‘ഫ്രണ്ട്‌സ്’ താരം മാറ്റ് ലെബ്ലാങ്ക് ഇനി കനേഡിയൻ പൗരൻ; വഴിത്തിരിവായത് പുതിയ നിയമം

ഒന്റാറിയോ: വിഖ്യാത അമേരിക്കൻ ടെലിവിഷൻ പരമ്പര ‘ഫ്രണ്ട്‌സി’ലെ നായകൻ മാറ്റ് ലെബ്ലാങ്ക് ഇനി ഔദ്യോഗികമായി കനേഡിയൻ പൗരൻ. കാനഡയുടെ പൗരത്വ നിയമത്തിൽ വരുത്തിയ നിർണ്ണായകമായ ഭേദഗതിയാണ് മാറ്റ് ലെബ്ലാങ്കിനും അദ്ദേഹത്തെപ്പോലെ തലമുറകളായി അമേരിക്കയിൽ താമസിക്കുന്ന ദശലക്ഷക്കണക്കിന് ആളുകൾക്കും കനേഡിയൻ പൗരത്വം നേടിക്കൊടുത്തത്. നേരത്തെ തന്നെ കനേഡിയൻ പൗരത്വമുള്ള സഹതാരം മാത്യു പെറിക്കൊപ്പം മാറ്റ് ലെബ്ലാങ്കും ഇനി ഇരട്ട പൗരത്വമുള്ള കനേഡിയൻ-അമേരിക്കൻ താരമായി മാറും.

2025 ഡിസംബർ 15-ന് നിലവിൽ വന്ന ‘ബിൽ സി-3’ പ്രകാരമാണ് ഈ വിപ്ലവകരമായ മാറ്റം സാധ്യമായത്. മുൻപ് പാരമ്പര്യമായി പൗരത്വം ലഭിക്കുന്നതിന് നിലനിന്നിരുന്ന ‘ഒന്നാം തലമുറ പരിധി’ പുതിയ നിയമത്തിലൂടെ കാനഡ എടുത്തുമാറ്റി. ഇതോടെ മുൻഗാമികളിൽ ആരെങ്കിലും കനേഡിയൻ പൗരന്മാരാണെങ്കിൽ, എത്ര തലമുറ കഴിഞ്ഞാലും അവർക്ക് പൗരത്വത്തിന് അപേക്ഷിക്കാനാകും. മാറ്റ് ലെബ്ലാങ്കിന്റെ പിതാവ് പോൾ ലെബ്ലാങ്ക് ഫ്രഞ്ച്-കനേഡിയൻ വംശജനാണ്. അദ്ദേഹത്തിന്റെ കുടുംബ വേരുകൾ കാനഡയിലെ ന്യൂ ബ്രൺസ്‌വിക്ക് പ്രവിശ്യയിലാണെന്ന കണ്ടെത്തലാണ് താരത്തിന് പുതിയ നിയമത്തിലൂടെ പൗരത്വം ഉറപ്പാക്കിയത്.

കാനഡയുടെ പുതിയ പൗരത്വ നിയമം അമേരിക്കയിലെ വലിയൊരു വിഭാഗം ജനതയ്ക്കാണ് ഗുണകരമാകുന്നത്. പ്രധാനമായും ന്യൂ ഇംഗ്ലണ്ട് മേഖലയിലുള്ളവർക്കും ഫ്രഞ്ച് കുടുംബപ്പേരുകളുള്ളവർക്കും പൗരത്വത്തിനുള്ള സാധ്യത കൂടുതലാണ്. ജനന സർട്ടിഫിക്കറ്റ്, മാമോദീസ രേഖകൾ, വിവാഹ സർട്ടിഫിക്കറ്റ് തുടങ്ങിയ രേഖകൾ ഹാജരാക്കി ആർക്കും പൗരത്വത്തിന് അപേക്ഷിക്കാം. നിലവിൽ ക്യൂബെക്ക് പോലുള്ള പ്രവിശ്യകളിലെ നാഷണൽ ആർക്കൈവ്‌സിൽ ഇത്തരം രേഖകൾക്കായി വലിയ തിരക്കാണ് അനുഭവപ്പെടുന്നത്.

അമേരിക്കയും കാനഡയും ഇരട്ട പൗരത്വം അംഗീകരിക്കുന്ന രാജ്യങ്ങളായതിനാൽ ഇതിൽ നിയമതടസ്സങ്ങളില്ല. കനേഡിയൻ പൗരത്വം ലഭിക്കുന്നതോടെ കാനഡയിൽ താമസിക്കാനും ജോലി ചെയ്യാനും സൗജന്യ ആരോഗ്യ പരിരക്ഷാ സൗകര്യങ്ങൾ ഉപയോഗിക്കാനും ഇവർക്ക് അവകാശമുണ്ടാകും. അമേരിക്കയിൽ നിന്ന് വിഭിന്നമായി, കാനഡ തങ്ങളുടെ പൗരന്മാരിൽ നിന്ന് ആഗോളാടിസ്ഥാനത്തിൽ നികുതി ഈടാക്കാത്തതും പൗരത്വം തേടുന്നവർക്ക് ആശ്വാസകരമാണ്. ലോകത്തിലെ ഏറ്റവും ശക്തമായ പാസ്‌പോർട്ടുകളിൽ ഒന്നായ കനേഡിയൻ പാസ്‌പോർട്ട് സ്വന്തമാക്കാൻ നിലവിൽ 10 മാസത്തെ പ്രോസസിംഗ് കാലയളവാണ് ആവശ്യമുള്ളത്.

'Friends' star Matt LeBlanc is now a Canadian citizen; new law is a turning point

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt