ന്യൂഡൽഹി: അമേരിക്കയുടെ ഉപരോധത്തെത്തുടർന്ന് ഹോർമുസ് കടലിടുക്കിലെ ഇറാനിയൻ തുറമുഖങ്ങളിൽ കുടുങ്ങിക്കിടക്കുന്ന ഇന്ത്യൻ നാവികർ കടുത്ത പ്രതിസന്ധിയിലെന്ന് റിപ്പോർട്ട്. ഇന്ത്യൻ നാവികനായ അങ്കിത് യാദവും മൂന്ന് സഹപ്രവർത്തകരും കഴിഞ്ഞ രണ്ടാഴ്ചയിലധികമായി ഭക്ഷണവും സുരക്ഷയുമില്ലാതെ കപ്പലിൽ കഴിയുകയാണ്. നിലവിൽ തക്കാളിയും ഉള്ളിയും മാത്രം കഴിച്ചാണ് തങ്ങൾ ജീവൻ നിലനിർത്തുന്നതെന്ന് ഇവർ വെളിപ്പെടുത്തി. ഇറാനിലെ വിവിധ തുറമുഖങ്ങളിലായി ആയിരക്കണക്കിന് ഇന്ത്യൻ നാവികരാണ് സമാനമായ സാഹചര്യത്തിൽ നിലവിൽ കഴിയുന്നത്.
ഇറാൻ, കുവൈറ്റ്, ഒമാൻ എന്നിവിടങ്ങളിലേക്ക് സ്റ്റീൽ കയറ്റിപ്പോയ ചെറിയ ചരക്കുകപ്പലിലെ ജീവനക്കാരനാണ് മുപ്പതുകാരനായ അങ്കിത് യാദവ്. ഹോർമുസ് കടലിടുക്കിലെ യുദ്ധസമാനമായ സാഹചര്യം കാരണം കപ്പലുകൾക്ക് നീങ്ങാൻ സാധിക്കാത്തതാണ് ഇവരെ കുടുക്കിയത്. ഷിപ്പിംഗ് കമ്പനികൾ വിമാന ടിക്കറ്റ് നിരക്ക് നൽകാൻ തയ്യാറാകാത്തതിനാൽ സ്വന്തം നിലയ്ക്ക് നാട്ടിലേക്ക് മടങ്ങാനും ഇവർക്ക് സാധിക്കുന്നില്ല. പ്രദേശത്ത് തുടർച്ചയായുണ്ടാകുന്ന മിസൈൽ ആക്രമണങ്ങളും സ്ഫോടനങ്ങളും നാവികരെ കടുത്ത ഭീതിയിലാഴ്ത്തിയിരിക്കുകയാണ്. സർക്കാർ ഇടപെടലിലൂടെ മാത്രമേ തങ്ങൾക്ക് രക്ഷപ്പെടാൻ കഴിയൂ എന്ന് നാവികർ അഭ്യർത്ഥിക്കുന്നു.
സംഘർഷം ആരംഭിച്ചതിനുശേഷം ഇതുവരെ 2,680 ഇന്ത്യൻ നാവികരെ നാട്ടിലെത്തിക്കാൻ കഴിഞ്ഞതായി ഷിപ്പിംഗ് മന്ത്രാലയം അറിയിച്ചു. എന്നാൽ, സൽമാൻ സിദ്ദിഖി ഉൾപ്പെടെയുള്ള നിരവധി പേർ ഇപ്പോഴും ഖുറാംഷഹർ പോലുള്ള തുറമുഖങ്ങളിൽ നങ്കൂരമിട്ട കപ്പലുകളിൽ ഭീതിയോടെ കഴിയുകയാണ്. സംഘർഷത്തിനിടെ ഇതിനോടകം മൂന്ന് ഇന്ത്യൻ നാവികർക്ക് ജീവൻ നഷ്ടപ്പെട്ടതായാണ് ഔദ്യോഗിക കണക്കുകൾ. സുരക്ഷിതമായ കപ്പൽയാത്ര ഉറപ്പാക്കാൻ അന്താരാഷ്ട്ര തലത്തിൽ ചർച്ചകൾ നടക്കുന്നുണ്ടെങ്കിലും ഹോർമുസ് കടലിടുക്കിലെ മൈൻ സാന്നിധ്യവും ഡ്രോൺ ആക്രമണങ്ങളും രക്ഷാപ്രവർത്തനത്തിന് വെല്ലുവിളിയാകുന്നുണ്ട്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Fear of death in Hormuz; Indian sailors await rescue with only tomatoes and onions to stave off hunger
