ദേശീയ സുരക്ഷാ ആശങ്കകൾ കണക്കിലെടുത്ത് കാനഡയിലെ ഒരു ചൈനീസ് കമ്പനിയോട് ബിസിനസ്സ് അവസാനിപ്പിച്ച് രാജ്യം വിടാൻ ഫെഡറൽ സർക്കാർ ഉത്തരവിട്ടു. നിരീക്ഷണ ക്യാമറ നിർമ്മാതാക്കളായ ഹാങ്ഷൗ ഹിക്വിഷൻ ഡിജിറ്റൽ ടെക്നോളജി കമ്പനി ലിമിറ്റഡിനെതിരെയാണ് നടപടി. ഇൻവെസ്റ്റ്മെന്റ് കാനഡ ആക്ടിന് കീഴിലുള്ള ദേശീയ സുരക്ഷാ അവലോകനത്തിന്റെ ഭാഗമായാണ് നീക്കം. അവലോകനത്തിന്റെ ഭാഗമായി, കാനഡയുടെ സുരക്ഷാ, രഹസ്യാന്വേഷണ സമൂഹം നൽകിയ വിവരങ്ങളും തെളിവുകളും സർക്കാർ പരിശോധിച്ചതായി വ്യവസായ മന്ത്രി മെലാനി ജോളി പറഞ്ഞു. കമ്പനിയെ കാനഡയിൽ പ്രവർത്തിക്കാൻ അനുവദിക്കുന്നത് രാജ്യത്തിന്റെ ദേശീയ സുരക്ഷയ്ക്ക് ദോഷകരമാകുമെന്ന് സർക്കാരിന് വ്യക്തമായെന്നും മന്ത്രി അറിയിച്ചു. ഹിക്വിഷൻ കാനഡ അടച്ചുപൂട്ടാൻ ഉത്തരവിട്ടതിനു പുറമേ, ഫെഡറൽ ഗവൺമെന്റ്, അതിന്റെ വകുപ്പുകൾ, ഏജൻസികൾ, ക്രൗൺ കോർപ്പറേഷനുകൾ എന്നിവ കമ്പനിയിൽ നിന്നുള്ള ഉപകരണങ്ങൾ ഉപയോഗിക്കുകയോ വാങ്ങുകയോ ചെയ്യുന്നില്ലെന്ന് ഉറപ്പാക്കാനും ശ്രദ്ധിക്കണമെന്നും മന്ത്രി പറഞ്ഞു.
ഹാങ്ഷൗ ഹിക്വിഷൻ ഡിജിറ്റൽ ടെക്നോളജി കമ്പനി ലിമിറ്റഡ് എന്ന ഔപചാരിക നാമമുള്ള ഹിക്വിഷൻ, ലോകത്തിലെ ഏറ്റവും വലിയ നിരീക്ഷണ ഉപകരണ നിർമ്മാതാവ് എന്നാണ് സ്വയം വിശേഷിപ്പിക്കുന്നത്. 2014 മുതൽ ഇതിന് ഒരു കനേഡിയൻ അനുബന്ധ സ്ഥാപനമുണ്ട്.യുഎസ്, ഓസ്ട്രേലിയ, യുകെ എന്നിവിടങ്ങളിൽ ഈ ബിസിനസും അതിന്റെ അനുബന്ധ സ്ഥാപനങ്ങളും ഉപരോധങ്ങളുടെ ഒരു പരമ്പര തന്നെ നേരിട്ടിട്ടുണ്ട്. ഉയ്ഗൂർ ജനത മനുഷ്യാവകാശ ലംഘനങ്ങൾ നേരിടുന്ന സിൻജിയാങ് മേഖലയിൽ ഉപയോഗിക്കുന്ന നിരീക്ഷണ ക്യാമറകൾ കമ്പനി ചൈനക്കാർക്ക് നൽകിയെന്ന ആരോപണവും ഉണ്ടായിരുന്നു. തൽഫലമായി, ബെസ്റ്റ് ബൈ, ഹോം ഡിപ്പോ, ലോസ് എന്നിവയെല്ലാം ഹൈക്വിഷൻ ഉൽപ്പന്നങ്ങൾ വിൽക്കുന്നത് നിർത്തിയതായി റിപ്പോർട്ടുണ്ട്.
ഹിക്വിഷൻ അവലോകനം ചെയ്യാൻ കാനഡ തീരുമാനിച്ചതിന് പിന്നിലെ കാരണങ്ങൾ എന്താണെന്ന് വ്യക്തമല്ല. ദേശീയ സുരക്ഷയ്ക്ക് ഹാനികരമായേക്കാവുന്ന ഏതൊരു വിദേശ നിക്ഷേപവും അന്വേഷിക്കാനും രാജ്യത്തിന് അപകടമുണ്ടാക്കുന്നതായി കണ്ടെത്തിയ ഏതൊരു കമ്പനിയെയും രാജ്യം വിടാൻ ഉത്തരവിടാനും ഇൻവെസ്റ്റ്മെന്റ് കാനഡ നിയമം സർക്കാരിനെ അനുവദിക്കുന്നുണ്ട്.
കാനഡയുടെ നടപടിയോട് ശക്തമായി വിയോജിക്കുന്നുവെന്നും ഈ നീക്കത്തെ അഗാധമായ ആശങ്കയോടെയാണ് കാണുന്നതെന്നും കമ്പനി പ്രതികരിച്ചു. വസ്തുതാപരമായ അടിസ്ഥാനമോ, നടപടിക്രമമോ, സുതാര്യതയോ ഇല്ലാതെയാണ് നടപടിയെന്നും കമ്പനി പ്രസ്താവനയിൽ പറഞ്ഞു. എല്ലാ സർക്കാർ കക്ഷികളുമായും പൂർണ്ണമായും സഹകരിച്ചിട്ടുണ്ടെന്നും വിശദമായ ഡോക്യുമെന്റേഷൻ സഹിതം സമയബന്ധിതവും സമഗ്രവുമായ പ്രതികരണങ്ങൾ അവർക്ക് നൽകുമെന്നും ഹിക്വിഷൻ അറിയിച്ചിട്ടുണ്ട്
