെയും സമീപത്ത് മാലിന്യം ശ്രദ്ധയിൽപ്പെട്ടാൽ പ്രവിശ്യയുടെ ഓൺലൈൻ സംവിധാനത്തിലൂടെയോ ഫോൺ വഴിയോ അധികൃതരെ അറിയിക്കാൻ പൊതുജനങ്ങളോടും അഭ്യർഥിച്ചിട്ടുണ്ട്.
From sandy stretches to waste... Students step up to protect PEI's shores.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
