മോൺട്രിയൽ: വ്യാജ ചുമമരുന്നുകളുടെ ഉപയോഗം മരണത്തിന് വരെ കാരണമായേക്കാവുന്ന അമിതഡോസിലേക്ക് നയിക്കുമെന്ന് മുന്നറിയിപ്പ് നൽകി മോൺട്രിയൽ പൊതുജനാരോഗ്യ വകുപ്പ്. ‘പ്രോമെഥസീൻ വിത്ത് കോഡീൻ’ (Promethazine with Codeine) എന്ന പേരിൽ വിപണിയിൽ ലഭിക്കുന്ന മരുന്നുകളിൽ മാരകമായ ഒപിയോയിഡുകളും ലഹരിമരുന്നുകളും അടങ്ങിയിട്ടുണ്ടെന്ന് ആരോഗ്യവിദഗ്ധർ കണ്ടെത്തി. ഔദ്യോഗിക അംഗീകാരമുള്ള മരുന്നെന്ന വ്യാജേന വിൽക്കപ്പെടുന്ന പർപ്പിൾ നിറത്തിലുള്ള ഈ സിറപ്പ്, ഗുരുതരമായ ആരോഗ്യപ്രശ്നങ്ങളാണ് ഉണ്ടാക്കുന്നത്.
‘ലീൻ’ (Lean) അല്ലെങ്കിൽ ‘സിസർപ്പ്’ (Sizzurp) എന്നറിയപ്പെടുന്ന ഈ ഉൽപ്പന്നം യുവാക്കൾക്കിടയിലാണ് വ്യാപകമായി പ്രചരിക്കുന്നത്. പിടിച്ചെടുത്ത സാമ്പിളുകളിൽ കാനഡയിൽ നിരോധിക്കപ്പെട്ട ബ്രോമസോളാം, മാരകമായ വിഷാംശമുള്ള പ്രോട്ടോണിറ്റാസീൻ എന്നീ രാസവസ്തുക്കൾ കണ്ടെത്തിയിട്ടുണ്ട്. ഫെന്റനിലിനേക്കാൾ ശക്തമായ ഇത്തരം സിന്തറ്റിക് ഒപിയോയിഡുകൾ ശ്വസനസ്തംഭനത്തിനും പെട്ടെന്നുള്ള മരണത്തിനും കാരണമാകുന്നു. സാധാരണ നിലയിലുള്ള പരിശോധനകളിലൂടെ ഇവ കണ്ടെത്താൻ പ്രയാസമാണെന്നത് അപകടസാധ്യത വർദ്ധിപ്പിക്കുന്നു.
അമിതഡോസ് തടയാൻ നലോക്സോൺ (Naloxone) പോലുള്ള മരുന്നുകൾ കൈവശം വയ്ക്കണമെന്നും അടിയന്തര സാഹചര്യങ്ങളിൽ 911 എന്ന നമ്പറിൽ ബന്ധപ്പെടണമെന്നും അധികൃതർ നിർദ്ദേശിച്ചു. ശ്വാസതടസ്സം, ബോധക്ഷയം, ചുണ്ടുകളിലും നഖങ്ങളിലും കാണപ്പെടുന്ന നീലനിറം എന്നിവയാണ് പ്രധാന ലക്ഷണങ്ങൾ. ലഹരിവസ്തുക്കളുടെ ഉപയോഗം ഒഴിവാക്കണമെന്നും സംശയാസ്പദമായ സാഹചര്യങ്ങളിൽ ഡ്രഗ് ചെക്കിംഗ് സേവനങ്ങൾ പ്രയോജനപ്പെടുത്തണമെന്നും പൊതുജനാരോഗ്യ വകുപ്പ് അറിയിച്ചു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Fake cough syrups are becoming a death trap; Drug mafia targets youth
