ടൊറന്റോ: നീണ്ട 18 വർഷത്തെ നിയമപോരാട്ടത്തിനൊടുവിൽ ട്രാഫിക് പിഴ കേസിൽ ടൊറന്റോ സ്വദേശിയായ ഡ്രൈവർക്ക് അനുകൂലമായി കനേഡിയൻ കോടതിയുടെ നിർണായക വിധി. 2007-ൽ ചുമത്തപ്പെട്ട കുറ്റത്തിൽ ഡ്രൈവർ നെവിൽ ഗ്രീൻ നൽകിയ അപ്പീലിലാണ് ഒന്റാറിയോ കോടതി ഇപ്പോൾ അനുകൂല വിധി പ്രസ്താവിച്ചിരിക്കുന്നത്. കേസിന്റെ വിചാരണാ വേളയിൽ മുൻ ജഡ്ജി നടത്തിയ പരാമർശങ്ങൾ ഒരു ജുഡീഷ്യൽ ഓഫീസർക്ക് ചേരാത്തതാണെന്നും വിചാരണ പൂർണ്ണമായും നീതിയുക്തമല്ലായിരുന്നുവെന്നും അപ്പീൽ പരിഗണിച്ച ഒന്റാറിയോ കോടതി ജസ്റ്റിസ് ബ്രോക്ക് ജോൺസ് നിരീക്ഷിച്ചു.
2007 ജൂൺ 4-നാണ് കേസിനാസ്പദമായ സംഭവം നടക്കുന്നത്. ടൊറന്റോയിലെ ജെയിൻ സ്ട്രീറ്റ്, ഷെപ്പാർഡ് അവന്യൂ വെസ്റ്റ് കവലയിൽ നെവിൽ ഗ്രീൻ ചുവപ്പ് സിഗ്നൽ മറികടന്ന് വാഹനമോടിച്ചുവെന്നായിരുന്നു പോലീസ് ഉദ്യോഗസ്ഥന്റെ മൊഴി. എന്നാൽ താൻ കുറ്റം ചെയ്തിട്ടില്ലെന്നും ആ സമയത്ത് അവിടെ റോഡ് നിർമ്മാണം നടന്നിരുന്നതിനാൽ ഗതാഗത തടസ്സമുണ്ടായിരുന്നുവെന്നും ഗ്രീൻ വാദിച്ചു. തുടർന്ന് 2008 ജൂലൈ 10-ന് ജസ്റ്റിസ് ഓഫ് ദി പീസ് ജെ. ഫ്രെഡറിക്കിന്റെ മുന്നിൽ നടന്ന വിചാരണയിൽ ഗ്രീൻ കുറ്റക്കാരനാണെന്ന് കണ്ടെത്തുകയും പിഴ ചുമത്തുകയും ചെയ്തു. പോലീസ് ഉദ്യോഗസ്ഥന്റെ മൊഴി കൃത്യവും വിശ്വസനീയവുമാണെന്ന് ചൂണ്ടിക്കാണിച്ചായിരുന്നു അന്ന് ഫ്രെഡറിക് ശിക്ഷ വിധിച്ചത്.
2008-ലെ വിചാരണ വേളയിൽ വക്കീലില്ലാതെ സ്വന്തമായാണ് നെവിൽ ഗ്രീൻ കോടതിയിൽ വാദിച്ചത്. ക്രോസ് വിസ്താരത്തിനിടയിൽ, സംഭവസ്ഥലത്തെ റോഡ് നിർമ്മാണം തെളിയിക്കുന്നതിനായി പിറ്റേദിവസം എടുത്ത ചിത്രങ്ങൾ കോടതിയിൽ ഹാജരാക്കാൻ ഗ്രീൻ ശ്രമിച്ചു. സ്ഥലത്ത് നിർമ്മാണപ്രവർത്തനങ്ങൾ നടന്നിട്ടില്ലെന്ന പോലീസ് ഉദ്യോഗസ്ഥന്റെ വാദം തെറ്റാണെന്ന് തെളിയിക്കാൻ ഈ ചിത്രങ്ങൾക്ക് സാധിക്കുമായിരുന്നു. എന്നാൽ, ഈ തെളിവുകൾ എങ്ങനെയാണ് കോടതിയിൽ സമർപ്പിക്കേണ്ടതെന്ന് ഗ്രീൻ ചോദിച്ചപ്പോൾ, “ഇത് ‘ലോ ആൻഡ് ഓർഡർ’ (Law and Order) ടിവി പരമ്പരയല്ല” എന്നായിരുന്നു ജഡ്ജി ഫ്രെഡറിക്കിന്റെ പരിഹാസം. പിന്നീട് ചിത്രങ്ങൾ സമർപ്പിക്കാൻ വീണ്ടും ശ്രമിച്ചെങ്കിലും സംഭവം നടന്നതിന് ശേഷം എടുത്തതാണെന്ന് പറഞ്ഞ് കോടതി അവ നിരസിക്കുകയായിരുന്നു.
താൻ പച്ച സിഗ്നലിലാണ് ടൌണിലേക്ക് പ്രവേശിച്ചതെന്നും എന്നാൽ മുന്നിലുണ്ടായിരുന്ന വാഹനം കാരണം മുന്നോട്ട് പോകാൻ കഴിയാതെ കുടുങ്ങിയപ്പോഴാണ് സിഗ്നൽ മഞ്ഞയായതെന്നും ഗ്രീൻ കോടതിയെ അറിയിച്ചിരുന്നു. എന്നാൽ ഗ്രീനിന്റെ ഈ വാദങ്ങളോ മൊഴികളോ പരിശോധിക്കാൻ അന്ന് കോടതി തയ്യാറായില്ലെന്ന് അപ്പീൽ കോടതി ചൂണ്ടിക്കാട്ടി. കഴിഞ്ഞ ദിവസം അപ്പീൽ ഹർജി പരിഗണിച്ച ജസ്റ്റിസ് ബ്രോക്ക് ജോൺസ്, 2008-ലെ വിധിന്യായത്തിലെ ഗുരുതരമായ വീഴ്ചകൾ അക്കമിട്ട് നിരത്തിയാണ് ഗ്രീനിന്റെ ശിക്ഷ റദ്ദാക്കിയത്. കേസിന്റെ അപ്പീൽ ഫയലുകൾ ദീർഘകാലം ‘കാണാതായതാണ്’ നടപടികൾ 18 വർഷത്തോളം വൈകാൻ കാരണമായതെന്ന് കോടതി നിരീക്ഷിച്ചു.
“നിയമപരിജ്ഞാനമില്ലാത്ത, കുറ്റക്കാരനെന്ന് തെളിയിക്കപ്പെടാത്ത ഒരു സാധാരണക്കാരനോട് കോടതി നടത്തുന്ന പരിഹാസങ്ങൾ നീതിന്യായ വ്യവസ്ഥയുടെ അന്തസ്സിന് കളങ്കം വരുത്തുന്നതാണ്. കോടതികളിൽ കേസുകളുടെ ബാഹുല്യം ഉണ്ടെങ്കിലും, സ്വന്തമായി വാദിക്കുന്ന പൊതുജനങ്ങൾക്ക് നീതിയുക്തമായ വിചാരണ ഉറപ്പാക്കാൻ കോടതികൾക്ക് ബാധ്യതയുണ്ട്.” — ജസ്റ്റിസ് ബ്രോക്ക് ജോൺസ്
പ്രതിയുടെ വാദങ്ങളെ പൂർണ്ണമായി അവഗണിച്ച്, പോലീസ് ഉദ്യോഗസ്ഥന്റെ മൊഴി മാത്രം ആധാരമാക്കിയാണ് മുൻപ് വിധി പ്രസ്താവിച്ചതെന്ന് കോടതി വിലയിരുത്തി. ഗ്രീനിന്റെ ഭാഗത്ത് ന്യായമായ സംശയങ്ങൾക്ക് ഇടനൽകുന്ന മൊഴികളുണ്ടായിട്ടും അത് പരിശോധിച്ചില്ലെന്ന് വ്യക്തമാക്കിയ ജസ്റ്റിസ് ബ്രോക്ക് ജോൺസ്, നെവിൽ ഗ്രീനിനെ കുറ്റവിമുക്തനാക്കിക്കൊണ്ട് അപ്പീൽ അനുവദിക്കുകയായിരുന്നു.
Files 'disappeared', appeal took 18 years to resolve; driver finally acquitted in traffic ticket case
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
