വിക്ടോറിയ: ബ്രിട്ടീഷ് കൊളംബിയ പ്രവിശ്യയിൽ വിതരണം ചെയ്യുന്ന സൗജന്യ naloxone കിറ്റുകൾ, മാരകമായേക്കാവുന്ന അഞ്ചിൽ നാല് മയക്കുമരുന്ന് മരണങ്ങളും തടയുന്നതായി പുതിയ പഠന റിപ്പോർട്ട് വ്യക്തമാക്കുന്നു. പ്രവിശ്യയിൽ ലഭ്യമാക്കുന്ന ‘Take home naloxone’ സേവനങ്ങൾ ഒപ്പിയോയിഡ് വിഷബാധ മൂലമുണ്ടാകുമായിരുന്ന 76 മുതൽ 80 ശതമാനം വരെയുള്ള മരണങ്ങൾ പ്രതിരോധിച്ചതായി ഗവേഷകർ വിലയിരുത്തി. 2019 മുതൽ 2024 വരെയുള്ള കാലയളവിലെ ഡാറ്റയും മോഡലിംഗും അടിസ്ഥാനമാക്കിയാണ് പുതിയ റിപ്പോർട്ട് പുറത്തുവിട്ടിരിക്കുന്നത്.
ബ്രിട്ടീഷ് കൊളംബിയ സെന്റർ ഫോർ ഡിസീസ് കൺട്രോളിലെ (BCCDC) സീനിയർ സയന്റിസ്റ്റും പഠനത്തിന്റെ മുഖ്യ രചയിതാവുമായ മൈക്ക് ഇർവിൻ ഈ കണ്ടെത്തലുകൾ സ്ഥിരീകരിച്ചു. പ്രവിശ്യയിലുടനീളമുള്ള ഹാം റിഡക്ഷൻ (തീവ്രത കുറയ്ക്കൽ) വിഭാഗങ്ങളുടെ നിരന്തരമായ പ്രവർത്തനമാണ് naloxone ലഭ്യമാക്കുന്നതിലൂടെ ഈ നേട്ടം കൈവരിക്കാൻ സഹായിച്ചതെന്ന് അദ്ദേഹം വ്യക്തമാക്കി. എന്നാൽ, ഇതേ പഠന കാലയളവിൽ ബി.സി. കോറോണേഴ്സ് സർവീസിന്റെ കണക്കുകൾ പ്രകാരം 12,356 പേർക്ക് വിഷലിപ്തമായ മയക്കുമരുന്ന് കാരണം ജീവൻ നഷ്ടപ്പെട്ടിട്ടുണ്ടെന്നും, ഇത് മരണങ്ങൾ തടയുന്നതിൽ ഇനിയും കൂടുതൽ പ്രവർത്തനങ്ങൾ നടത്തേണ്ടതുണ്ടെന്ന് കാണിക്കുന്നുവെന്നും അദ്ദേഹം കൂട്ടിച്ചേർത്തു.
മയക്കുമരുന്ന് വിഷബാധയേൽക്കുന്ന പത്തിൽ ഒരാൾ മരണപ്പെടാറുണ്ടെന്നും, എന്നാൽ നാളോക്സോൺ ഉപയോഗിക്കുന്നതിലൂടെയും ഓവർഡോസ് പ്രിവൻഷൻ കേന്ദ്രങ്ങൾ പ്രയോജനപ്പെടുത്തുന്നതിലൂടെയും മരണനിരക്ക് ഇരുപതിൽ ഒന്നായി കുറയുന്നുണ്ടെന്നും ഗവേഷകർ ചൂണ്ടിക്കാട്ടുന്നു. പഠനവിധേയമാക്കിയ കാലയളവിൽ, ഓവർഡോസ് പ്രിവൻഷൻ, സൂപ്പർവൈസ്ഡ് കൺസംപ്ഷൻ കേന്ദ്രങ്ങൾ എന്നിവ വഴി മയക്കുമരുന്ന് കുത്തിവെക്കുന്ന 1,00,000 ആളുകളിൽ ഏകദേശം 340 സാധ്യതാ മരണങ്ങൾ ഒഴിവാക്കാൻ കഴിഞ്ഞതായും റിപ്പോർട്ടിൽ പറയുന്നു. പ്രവിശ്യയിൽ നാളോക്സോൺ കിറ്റുകൾ സൗജന്യമായി വിതരണം ചെയ്യുന്നുണ്ടെങ്കിലും എല്ലാ താമസക്കാർക്കും ഒരേ അളവിലോ വൈവിധ്യത്തിലോ ഈ സേവനങ്ങൾ ലഭിക്കുന്നില്ലെന്നും ഇർവിൻ വ്യക്തമാക്കി.
മയക്കുമരുന്ന് ഉപയോഗം പൂർണ്ണമായും തടയുന്നതിനും ചികിത്സാ-പുനരധിവാസ സംവിധാനങ്ങൾ ശക്തിപ്പെടുത്തുന്നതിനുമുള്ള പ്രവർത്തനങ്ങൾ പ്രവിശ്യയിൽ ഊർജ്ജിതമാക്കണമെന്ന് ബിസിസിഡിസിയിലെ പബ്ലിക് ഹെൽത്ത് ഫിസിഷ്യൻ അലക്സിസ് ക്രാബ്ട്രീ ആവശ്യപ്പെട്ടു. കാനഡയിലെ കനേഡിയൻ ഇൻസ്റ്റിറ്റ്യൂട്ട് ഫോർ സബ്സ്റ്റൻസ് യൂസ് റിസർച്ചിലെ ശാസ്ത്രജ്ഞനായ ബെർണി പോളി, ഭവനരഹിതർക്കിടയിൽ വിഷലിപ്തമായ മയക്കുമരുന്ന് മൂലമുണ്ടാകുന്ന മരണങ്ങൾ വർദ്ധിച്ചുവരുന്നതായി ചൂണ്ടിക്കാട്ടി. കൗൺസിലിംഗ്, പാർപ്പിട സൗകര്യം, ട്രോമ സപ്പോർട്ട് എന്നിവയുടെ അഭാവവും വിക്ടോറിയ പോലുള്ള സ്ഥലങ്ങളിൽ നിന്ന് ആളുകളെ നിരന്തരം ഒഴിപ്പിക്കുന്നതും ഇത്തരം മരണങ്ങൾ വർദ്ധിക്കാൻ കാരണമാകുന്നുണ്ടെന്ന് അദ്ദേഹം വിലയിരുത്തി.
Free naloxone distribution saves thousands of lives in BC; new report released
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
