ഒട്ടാവ : ഫസ്റ്റ് നേഷൻസ് ജനവിഭാഗങ്ങൾക്ക് സുരക്ഷിതമായ കുടിവെള്ളം ഉറപ്പാക്കാൻ നിയമനിർമ്മാണവുമായി മുന്നോട്ടുപോകുമ്പോഴും, ഇതിനുള്ള നിയമപരമായ ബാധ്യത തങ്ങൾക്കില്ലെന്ന് കാണിച്ച് കോടതിയിൽ പോരാട്ടം തുടർന്ന് കാർണി സർക്കാർ. ഷമാറ്റവ ഫസ്റ്റ് നേഷൻ നൽകിയ ക്ലാസ്-ആക്ഷൻ ഹർജിയിൽ കുടിവെള്ള അവകാശം അംഗീകരിച്ച് ഫെഡറൽ കോടതി പുറപ്പെടുവിച്ച സുപ്രധാന വിധി റദ്ദാക്കാനാണ് കനേഡിയൻ നീതിന്യായ മന്ത്രാലയം ഇപ്പോൾ ശ്രമിക്കുന്നത്. റിസർവുകളിൽ സുരക്ഷിതമായ കുടിവെള്ളം നൽകാൻ കാനഡയ്ക്ക് യാതൊരു നിയമപരമായ ബാധ്യതയുമില്ലെന്ന് ഫെഡറൽ അപ്പീൽ കോടതി പ്രസ്താവിക്കണമെന്നാണ് ഒട്ടാവയുടെ ആവശ്യം. സർക്കാരിന്റെ ഈ ഇരട്ടത്താപ്പിനെതിരെ അഭിഭാഷകരും പ്രതിപക്ഷ അംഗങ്ങളും രംഗത്തെത്തിയിട്ടുണ്ട്.
റിസർവ് ഭൂമികളിൽ സുരക്ഷിതമായ കുടിവെള്ളം ലഭ്യമാക്കുന്നതിൽ ഫസ്റ്റ് നേഷൻസ് ജനവിഭാഗങ്ങൾക്ക് വ്യക്തമായ അവകാശമുണ്ടെന്നും, അതിന്റെ നിയന്ത്രണം ഏറ്റെടുത്ത സാഹചര്യത്തിൽ അവരുടെ താൽപ്പര്യങ്ങൾ സംരക്ഷിക്കാൻ കാനഡയ്ക്ക് ബാധ്യതയുണ്ടെന്നും കഴിഞ്ഞ ഡിസംബറിൽ ജസ്റ്റിസ് പോൾ ഫാവെൽ വിധിച്ചിരുന്നു. എന്നാൽ, ഈ വിധി നിലവിലുള്ള നിയമപരമായ ബാധ്യതകൾക്ക് അപ്പുറമാണെന്നും ഗവൺമെന്റിന്റെ അൺലിമിറ്റഡ് ബാധ്യതയ്ക്ക് ഇത് വഴിവെക്കുമെന്നും കാണിച്ച് മേയ് 29-നാണ് കാനഡ അപ്പീൽ ഫയൽ ചെയ്തത്. ഫസ്റ്റ് നേഷൻസ് ജനങ്ങളുടെ റിസർവ് ഭൂമിയോടുള്ള താൽപ്പര്യത്തിൽ കുടിവെള്ളം ഉൾപ്പെടുന്നില്ലെന്നും, വെള്ളം ഭൂമിയോട് ചേർന്നുനിൽക്കുന്നതല്ലെന്നും അത് അതിനടിയിലൂടെയും ചുറ്റും ഒഴുകുന്നതാണെന്നുമാണ് അഞ്ച് ഫെഡറൽ അഭിഭാഷകർ കോടതിയിൽ വാദിച്ചത്.
ഈ നിയമപോരാട്ടം ഫസ്റ്റ് നേഷൻസ് ക്ലീൻ വാട്ടർ ആക്ട് (ബിൽ C-37) നിർദ്ദേശത്തെ തകർക്കുന്നതാണെന്ന് ഷമാറ്റവയ്ക്ക് വേണ്ടി ഹാജരായ ടൊറന്റോയിലെ അഭിഭാഷകൻ മൈക്കൽ റോസൻബെർഗ് വ്യക്തമാക്കി. മുൻപ് അവതരിപ്പിച്ച ബില്ലിൽ സുരക്ഷിതമായ കുടിവെള്ളത്തിനുള്ള ഫസ്റ്റ് നേഷൻസിന്റെ അവകാശം വ്യക്തമായി അംഗീകരിച്ചിരുന്നുവെങ്കിൽ, പുതിയ ബില്ലിൽ ആ അവകാശം ‘ക്രമമായി സാക്ഷാത്കരിക്കുക’ എന്നത് കാനഡയുടെ നയം മാത്രമാണെന്ന ദുർബലമായ ഭാഷയാണ് ഉപയോഗിച്ചിരിക്കുന്നത്. കോടതിയിലെ വാദങ്ങളെ പിന്തുണയ്ക്കാൻ വേണ്ടിയാണ് ബില്ലിൽ മാറ്റം വരുത്തിയതെന്നും ഇത് ഫസ്റ്റ് നേഷൻസ് ചർച്ച ചെയ്ത് ഉണ്ടാക്കിയ വ്യവസ്ഥകളെ അട്ടിമറിക്കുന്നതാണെന്നും അദ്ദേഹം ആരോപിച്ചു. ഫെഡറൽ സർക്കാരിന്റെ നിലപാട് രാഷ്ട്രീയ നാടകമാണെന്ന് ജെ.എഫ്.കെ ലോയിലെ മുതിർന്ന അഭിഭാഷകൻ ക്ലേട്ടൺ ലിയോനാർഡും വിമർശിച്ചു.
ഇതുമായി ബന്ധപ്പെട്ട് ഇൻഡിജിനസ് സർവീസസ് മിനിസ്റ്റർ മാൻഡി ഗൾ-മാസ്റ്റിയുടെ ഓഫീസ് പ്രതികരണത്തിന് തയ്യാറായില്ല. എന്നാൽ, പ്രധാന വിഷയങ്ങളിൽ കൂടുതൽ വ്യക്തത തേടിയാണ് അപ്പീൽ നൽകിയതെന്നും, ഷമാറ്റവ ഫസ്റ്റ് നേഷന് സുരക്ഷിത കുടിവെള്ളം ഉറപ്പാക്കാൻ 2019 മുതൽ ജലശുദ്ധീകരണ പ്ലാന്റിനായി 26.5 ദശലക്ഷം ഡോളർ നൽകിയിട്ടുണ്ടെന്നും ഇൻഡിജിനസ് സർവീസസ് കാനഡ വക്താവ് അനിസ്പിരാഗാസ് പിരഗാസനാഥർ പ്രസ്താവനയിലൂടെ അറിയിച്ചു. 2020 ജൂൺ 20 മുതൽ കുടിവെള്ള അഡ്വൈസറി നേരിട്ട എല്ലാ ഫസ്റ്റ് നേഷൻസ് ജനങ്ങൾക്കും വേണ്ടിയാണ് ഷമാറ്റവയും ചീഫ് ജോർദ്ന ഹില്ലും ചേർന്ന് 1.1 ബില്യൺ ഡോളറിന്റെ ഈ കേസ് ഫയൽ ചെയ്തിരിക്കുന്നത്. ലിബറൽ സർക്കാർ തദ്ദേശീയരുടെ അവകാശങ്ങൾ അതിവേഗം പിൻവലിക്കുകയാണെന്ന് എൻ.ഡി.പി എം.പി ലിയ ഗാസനും കൺസർവേറ്റീവ് വിമർശകൻ ബില്ലി മൊറിനും കുറ്റപ്പെടുത്തി.
First Nations drinking water rights: Carney government continues legal battle despite new bill
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
